Ամերիաբանկը տեղաբաշխում  է դրամային պարտատոմսերի երկրորդ տրանշը՝  5 մլրդ ՀՀ դրամ ծավալով

Արմինֆո.Ամերիաբանկը մայիսի 18-ից հուլիսի 31-ը ներառյալ, հրապարակային առաջարկի միջոցով նախատեսում է տեղաբաշխել անվանական արժեկտրոնային ոչ փաստաթղթային պարտատոմսերի երկրորդ տրանշը` 5 մլրդ ՀՀ դրամ ընդհանուր ծավալով։ 

Ինչպես ԱրմԻնֆո-ին հաղորդեցին բանկի մամուլի ծառայությունից, պարտատոմսերի համար գործելու են հետևյալ պայմանները․դասը՝       անվանական արժեկտրոնային, անվանական արժեքը՝ 100,000 ՀՀ դրամ, ընդհանուր ծավալը՝  5,000,000,000 ՀՀ դրամ, քանակը՝ 50,000 հատ, շրջանառության ժամկետը՝  30 ամիս, արժեկտրոնային տոկոսադրույքը՝ 9,0 %, արժեկտրոնների վճարման պարբերականությունը՝  3  ամիս պարբերականությամբ, տեղաբաշխողը՝ «ԱՄԵՐԻԱԲԱՆԿ» ՓԲԸ:

Աղբյուրը նաեւ տեղեկացնում է, որ «Ամերիաբանկ» ՓԲԸ-ի ՀՀ դրամով արտահայտված անվանական արժեկտրոնային պարտատոմսերը ցուցակվել և ընդգրկվել են «Նասդաք Օէմէքս Արմենիայի» պարտատոմսերի հիմնական ցուցակում։ Պարտատոմսերի ծրագրային ազդագիրը գրանցվել է ՀՀ կենտրոնական բանկի նախագահի 2020թ. մարտի 16-ի Թիվ N 1/164Ա որոշմամբ: 

Պարտատոմսերի ձեռքբերման համար ներդրողները սահմանված կարգով պետք է լրացնեն և տեղաբաշխողին պատշաճ կերպով առաքեն պարտատոմսերի ձեռքբերման հայտ-հանձնարարական, որով հավաստում են թողարկման պայմաններն ընդունելու իրենց պատրաստակամությունը և որով դրանք դառնում են ներդրողների համար պարտադիր:  

Հայտ-հանձնարարականը լրացնելուց և տեղաբաշխողին ուղարկելուց հետո, սակայն ոչ ուշ քան պարտատոմսերի ձեռքբերման օրվա ժամը 16:30-ը ներառյալ,  ներդրողը պարտատոմսերի դիմաց պետք է կատարի վճարում՝ «Ամերիաբանկ» ՓԲԸ-ում բացված հետևյալ հաշվեհամարին․ 1570043120372900

Տեղաբաշխման ընթացքում յուրաքանչյուր աշխատանքային օրվա համար պարտատոմսի գինը կարող եք տեսնել հետևյալ հղմամբ՝  https://www.ameriabank.am/userfiles/file/IR/AMD_Prices_May_2020_arm.pdf: 

Ներդրողները պարտատոմսերի ծրագրային ազդագրի և դրա լրացման տպագիր տարբերակները կարող են ձեռք բերել «Ամերիաբանկ» ՓԲԸ գլխամասային գրասենյակում (հասցե` ՀՀ, 0010 Երևան, Վազգեն Սարգսյան 2): Պարտատոմսերի թողարկման վերջնական պայմանները հրապարակվել են «Ամերիաբանկ» ՓԲԸ ինտերնետային կայքում հետևյալ հղմամբ՝ https://www.ameriabank.am/userfiles/file/IR/AMD_bonds%20t&c_May_2020_arm.pdf: 

«Տեղեկացնենք նաև, որ այս պահին ամբողջությամբ տեղաբաշխվել է նաև ապրիլի 28-ին թողարկված դրամային պարտատոմսերի տրանշն ամբողջությամբ՝ 5 մլրդ ՀՀ դրամ ծավալով։  Հիշեցնենք, որ ֆոնդային բորսայում ցուցակված պարտատոմսերի դեպքում ֆիզիկական անձանց կողմից ստացված տոկոսային եկամուտը այլևս չի հարկվում», - ասվում է բանկի հաղորդագրությունում:

Նշենք, որ 2020թ. ապրիլի 28-ին Ամերիաբանկը հայտարարել է անվանական, արժեկտրոնային եւ ոչ փաստաթղթային երկու թողարկումների հրապարակային տեղաբաշխման մասին' 5 մլրդ դրամ եւ 10 մլն ԱՄՆ դոլար: Դրամային թողարկման շրջանակներում թողարկվել է 100 հազար դրամ անվանական արժեքով 50 հազար պարտատոմս, իսկ դոլարային' 100 ԱՄՆ դոլար անվանական արժեքով 100 հազար պարտատոմս: Դրամային պարտատոմսերի արժեկտրոնային եկամտաբերությունը կազմում է 9.5%, իսկ դոլարային պարտատոմսերը ' 5%: Շրջանառության ժամկետը երկու դեպքում էլ 27 ամիս է, իսկ կտրոնի վճարման պարբերականությունը ' եռամսյակը մեկ: Դրամային տրանշի տեղաբաշխումն ավարտվել է ժամկետից շուտ ՝ մայիսի 7 - ին, իսկ դոլարային տրանշի տեղաբաշխումը դեռ ընթացքի մեջ է (հուլիսի 3 - ին նախատեսված ժամկետը)։

AMX - ի տվյալներով, ֆոնդային բորսայում ս.թ. մայիսի 13-ի դրությամբ գնանշվում է Ամերիաբանկի պարտատոմսերի 13 թողարկում ' 10 դոլարային եւ 3 դրամային: Դոլարային թողարկումների ընդհանուր ծավալը կազմում է 85.710 մլն դոլար, իսկ դրամայինինը՝ 8 մլրդ դրամ։ Դոլարային տրանշերի մարումը տեղի կունենա 2020-2023թթ. հունիսին և դեկտեմբերին' երկու տրանշ, 2021թ. մայիսին, սեպտեմբերին և նոյեմբերին' չորս տրանշ, 2022թ.փետրվարին և հոկտեմբերին' երեք տրանշ, 2023թ. մայիսին' մեկ տրանշ: Իսկ դրամային տրանշերը մարվելու են 2021թ. սեպտեմբերին (մեկ) և 2022թ. փետրվարին (երկու)։

"Արմինֆո" - ի պատրաստած Հայաստանի բանկերի ֆինանսական վարկանիշի տվյալներով, 31.12.2019 թ Ամերիաբանկն առաջատար է կորպորատիվ պարտատոմսերի տեղաբաշխումից ներգրավված միջոցների ծավալով ' 54.6 մլրդ դրամ կամ 113.8 մլն դոլար: Եռամյա կտրվածքով բանկն այդ ցուցանիշը ավելացրել է 3 անգամ: Այս ցուցանիշի ընդհանուր ծավալում Ամերիաբանկին բաժին է ընկնում բանկային հատվածի մոտ 30% - ը: Ամերիաբանկը բավականին ակտիվ է նաև Հայաստանի կորպորատիվ պարտատոմսերի շուկայում ՝ 2016թ. մարտից սկսելով իր արժեթղթերի թողարկումը, և նույն թվականին նախաձեռնել է առաջին թողարկումը միջազգային շուկայում ՝ հունիսին իր ներդրումային կառավարչի ՝ responsAbility Investments AG ընկերության միջոցով 4 լյուքսեմբուրգյան ներդրումային ֆոնդերում հաջողությամբ տեղաբաշխել է 20 մլն դոլար ծավալով պարտքային արժեթղթեր: Ամերիաբանկը բազմիցս ճանաչվել է "Արժեթղթերի միջազգային շուկայում Դեպոզիտար համակարգի հաշվի լավագույն կաստադիան օպերատոր":

Հիշեցնենք, որ 1996թ. հոկտեմբերի 31-ից Հայաստանյան շուկայում գործող Ամերիաբանկը ունիվերսալ բանկ է, որը ներդրումային, կորպորատիվ և մանրածախ բանկային ծառայություններ է մատուցում բանկային լուծումների համալիր փաթեթի տեսքով: 2020թ. հունվարի 1-ի դրությամբ Բանկի բաժնետերերն են Ամերիա Գրուպ CY Ltd. - 56,47%, ՎԶԵԲ-ը' 17,76%, Ասիական զարգացման բանկը' 13,94%, ESPS Holding Limited - ը ' 11,83%: