Տավուշում միջոցներ կձեռնարկվեն Կարմիր գրքում գրանցված ընձառյուծի պահպանության ուղղությամբ

Արմինֆո. Շրջակա միջավայրի նախարարի տեղակալներ Իրինա Ղափլանյանն ու Վարդան Մելիքյանը այցելել  են Տավուշի մարզի Ենոքավան գյուղ, որի հարակից տարածքում օրեր առաջ ֆոտոթակարդների միջոցով  լուսանկարվել էր կովկասյան ընձառյուծը։
 

Ինչպես հաղորդում է Շրջակա միջավայրի նախարարության մամուլի ծառայությունը, Տավուշի մարզպետ Հայկ Չոբանյանի և  Ենոքավանի գյուղապետ Անդրանիկ Չիբուխչյանի հետ քննարկվել են ընձառյուծի պահպանությանն ու տեղի բնակիչների իրազեկվածության մակարդակի բարձրացմանը վերաբերվող մի շարք հարցեր։ Այցելության ընթացքում Ենոքավանի բնակիչ Արման Գաբրիելյանն Իրինա Ղափլանյանին և Վարդան Մելիքյանին ներկայացրել է այն հատվածը, որտեղ ինքը նախորդ տարի հանդիպել և կռվի էր բռնվել ընձառյուծի հետ։

Հիշեցնենք, որ Տավուշի մարզում ընձառյուծը հայտնաբերվել է 50 տարվա ընթացքում առաջին անգամ։ Վերջին անգամ կենդանուն այդ տարածքում տեսել են 1970-ական թվականներին։ Տավուշը դարձավ Հայաստանի չորրորդ մարզը, որտեղ ապրում է ընձառյուծ։ Հայկական լեռնաշխարհում հանդիպում է պարսկական կամ կովկասյան ընձառյուծ (Panthera pardus tulliana)։ Որոշ տվյալներով  1970-80-ական թվականներին Հայաստանում ընձառյուծը բավականին տարածված էր։ Բայց տարիներ շարունակ ընձառյուծի որսը այնքան ընդլայնվել է, որ 1987 թվականին ընձառյուծն ընդգրկվել է Հայկական ԽՍՀ Կարմիր գրքում։ Հայոց լեռների արքան' կովկասյան ընձառյուծը, ընդգրկված է ՀՀ Կարմիր գրքում (2010), ինչպես նաև Բնության պահպանության միջազգային միության (IUCN) Կարմիր ցուցակում '"վտանգված" կարգավիճակով: