Նիկոլ Փաշինյանը ներկայացրել է "մեծ հիասթափության" մոդելավորման իր տեսլականը

Արմինֆո.Վարչապետ Նիկոլ Փաշինյանը ներկայացրել է "մեծ հիասթափության" մոդելավորման իր տեսլականը:

Իր ուղիղ եթերի ընթացքում ներկայացնելով այդ մոդելավորումը՝ Փաշինյանը նշել է, որ, իր կարծիքով, դժգոհության հիմքեր ունեցողների առաջին խումբը քաղաքական ուժերն են, որոնց պայմանականորեն բաժանել է երկու խմբի։ Նրա խոսքով, առաջին խումբը այն քաղաքական ուժերն են, որոնք նախկին իշխանությունների եւ իշխող մեծամասնության հետ ուրվագծել էին իրենց ապագան առաջիկա տասը տարիների համար, եւ որոնց պլանները փլուզվեցին "թավշյա հեղափոխության" արդյունքում, եւ բարեկեցիկ կյանքի մասին նրանց բոլոր սպասումները տապալվեցին: Ընդ որում, նա հավելել է, որ երկրորդ խումբը քաղաքական ընդդիմադիր ուժեր են, որոնց ինքը հարգանքով է վերաբերվում,  և նրանք ունեն հիասթափության բոլոր հիմքերը, իսկ պատճառն այն է, որ այդ ուժերը տարիներ շարունակ մի կարգախոս են զարգացրել, բայց հեղափոխությունից հետո պարզ դարձավ, որ այն, իրականում, արդարացված չի եղել:

"Հաջորդ խումբը, որը հիասթափության բոլոր հիմքերն ունի, արևմտամետներն են, որոնք հույս ունեին կամ էլ վստահ էին, որ հեղափոխությունը կատարել են արևմտամետ ուժերը։ Նրանք հիասթափված են, քանի որ հասկացել են, որ Հայաստանում իշխանության ղեկին արևմտամետ ուժեր չեն։ Մեկ այլ խումբ՝ ռուսամետ ուժեր են, որոնք երկու կարծիք ունեին. որ Ռուսաստանը թույլ չի տա հեղափոխություն Հայաստանում՝ իր ազդեցության գործիքներով, կամ էլ՝ ՀՀ-ն այնքան խամաճիկային պետություն կլինի, որ ստիպված կլինի իշխանությունը կիսել հանրապետությունում", - նշել  է վարչապետը, հավելելով,  որ երկուսն էլ հիասթափված են, քանի որ նրանց սպասելիքները չեն արդարացել։

Ըստ վարչապետի՝ ևս մեկ խումբ է օլիգարխիան, որը զրկվել է մի շարք արտոնություններից, որոնցից օգտվել է նախկինում, քանի որ իշխանությունը չի դիմում նրանց օգնությանը ինչ-որ բանի դիմաց,  պահանջելով միայն օրինական գործունեություն, և, հետևաբար, կախված չէ նրանցից։

Լրատվամիջոցներ, դա հաջորդ խումբն է, ըստ Փաշինյանի, որոնք տարիներ շարունակ գումարներ են ստացել այս կամ այն անձանցից ու կառույցներից, այդ թվում՝ իշխանություններից։ "Հայաստանում շատ լրատվամիջոցներ գումարներ են ստացել իշխանություններից եւ վերահսկվում էին նրանց կողմից։ Հիմա չեն ստանում և չեն վերահսկվում, ինչի մասին ես բազմիցս ասել եմ", - ընդգծել է նա, հավելելով, որ մի շարք լրատվամիջոցներ արձագանքել են արդեն իր երեկվա հայտարարությանը, այդ թվում՝ "Հայկական ժամանակ" օրաթերթը (նախկինում իրեն պատկանող - խմբ.), որին ինքն առաջարկել է հաշվետվություն ներկայացնել իր եկամուտների մասին, հավաստիացնելով, որ այդ թերթը եղել է այն ԶԼՄ-ներից մեկը, որ 3-րդ հանրապետության պատմության մեջ բոլորից շատ հարկեր է վճարել։

Վարչապետի խոսքով, ևս մեկ խումբ, որը հիասթափության հիմքեր ունի, պայմանականորեն ասած, հոգևորականությունն է, քանզի որքան հստակ են ուրվագծվում  նոր Հայաստանի գաղափարախոսությունն ու արժեքները, այնքան ակնհայտ է, որ աղքատանում է հոգևոր կյանքը երկրում ։ Փաշինյանը կարծում է, որ հոգեւորականները լուրջ բացթողումներ ունեն հոգեւոր արժեքների եւ գաղափարախոսության հանրահռչակման տեսանկյունից, եւ հաճախ նրանց գործունեության մեջ ավելի շատ դրսեւորվում է քաղաքական գործունեություն, քաղաքական ինտրիգներ, քան Աստվածաշնչի թելադրած գործունեությունը: Նա մատնանշել է պետություն-եկեղեցի հարաբերությունների համակարգում առկա խնդիրները, որոնք լուծման կարիք ունեն։

Մեկ այլ խումբ, ըստ  կառավարության ղեկավարի, սփյուռքյան կառույցներ են, որոնք տարիներ շարունակ միջնորդ են եղել Հայաստանի իշխանությունների եւ Սփյուռքի միջեւ երկխոսությունում: "Այսօր այդ երևույթը փոխակերպվում է, որովհետև ես հիմա նստած եմ ու խոսում եմ, և այստեղ չկան բաժանումներ, թե ում հետ ես խոսում՝ Սփյուռքի մեր հայրենակիցների կամ Հայաստանում ապրողների հետ", - նշել է նա, հավելելով, որ նախկինում 90%-ը ներգրավված է եղել սփյուռքյան կառույցներում, մինչդեռ հիմա դա մոտ 10% է: Հայտարարելով այս ոլորտում առկա խնդիրների մասին՝ վարչապետը կոչ է արել հնարավորինս սեղմ ժամկետներում համատեղ ջանքերով դրանք լուծել։

"Հաջորդ պայմանական խումբն այն մարդիկ են, ովքեր միացել են նոր իշխանությանը՝ սպասելով նյութական բարիքներին և հիասթափված  են ՝ չստանալով այդ բարիքները", - նշել է վարչապետը ։ Հաջորդ հատվածը, ըստ նրա, այն ընկերներն ու բարեկամներն են, որոնք իրենց կյանքում փոփոխություն չեն զգացել այն բանից հետո, երբ իրենց հարազատներն իշխանության են եկել: Ընդ որում, նա դրական է գնահատել այն փաստը, որ իր թիմում մարդիկ չեն դիմում հնարքների, որոնց դիմել են նախկին իշխանությունները՝ իշխանության քիրվայության տեսանկյունից ։

Ամփոփելով իր խոսքը՝ Փաշինյանն ընդգծել է հեղափոխության նպատակների իրականացումը շարունակելու հանձնառությունը, վստահեցնելով, որ ոչ ոք չի կարող կանգնեցնել նրան այդ ճանապարհին, իսկ միակ ուժը, որը կարող է դա անել, ժողովուրդն է: