Արմինֆո."Երեւանշին" ՓԲԸ տնօրենների խորհրդի նախագահ Վազգեն Պողոսյանը, որը մեղադրվում է Քաղաքաշինության կոմիտեի նախկին նախագահ Վահագն Վերմիշյանին կաշառք տալու համար, գրավի դիմաց ազատ է արձակվել:
Ինչպես հաղորդել Է Պողոսյանի փաստաբան Գագիկ Խաչիկյանը, գրավի գումարը կազմում է 3 մլն դրամ։ Նա նաեւ նշել է, որ իր պաշտպանյալը չի ընդունում իր մեղքը եւ իրեն առաջադրված մեղադրանքը համարում է անհիմն։
Նշենք, որ Քաղաքաշինության կոմիտեի նախկին ղեկավար Վահագն Վերմիշյանի կողմից կաշառք ստանալու գործով 6 քաղաքացու մեղադրանք է առաջադրվել, որոնցից 3-ը կալանավորվել են: Ապրիլի 6-ին Դատարանը բավարարել է Վերմիշյանի կալանքը երկարաձգելու միջնորդությունը։
Հիշեցնենք, որ, ըստ ԱԱԾ-ի, Վերմիշյանը շինարարական աշխատանքներ ծավալող անձանց կամ կառուցապատող ընկերությունների ներկայացուցիչների հետ ձեռք բերված պայմանավորվածությունների համաձայն, ինչպես անձամբ, այնպես էլ մտերիմի միջոցով 5 դեպքով խոշոր և առանձնապես խոշոր՝ 1 - 2.5 միլիոն դրամի չափով, գումարի կամ ապրանքանյութական արժեքների տեսքով կաշառք ստանալու դիմաց, նախորդ տարի նրանց օգտին կատարել է գործողություններ կամ նպաստել է ցանկալի որոշումների արագ կայացմանը և տրամադրմանը: Նա իր մտերիմի անունով հիմնել է նախագծման աշխատանքներ իրականացնող ՍՊԸ և ուղղորդել է իրեն դիմած կառուցապատողներին և անհատներին գործարքներ կատարել այդ ընկերության հետ` միջոցներ ձեռնարկելով ընկերության կողմից կազմված փաստաթղթերի հիման վրա պետական և տեղական ինքնակառավարման մարմինների կողմից բարենպաստ որոշումների կայացման համար: «Բացի այդ, ՀՀ քաղաքաշինության կոմիտեի նախագահը 2019թ. հոկտեմբերի 23-ին իր աշխատասենյակում տեղի ունեցած հանդիպման ժամանակ պայմանավորվածություն է ձեռք բերել մի քանի շինարարական ընկերությունների սեփականատիրոջը «Հայաստանի վաստակավոր շինարարի» կոչման ներկայացնելու համար, դրա դիմաց որպես կաշառք ստանալով 2.379.950 դրամին համարժեք 5000 ԱՄՆ դոլար գումար և շուրջ 2.300.000 ՀՀ դրամին համարժեք շինանյութ», - ասված է ԱԱԾ հաղորդագրության մեջ։