Ուրբաթ, 7 Փետրվարի 2020 10:45
Ալեքսանդր Ավանեսով

Հայաստանում ջրային ռեսուրսների հաշվառման հարթակ կստեղծվի

Հայաստանում ջրային ռեսուրսների հաշվառման հարթակ կստեղծվի

Արմինֆո. Շրջակա միջավայրի նախարար Էրիկ Գրիգորյանն այսօր ընդունել է Հայաստանի Հանրապետությունում Շվեդիայի Թագավորության արտակարգ և լիազոր դեսպան Ուլրիկ Թիդեստրյոմին: Ողջունելով դեսպանին՝ նախարար Էրիկ Գրիգորյանը նշել է, որ շրջակա միջավայրի պահպանության ոլորտում իրականացվող քաղաքականության շրջանակներում երկու երկրներն ունեն համագործակցության ընդլայնման մեծ հեռանկար։

 

Ինչպես ԱրմԻնֆո-ին հաղորդեցին նախարարության մամուլի ծառայությունից, հանդիպման ընթացքում քննարկվել են արտադրողների ընդլայնված պատասխանատվության սկզբունքների վերաբերյալ ԵՄ դիրեկտիվների մոտարկման համար անհրաժեշտ միջոցառումների ճանապարհային քարտեզի մշակման հարցերը:

Հանդիպման օրակարգում էին նաև Սևանի հիմնախնդիրներն ու առցանց հոսքաչափական տվյալների ստացման միասնական տեղեկատվական համակարգի ստեղծման հարցերը: Տեղեկատվական համակարգի ներդրման արդյունքում կստեղծվի հարթակ, որը կնպաստի ջրային ռեսուրսների հաշվառմանը, փաստացի ջրածախսերի հսկողությանը և իրազեկվածության մակարդակի բարձրացմանը:

 

Դեսպան Թիդեստրյոմին շնորհակալություն է հայտնել հրավերի համար՝ ընդգծելով, որ մեծ կարևորություն է տալիս երկու երկրների միջև փորձի փոխանակմանը:
Հանդիպման ավարտին կողմերն անդրադարձել են նաև քիմիական նյութերի համահունչ կառավարման ոլորտում համագործակցությանը՝ այդ թվում աղտոտված հողերի կադաստրի ստեղծման ծրագրերի մշակմանը:

 

Հանդիպմանը ներկա էին նաև նախարարի տեղակալ Ի․Ղափլանյանը, դեսպանի խորհրդական և ժամանակավոր հավատարմատար Բիրգեր Կարլսոնը:

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ
Ներմուծեք թվանշաններն     



Մեկնաբանվողներ
Փնտրել ըստ օրերի