Ուրբաթ, 27 Դեկտեմբերի 2019 15:55
Կարինա Մանուկյան

Հայաստանի ազգային ֆիլհարմոնիկ նվագախումբը Չինաստանում հանդես է գալու հյուրախաղերով

Հայաստանի ազգային ֆիլհարմոնիկ նվագախումբը Չինաստանում հանդես է գալու հյուրախաղերով

Արմինֆո.  Հայաստանի ազգային ֆիլհարմոնիկ նվագախումբը մեկնել է Չինաստանի Ժողովրդական Հանրապետություն, որտեղ հանդես է գալու հյուրախաղերով: Ազգային ֆիլհարմոնիկ նվագախմբի գլխավոր պրոդյուսեր Արման Պադարյանը Չինաստանում մասնակցել է հյուրախաղերին նվիրված մամուլի ասուլիսին, որը նախաձեռնել է ՉԺՀ-ում Հայաստանի Հանրապետության դեսպանությունը:

Պադարյանը կարևորել է նմանատիպ շրջագայության կազմակերպումը: «Շրջագայությունն անցացվելու է Շանհայ, Շենժեն, Ուսի, Չանշույ, Չանչժոու, Լիշույ, Սյամին, Ուհան, Պեկին քաղաքներում և ներառելու է 10 համերգ: Հայ, ռուս և արևմտաեվրոպպացի կոմպոզիտորական դպրոցների գոհարները, Հայաստանի ազգային ֆիլհարմոնիկ նվագախմբի կատարմամբ, հնչելու են այդ համերգների ընթացքում»,-ասել է Արման Պադարյանը:

 

Չինաստանի Ժողովրդական Հանրապետությունում ՀՀ արտակարգ և լիազոր դեսպան Սերգեյ Մանասարյանը նույնպես կարևորել է նման շրջագայության կազմակերպումը, որն առավել կամրապնդի երկու բարեկամ ժողովուրդների միջև առկա մշակութային սերտ համագործակցությունը:

 

Ինչպես նշված է նվագախմբի մամուլի ծառայության հաղորդագրությունում, հյուրախաղերը կազմակերպվել են Չինաստանի Armstrong International Music և Անգլիայի Wright Music Management գործակալությունների միջնորդությամբ, ՀՀ ԿԳՄՍ նախարարության, ՀԲԸՄ-ի, «Իմ քայլը» հիմնադրամի և այլ բարերարների աջակցությամբ: ՀԱՖՆ գեղարվեստական ղեկավար և գլխավոր դիրիժոր Էդուարդ Թոփչյանի և նվագախմբի անունից ասուլիսին հնչել է շնորհակալական խոսք՝ ուղղված ՀՀ  ԿԳՄՍ նախարարությանն ու շրջագայության բոլոր աջակիցներին: Armstrong International Music-ի ղեկավար Վրեյ Արմստրոնգն առաձնահատուկ շեշտել է, որ Հայաստանի ազգային ֆիլհարմոնիկը եվրոպական լավագույն կոլեկտիվներից է, որը Չինաստանում հանդես է գալիս առաջին անգամ: Նվագախումբը վստահ է՝ երկուստեք անդրանիկ համագործակցությունը հետագա երկարատև ընկերության սկիզբն է:

 

Չինացի կլարնետահար Թոնի Շենը շրջագայության ընթացքում կմիանա նվագախմբին՝ Մոցարտի Կլարնետի կոնցերտի կատարումով: Նա մամուլի ասուլիսի ընթացքում հատված ներկայացրեց կոնցերտից՝ իր կատարողական տաղանդով հիացնելով ներկաներին:  Մամուլի ասուլիսին մասնակցել են Չինաստանի առաջատար լրատվամիջոցների ներկայացուցիչներն, ովքեր հնարավորություն են ունեցել իրենց հարցերն ուղղել ասուլիսի մասնակիցներին:

ԱՎԵԼԱՑՆԵԼ ՄԵԿՆԱԲԱՆՈՒԹՅՈՒՆ
Ներմուծեք թվանշաններն     



Մեկնաբանվողներ
Փնտրել ըստ օրերի