Խաչատուր Սուքիասյանը չի կիսում ներդրումների համար համապատասխան պայմանների բացակայության մասին Գագիկ Ծառուկյանի կարծիքը

Արմինֆո. Գործարար Խաչատուր Սուքիասյանը չի կիսում խոշոր ձեռնարկատեր Գագիկ Ծառուկյանի այն կարծիքը, որ Հայաստանում գործարարությամբ զբաղվելու և ներդրումներ կատարելու համար համապատասխան պայմաններ չեն ստեղծվել։ Այս մասին նա հայտարարել է դեկտեմբերի 2-ին <Էյ Դի Էլ Դայմոնդս> ադամանդի վերամշակման նոր գործարանի բացման ժամանակ

լրագրողների հետ զրույցում:

Սուքիասյանի խոսքով ՝ այսօր եթե անգամ բիզնեսը բախվում է խնդիրների, ապա դրանք բոլորն օրենքի շրջանակներում են։  Ինչպես նշել է գործարարը, դեռեւս կան գործարարներ, որոնք էմոցիոնալ գնահատելով իրավիճակը, բացասաբար են արտահայտվում նոր իշխանության մասին:  Մինչդեռ, ավելի խորանալով խնդրի մեջ, պարզվում է, որ խնդիրը մտացածին է եղել, նշել է նա։ <Այն, որ այսօր բոլորի համար հավասար մրցակցային պայմաններ են ստեղծված, չկա կոռուպցիա և գործում է հակամենաշնորհային գործիքակազմ, արդեն հեղափոխություն է>, - նշել է նա:

Հիշեցնենք, որ նոյեմբերի 7-ին Կոտայքի մարզի Առինջ գյուղում Գագիկ Ծառուկյանի ընտանիքին պատկանող <Չերամիսա> գործարանի բացման ժամանակ Գագիկ Ծառուկյանը հայտարարել էր, որ դժգոհ է Հայաստանում առկա ներդրումային պայմաններից: Նրա խոսքով ՝ փաստաթղթերի ձեւակերպումը երկար ժամանակ է զբաղեցնում, իսկ գործարարները չեն կարող երկար սպասել։  <Ես շատ եմ հարգում վարչապետին, ինձ ճիշտ հասկացեք։ Նա ցանկանում է դա անել, բայց ներդրումների համար անհրաժեշտ պայմաններ չկան։ Ես ասացի, որ ներդրումների համար հիմնականում պետք է մեկ պատուհան լինի>, - նշել է Ծառուկյանը։