Ուրբաթ, 11 Հոկտեմբերի 2019 12:10

Արմինֆո. Ստեփանակերտում մեկնարկել է «Համագործակցություն հանուն արդարության եւ խաղաղության» խորագրով Արցախի բարեկամների համաժողովը:

 

Ինչպես ԱրմԻնֆո-ին հաղորդեցին Արցախի Հանրապետության նախագահի մամուլի ծառայությունից, համաժողովի բացմանը ելույթով հանդես է եկել հանրապետության նախագահ Բակո Սահակյանը:

 

Նա, մասնավորապես, ընդգծել է, որ այդ միջոցառումը բավականին յուրահատուկ է թե՛ իր բովանդակությամբ, թե՛ մասնակիցների առումով: ՙԱռաջին անգամ տեղի է ունենում Արցախի բարեկամների համաժողով, որը մեկ հարկի տակ է հավաքել մեր երկրին սատարող քաղաքական, հասարակական, մշակութային գործիչների, իրավապաշտպանների,  գիտնականների, վերլուծաբանների եւ լրագրողների տարբեր պետություններից: Այստեղ են Արցախի հետ բարեկամության խմբերի եւ շրջանակների անդամներ, մեր հանրապետության անկախությունը ճանաչած կամ մեզ հետ համագործակցող վարչական միավորների եւ քաղաքական ուժերի ներկայացուցիչներ: Ժողովրդավարական սկզբունքներին եւ մարդասիրական արժեքներին նվիրվածությամբ դուք տարիներ շարունակ քրտնաջան աշխատանք եք տանում՝ ուղղված Արցախի սատարմանը, միջազգային տարբեր հարթակներում մեր երկրի մասին ճշմարտացի տեղեկատվության ներկայացմանը, երկկողմ հարաբերությունների զարգացմանը, Արցախում տարբեր ծրագրերի իրականացմանը: Մենք շնորհակալ ու երախտապարտ ենք ձեզ այս ամենի համար, բարձր ենք գնահատում ձեր առաքելությունը եւ ուրախ ենք, որ ունենք ձեզ նման ընկերներ ու բարեկամներ: Համաժողովում քննարկվելիք թեմաներն առնչվում են մեր հանրապետության կենսագործունեության գրեթե բոլոր ոլորտներին, եւ նման ձեւաչափը հնարավորություն է տալիս ավելի լավ պատկերացնել իրականությունը, նախանշել ու հստակեցնել անելիքները: Այս համատեքստում կարեւոր է եւս մեկ անգամ ներկայացնել Արցախի Հանրապետության պետականաշինության տեսլականը եւ մեր արտաքին քաղաքական հրամայականները, ինչը յուրահատուկ ուղենիշ է հանդիսանում նաեւ ձեր աշխատանքում: Անկախ, ինքիշխան, հզոր պետություն կերտելը մեզ համար եղել եւ մնում է մեր պետականաշինության հիմքը, որի հիմնասյուներից են Հայաստանի եւ Սփյուռքի հետ մեր եռամիասնությունն ու ժողովրդավարական արժեքներին ու սկզբունքներին հավատարիմ լինելը: Մեզ համար կարեւորագույն հրամայական է Արցախի անվտանգության լիարժեք ապահովումը բոլոր հարթություններում: Մեր անվտանգության չնչին իսկ թուլացումը հակառակորդի մոտ առաջացնելու է նոր ագրեսիայի դիմելու գայթակղություն, ինչը ինքնին հղի է անկանխատեսելի հետեւանքներով: Այդ իսկ պատճառով՝ անվտանգության խնդիրներն առաջնային են նաեւ բանակցային գործընթացում՚, - ընդգծել է Բակո Սահակյանը:

 

Խոսելով բանակցային գործընթացից՝ նա կրկին վերահաստատել է հավատարմությունը Ադրբեջանի հետ  հարաբերությունների խաղաղ կարգավորմանը՝ բանակցային սեղանի շուրջ, ԵԱՀԿ Մինսկի խմբի հովանու ներքո: ՙԱյստեղ լուրջ հաջողությունների գրանցումն անհնարին է առանց բանակցային գործընթացի լիարժեք ձեւաչափի վերականգնման՝ Արցախի լիիրավ մասնակցությամբ: Ակնհայտ է, որ Արցախի ճակատագիրը չի կարող որոշվել առանց նրա մասնակցության, եւ մեզ համար չի կարող լինել վերադարձ անցյալին՝ լինի դա կարգավիճակի թե սահմանների առումով: Արցախի Հանրապետության արտաքին քաղաքականության հիմքում շարունակում են մնալ հավասարակշռվածության եւ բազմաուղղվածության սկզբունքները: Մեզ համար հրամայական է հավասարապես բարիդրացիական հարաբերությունների պահպանումը ինչպես Եվրոպայի, ԱՄՆ-ի, Ռուսաստանի, այնպես էլ տարածաշրջանային պետությունների հետ:  Դա պայմանավորված է ինչպես մեր տարածաշրջանի յուրահատկությամբ, այնպես էլ հայկական սփյուռքի առկայությամբ: Արտաքին քաղաքական ասպարեզում պաշտոնական Ստեփանակերտը շարունակելու է հատուկ տեղ հատկացնել տարբեր երկրների ու պետությունների եւ նրանց վարչական միավորների հետ կապերի հաստատմանն ու խորացմանը՚, - նշել է Արցախի նախագահը:

 

Բակո Սահակյանը նշել է, որ յուրաքանչյուր ժամանակահատված առաջադրում է նոր խնդիրներ, պահանջում է տարբեր մարտահրավերների դիմակայելու ռազմավարության եւ մարտավարության հստակեցում ու ճշգրտում: ՙԱյստեղ առանցքային դերակատարություն ունի Հայաստան-Արցախ-Սփյուռք սերտ փոխգործակցությունը, Արցախի եւ նրա բարեկամների միջեւ մշտական գործնական կապերի ամրապնդումը: Անելիքներն ու խնդիրները բազմազան են, բայց միանգամայն իրատեսական: Համոզված եմ, որ մեզ հաջողվելու է արդյունավետորեն լուծել դրանք, եւ այս ճանապարհին հատուկ նշանակություն ունի նման միջոցառումների անցկացումը: Համաժողովին մաղթում եմ արդյունավետ աշխատանք, նրա մասնակիցներին՝ քաջառողջություն, հաջողություններ ու ամենայն բարիք՚, - ամփոել է Արցախի նախագահը:

 

Հիշեցնենք, որ միջոցառման նպատակն է ընդլայնել և ամրապնդել փոխգործակցությունը տարբեր մարզերի և քաղաքների հետ, ինչպես նաև նոր թափ հաղորդել արդեն առկա միջազգային կապերին: Համաժողովին մասնակցում են աշխարհի տարբեր երկրներում Արցախի հետ բարեկամության խմբերի, ինչպես նաև Արցախի անկախությունը ճանաչած կամ հանրապետության հետ համագործակցող վարչատարածքային միավորների ներկայացուցիչներ: Ընդհանուր առմամբ, խոսքը շուրջ 30 երկրներից ավելի քան 150 մասնակիցների մասին է։  Միջոցառման շրջանակներում տեղի կունենան քննարկումներ խաղաղ կարգավորման գործընթացի և Արցախի ժողովրդի ինքնորոշման իրավունքի, ինչպես նաև Արցախի միջազգային կապերի ընդլայնման հնարավորությունների շուրջ՝ Ադրբեջանի քաղաքականության դիմակայելու նպատակով: