Գրիգորի Խաչատուրովը՝ Յուրի Խաչատուրովի որդին, գեներալ-մայորի կոչում է ստացել

Արմինֆո.  Հայաստանի նախագահ Արմեն Սարգսյանի հրամանագրով ՀԱՊԿ նախկին գլխավոր քարտուղար Յուրի Խաչատուրովի որդուն գեներալ-մայորի  կոչում է շնորհվել:

ՙՀիմք ընդունելով վարչապետի առաջարկությունը՝ համաձայն Սահմանադրության 133-րդ հոդվածի 2-րդ մասի, ինչպես նաև «Զինվորական ծառայության և զինծառայողի կարգավիճակի մասին» օրենքի 16-րդ հոդվածի 1-ին մասի 1-ին կետի. Երրորդ բանակային կորպուսի հրամանատար, գնդապետ Գրիգորի Յուրիի Խաչատուրովին շնորհել գեներալ-մայորի զինվորական կոչում՚, - ասվում է ՀՀ նախագահի հրամանագրում:

Նշենք, որ գնդապետ Խաչատուրովը ս.թ. օգոստոսի 18-ին աչքի է ընկել հայ-ադրբեջանական սահմանին՝ Տավուշի մարզի Չինարի գյուղի շուրջ ռազմավարական նշանակություն ունեցող դիրքերի անվտանգության ապահովման գործողության  գրագետ ղեկավարմամբ և օպերացիայի իրականացմամբ, ինչի շնորհիվ Հայաստանի զինված ուժերին հաջողվել է վերահսկողության տակ վերցնել և չեզոքացնել Ադրբեջանի կողմից Չինարի գյուղի, հայ-վրացական գազատարի և հայ-վրացական ռազմավարական կարևոր ճանապարհի գնդակոծման փորձերը:

Հիշեցնենք, որ ՀԱՊԿ նախկին գլխավոր քարտուղար Յուրի Խաչատուրովը մեղադրվում է 2008թ.մարտի 1-ի գործով՝ սահմանադրական կարգը տապալելու համար։  Այդ ժամանակ նա զբաղեցնում էր Երեւանի կայազորի ղեկավարի պաշտոնը։  Դատարանի հուլիսի 28-ի որոշմամբ նա կալանավորվել էր, իսկ հետո ազատ էր արձակվել 5 մլն դրամ գրավի դիմաց։  Նույն գործով անցնում են 2-րդ նախագահ Ռոբերտ Քոչարյանը, Հայաստանի պաշտպանության նախկին նախարար Միքայել Հարությունյանը (լքել են երկիրը եւ հետախուզման մեջ են), ԶՈՒ գլխավոր շտաբի նախկին պետ Սեյրան Օհանյանը եւ ԱԱԽ նախկին ղեկավար Արմեն Գեւորգյանը: