Կանխատեսում.  Շատ շուտով Թուրքիան կփոխի Հայաստանի նկատմամբ քաղաքականությունը

Արմինֆո. Վստահ եմ, որ հենց արտաքին գործոնները թույլ տան Անկարային փոխել Հայաստանի նկատմամբ քաղաքականությունը՝ առանց շոշափելի նյութական, քաղաքական ու հեղինակության կորուստների, թուրքերը դա կանեն։ ԱրմԻնֆո-ին այդպիսի կարծիք է հայտնել ադրբեջանցի հայտնի քաղաքագետ, Հայաստանի և Ադրբեջանի միջև քաղաքացիական խաղաղարար գործընթացի մասնակից Զարդուշտ Ալիզադեն։

"Ղարաբաղյան հակամարտության հարցում Թուրքիայի աջակցությունն Ադրբեջանի դիրքորոշումներին բավական բարդ երեւույթ է։  Իմ կարծիքով, Անկարան այդ դիրքորոշումը դրսևորում է Բաքվի և մեկ այլ ազդեցիկ երկրի ճնշման ներքո, որը Հայաստանի արտաքին քաղաքականության վրա ազդելու գործուն լծակներ ունի։  Այս լույսի ներքո, համոզված եմ, որ Թուրքիան շուտով կփոխի, Հայաստանի նկատմամբ քաղաքականության վեկտորը", - նշել է նա։

Քաղաքագետի գնահատմամբ՝ Երևանի նկատմամբ Անկարայի միակ դժգոհությունը ցեղասպանության հարցն առաջ քաշելու՝ արտաքին ուժերի կողմից հրահրված  քաղաքականությունն է։  Նրա կարծիքով, դա միայն վնաս է հասցնում Հայաստանին, փոխարենը՝ բավականին լավ խաղաքարտեր է տալիս Թուրքիայի գործընկերներին՝ "դաշնակից-հակառակորդի" դեմ խաղում։

Մեկնաբանելով Ադրբեջանում Թուրքիայի եւ Վրաստանի հետ անցկացվող հերթական՝ այս տարի չորրորդ համատեղ զորավարժությունները՝ Ալիզադեն դրանք գնահատել է որպես "մանեւրներ", որոնք նա դիտարկում է "Մինսկի խմբի համանախագահների գործունեության վերջին ակտիվացման" հետ մեկ շարքում: Նրա գնահատմամբ ՝ Թուրքիան նաև Ադրբեջանի տարածքում, Նախիջեւանում ռազմակայան ստեղծելու ոչ մի անհրաժեշտություն չունի՝ սեփական տարածքից ընդամենը մի քանի կիլոմետր հեռավորության վրա։

"Անկարային բնավ պետք չէ այդ ռազմակայանով վախեցնել Հայաստանին, որի հետ Թուրքիան հաշտեցման եւ մերձեցման հնարավորություններ է փնտրում։  Պետք չէ վախեցնել նաև Ռուսաստանին, որի հետ թուրքերը համառորեն ամուր եւ փոխշահավետ հարաբերություններ են կառուցում, այդ թվում՝ ռազմական ոլորտում։  Ավելին, Թուրքիան ոչ մի տեղ և երբեք չի պատրաստվում և չի պատերազմի Ռուսաստանի դեմ։ Այդ լույսի ներքո՝ Նախիջևանում ռազմակայան Անկարային բոլորովին պետք չէ", - ամփոփել է Ալիզադեն։

Սեպտեմբերի 2-ին Բաքվում մեկնարկել են Թուրքիայի, Ադրբեջանի եւ Վրաստանի զինվորականների  Eternity-2019 համատեղ հրամանատարաշտաբային զորավարժությունները, որոնց նպատակն է մշակել երեք երկրների մասնակցությամբ տրանսպորտային եւ էներգետիկ ենթակառուցվածքային նախագծերի պաշտպանության միջոցառումներ: Երեք երկրները "Կովկասյան արծիվ" համատեղ զորավարժություն են անցկացնում 2009 թվականից ի վեր։  Ադրբեջանի պաշտպանության նախարար Զաքիր Հասանովի հայտարարության համաձայն, 2019 թվականին Թուրքիան եւ Ադրբեջանը պատրաստվում են անցկացնել 13 համատեղ զորավարժություն, որոնց հրավիրված է նաեւ Վրաստանը: