Արմինֆո. Օգոստոսի 19-ին ՙՁյունիկ սառնարանում՚ տեղի ունեցած հրդեհի ժամանակ այնտեղ եղել է շուրջ 30 մլն դոլար ընդհանուր արժողությամբ 12 ձեռնարկությունների 900 տ արտադրանք: Այս մասին օգոստոսի 28-ին Նոյյան Տապան ակումբում տեղի ունեցած մամուլի ասուլիսի ժամանակ հայտարարել է տուժած գործարարներից մեկը՝ "Արմեն եւ Համիկ Եղբայրներ" ՍՊԸ-ի ղեկավար Արթուր Անդրեասյանը, ով ընդգծել է, որ "Ձյունիկ սառնարանում" պահվող արտադրանքի առյուծի բաժինը պատկանել է իր ձեռնարկությանը:
"Ամեն ամիս պահպանման դիմաց մենք վճարել ենք մոտ 9 մլն դրամ։ Հրդեհից հետո հաջողվել է փրկել 300 տոննայից մի փոքր ավելի ապրանք", - ընդգծել է նա։
Ա. Անդրեասյանը պատմել է, որ տուժած բոլոր գործարարների անունից "Ձյունիկ սառնարան" ՍՊԸ-ն դիմել է ՀՀ վարչապետին՝ վճարված մաքսատուրքերը և ԱԱՀ-ն փոխհատուցելու խնդրանքով: Այս համատեքստում նա նշել է, որ թռչնամսի ներմուծման դեպքում մաքսատուրքերը կազմում են 26,6 տոկոս, իսկ ԵաՏՄ-ին անդամակցելուց հետո՝ ԱԱՀ-ն բարձրացել է մինչեւ 46,6 տոկոս:
Խոսելով կոնկրետ իր ընկերության մասին, որի մասնաբաժինը շուկայում կազմում է շուրջ 25-30 տոկոս, գործարարը նկատել է, որ, ընդհանուր առմամբ, ԱԱՀ-ի եւ մաքսատուրքերի մասով խոսքը վերաբերում է 700-800 դոլարի չափով փոխհատուցմանը։
Բացի այդ, Ա. Անդրեասյանը նկատել է, որ "Ձյունիկ Սարարան" սառնարանային պահեստում իրենց արտադրանքը պահած բոլոր ձեռնարկություններն ունեն վարկեր, վարկային գծեր: "Կարող է կառավարությունը դիմել Կենտրոնական բանկին ՝ առաջարկելով բանկերին կոչ անել անորոշ ժամանակով սառեցնել վարկերի տոկոսավճարները կամ նվազեցնել դրանք։ Մենք՝ գործարարներս, հիմա ուղղակի սպասում ենք և չգիտենք՝ կառավարությունից աջակցություն կստանանք, թե ոչ", - ասել է նա։ Ա.Անդրեասյանը նաև նշել է, որ յուրաքանչյուր ամիս այդ ձեռնարկությունները մոտ 2 մլրդ դրամ են վճարում մաքսային և հարկային մարմիններին:
Տեղի ունեցածի համար պատասխանատվությունը, ըստ գործարարի, կրում է "Ձյունիկ սառնարան" ՍՊԸ-ն, համաձայն պայմանագրի, որով վերջինս տուժած կողմերին պետք է փոխհատուցի փչացած արտադրանքի ինքնարժեքին հավասար գումար: Սակայն "Ձյունիկ սառնարան" ՍՊԸ-ն, ըստ նրա, արդեն մի քանի ամիս է ՝ սնանկացման եզրին է։ "Ձեռնարկության շենքն այսօր գրավադրված է բանկում։ Նրանք ոչինչ չունեն մեր կորուստները փոխհատուցելու համար", - ընդգծել է նա։
Վերջում գործարարը դիմել է վարչապետ Նիկոլ Փաշինյանին՝ խնդրելով պարզել իրավիճակը։ "Մենք ցանկանում ենք իմանալ ճշմարտությունը, ի՞ն պատճառով է հրդեհ բռնկվել: Գուցե մենք խանգարու՞մ էինք շուկային ",- եզրափակել է նա:
Հիշեցնենք, որ օգոստոսի 19-ին հրդեհ էր բռնկվել "Ձյունիկ սառնարանում"։ Ինչպես լրագրողների հետ զրույցում հայտարարել Է արտակարգ իրավիճակների նախարար Ֆելիքս Ցոլակյանը, հրդեհի մարման ողջ բարդությունն առնչվում էր հենց շենքին։ "Այս շենքում գրեթե չկան պատուհաններ, պատերը, իրենց հերթին, շատ հաստ են, որոնք հավաքված են թեթեւ նյութերից, որոնք պատված են ցեմենտով։ Այսպիսով, կրակը տարածվեց պատերով", - ընդգծել է Ֆ.Ցոլակյանը։ ՀՀ ԱԻՆ աշխատակիցների ջանքերի շնորհիվ կրակից հաջողվել է դուրս բերել պահեստում պահվող տարբեր ապրանքների միայն մի մասը: Տեղում աշխատել է ՀՀ ԱԻՆ 12 մարտական հաշվարկ: Հրդեհը մարելու գործողությունը տեղի է ունեցել ՀՀ արտակարգ իրավիճակների նախարարի անձնական վերահսկողության ներքո: