Արմինֆո.Հայաստանի Հանրապետության նախագահ Արմեն Սարգսյանը Մանչեսթերում հանդիպել է Անգլիայի պրեմիեր լիգայի 2018/19 մրցաշրջանի չեմպիոն «Մանչեսթեր Սիթի» ֆուտբոլային ակումբի նախագահ, աշխարհի խոշորագույն ներդրումային ընկերություններից մեկի՝ ՄՈՒԲԱԴԱԼԱ-ի ղեկավար Քալդուն Խալիֆա Ալ Մուբարաքի հետ։
Ինչպես ԱրմԻնֆո-ին հաղորդեցին ՀՀ նախագահի աշխատակազմից, հանդիպման ընթացքում քննարկվել են ՄՈՒԲԱԴԱԼԱ ընկերության հետ համագործակցության հեռանկարները և ընկերության կողմից Հայաստանում ներդրումային ծրագրեր իրականացնելու հնարավորությունները։ ՄՈՒԲԱԴԱԼԱ ներդրումային ընկերությունը հիմնականում գործունեություն է ծավալում բարձր տեխնոլոգիաների, հեռահաղորդակցության, էներգետիկայի, առողջապահության, անշարժ գույքի, ենթակառուցվածքների, կրթության, գիտության ոլորտներում։
Քալդուն Ալ Մուբարաքը նախագահ Արմեն Սարգսյանին ներկայացրել է նաև The City Football Group հոլդինգի գործունեությունը, ում էլ պատկանում է անգլիական «Մանչեսթեր Սիթի» ակումբը։ Այս համատեքստում քննարկվել են նաև Հայաստանում ֆուտբոլի զարգացմանն ուղղված ծրագրերի իրականացման հնարավորությունները։
Հանրապետության նախագահը նաև շրջայց է կատարել «Մանչեսթեր Սիթի»-ի ակադեմիայում, ծանոթացել ակումբի տարբեր տարիքային խմբերի մարզական ծրագրերին։ Քալդուն Ալ Մուբարաքի հրավերով նախագահ Սարգսյանը մարզադաշտում դիտել է անգլիական պրեմիեր լիգայի «Մանչեսթեր Սիթի»-«Տոտենհեմ» հանդիպումը։
Հավելենք, որ ՄՈՒԲԱԴԱԼԱ-ն ակտիվ եւ նորարարական ներդրող է, որը Արաբական Միացյալ Էմիրությունների համար շահույթով կապիտալ է ներդնում աշխարհի տարբեր ակտիվներում: Ընկերությունը ռազմավարական ֆինանսական ներդրումներ է իրականացնում ողջ աշխարհում, տնտեսության այն ճյուղերում, որոնք կարող են օգտագործել մրցակցային առավելությունները պրոֆեսիոնալիզմը, ֆինանսական հնարավորությունները, գոյություն ունեցող ներդրումային պորտֆելի և կապի մասշտաբները աշխարհի բոլոր անկյուններում, որոնք մեծ նշանակություն ունեն երկարաժամկետ հեռանկարում և դրականորեն են ազդում տնտեսության և սոցիալական ոլորտի վրա ԱՄԷ - ում և արտասահմանում: ՄՈՒԲԱԴԱԼԱ-ի հաճախորդների թվում են ավիատիեզերական արդյունաբերության, գյուղատնտեսության, ICT, կիսահաղորդչների արտադրության, մետալուրգիայի եւ հանքարդյունաբերության, դեղագործության եւ բժշկական տեխնիկայի արտադրության, վերականգնվող աղբյուրների էներգետիկայի եւ էլեկտրաէներգետիկայի ոլորտների համաշխարհային առաջատար արտադրողներ, ինչպես նաեւ դիվերսիֆիկացված ֆինանսական հոլդինգներ:
Ընկերության ակտիվների ընդհանուր արժեքը գնահատվում է 225 մլրդ դոլար: ՄՈՒԲԱԴԱԼԱ-ն ունի 50-ից ավելի գործող ներդրումային նախագծեր՝ աշխարհի 50 երկրներում: