Չորեքշաբթի, 14 Օգոստոսի 2019 13:22

Արմինֆո. Այս շաբաթ Հայաստանում կբացվի Ուրուգվայի գլխավոր հյուպատոսությունը։ Այդ մասին հայտարարել է Հայաստանի արտգործնախարար Զոհրաբ Մնացականյանը՝ օգոստոսի 14-ին պաշտոնական այցով Երեւանում գտնվող Ուրուգվայի իր պշատոնակից Ռոդոլֆո Նին Նովոայի հետ համատեղ մամուլի ասուլիսի ժամանակ։

Զոհրաբ Մնացականյանը հավելել է, որ գլխավոր հյուպատոսության բացումը ևս մեկ անգամ վկայում է երկու երկրների միջև ձևավորված հարաբերությունների բարձր մակարդակի մասին։  "Ուրուգվայը ՀՀ կարևոր և վստահելի գործընկերն է: Դա մի երկիր է, որը դեռեւս 1965 թվականին ճանաչել է Հայոց ցեղասպանությունը Օսմանյան կայսրությունում, իսկ հետո եւս մեկ անգամ 2004 թվականին ամրապնդել է իր հավատարմությունը այդ հարցին", - նշել է ՀՀ ԱԳՆ ղեկավարը: Միեւնույն ժամանակ, Հայաստանի նախարարը փաստել է, որ երկու երկրներն ակտիվորեն համագործակցում են միջազգային հարթակներում, հատկապես, մարդկության դեմ նոր հանցագործությունների կանխարգելման հարցում: Զոհրաբ Մնացականյանը կարևորել է Ուրուգվայում շուրջ 20 հազարանոց հայ համայնքի դերը երկկողմ հարաբերությունների կառուցման և ամրապնդման գործում:

 

Հայաստանի ԱԳՆ ղեկավարը նաև հայտարարել է Մոնտեվիդեոյի հետ համագործակցությունը բոլոր հնարավոր ուղղություններով ամրապնդելու Երեւանի պատրաստակամության մասին, այդ համատեքստում առաջարկելով ստեղծել հարթակ, որը կնպաստի երկու երկրների միջեւ փոխգործակցության ամրապնդմանը' պետությունների զարգացման վեկտորին համահունչ:

 

Մնացականյանը նաև տեղեկացրել է, որ Նովոային մանրամասն պատմել է Լեռնային Ղարաբաղի հակամարտության կարգավորման վերաբերյալ Հայաստանի մոտեցումների և սկզբունքների մասին ՝ մեկ անգամ ևս ընդգծելով Արցախի բնակչության անվտանգության ապահովման կարևորությունը և դրանից բխող Լեռնային Ղարաբաղի կարգավիճակը: Նա եւս մեկ անգամ ընդգծել է այն կարեւորությունը, որ հայկական կողմը տալիս է բանակցային գործընթացին, եւ մատնանշել է խնդրի խաղաղ կարգավորման նկատմամբ այլընտրանքի բացակայությունը:

 

Ուրուգվայի ԱԳ նախարարն, իր հերթին, ընդգծել է, որ իր երկիրը հանդես է գալիս խաղաղության եւ միջազգային անվտանգության օգտին: "Մենք պաշտպանում ենք հակամարտության խաղաղ կարգավորումը գոյություն ունեցող ձևաչափի շրջանակներում ՝ միջազգային ձևաչափի հիման վրա, որը տրվել է դեռևս 1995 թվականին և ՄԱԿ-ի սկզբունքների շրջանակներում ։  Խաղաղ գործընթացի նկատմամբ այլընտրանք չկա", - ասել է Ուրուգվայի արտգործնախարարը։

 

Նա նաև խոսել է Ուրուգվայի հայ համայնքի ակտիվ դերակատարության մասին, որը, չմոռանալով պատմական հայրենիքը, ակտիվորեն ներգրավված է երկրի հասարակական-քաղաքական կյանքում, որտեղ ապրում է: Նովոան անդրադարձել է նաև երկու երկրների հարաբերություններին և արձանագրել, որ դիվանագիտական հարաբերությունների հաստատման 27 տարիների ընթացքում երկու երկրների միջև փոխգործակցությունն այնքան է ամրապնդվել, որ արդեն այս շաբաթ ՀՀ-ում կբացվի Ուրուգվայի հյուպատոսություն:  "Այս դիվանագիտական կետի բացումը մեր համագործակցության շարունակական ամրապնդման և խորացման կարևոր վկայությունն է ։  Մենք ունենք մի շարք ուղղություններ, որոնցով կարող ենք համագործակցել։ Մենք պատրաստ ենք Հայաստանի հետ կիսել  հանրային ծառայությունների ոլորտում ունեցած մեր փորձը։  Բացի այդ, ես հանդիպելու եմ ՀՀ առողջապահության նախարարի հետ, և մենք ներկայացնելու ենք մեր հաջող փորձն այդ ուղղությամբ", - ասել է Ուրուգվայի գլխավոր դիվանագետը ՝ մատնանշելով մի շարք ուղղություններով փոխգործակցության լուրջ ներուժի առկայությունը։