Արմինֆո. Եվրոպայի խորհուրդը պատրաստ է աջակցել Հայաստանին դատաիրավական ոլորտում կարեւոր բարեփոխումների իրականացման ճանապարհին: Այդ մասին հունիսի 17-ին Երեւանում 2019-2022 թթ.համագործակցության ծրագրի մեկնարկին հայտարարել է ԵԽ գլխավոր քարտուղարի տեղակալ Գաբրիելա Բատաինի-Դրագոնը։
"ԵԽ նախարարների կոմիտեն ուշադիր հետեւում է Հայաստանում կարեւոր ժողովրդավարական բարեփոխումներին եւ աջակցում է առաջընթացին։ Մասնավորապես, դատական համակարգի թափանցիկության բարձրացման, քրեական նոր օրենսգրքի և Քրեադատավարական օրենսգրքի ընդունման, կոռուպցիայի դեմ պայքարի նոր կառույցների ստեղծման հարցում", - ասել է նա և այդ համատեքստում հիշեցրել, որ նախորդ ծրագրի իրականացումը նպաստել է իրավական ոլորտում առաջընթացի ձեռքբերմանը, իսկ սահմանադրական բարեփոխումները հաջող համագործակցության օրինակ են: Դրա հետ մեկտեղ, նրա խոսքով, ամրապնդվել են զինված ուժերում մարդու իրավունքները, քայլեր են ձեռնարկվել բարձրագույն կրթության ոլորտում կոռուպցիայի դեմ պայքարի ուղղությամբ, խորանում է ընտանեկան բռնության դեմ պայքարը: "Եվ մենք վստահ ենք, որ կարող ենք առաջ շարժվել և հասնել ավելիին ։ Ծրագրի նպատակն է մեծ հաջողությունների հասնել ներպետական բարեփոխումների իրականացման գործում", - նշել է ԵԽ գլխավոր քարտուղարի տեղակալը, հավելելով, որ Հայաստանի գործող կառավարության առաջնահերթության մեջ բարեփոխումներ են այնպիսի ուղղություններով, ինչպիսիք են դատական համակարգը եւ կոռուպցիայի դեմ պայքարը։
Նա փաստել է, որ ծրագրի բյուջեն կազմում է շուրջ 19 մլն եվրո, ընդ որում, գումարի 57 տոկոսն ապահովվել է Ավստրիայից, Գերմանիայից, Իռլանդիայից, Լիխտենշտեյնից, Շվեդիայից, Շվեյցարիայից, Մեծ Բրիտանիայից կամավոր մուծումների շնորհիվ: "Մենք ողջունում ենք Հայաստանի ջանքերը բարեփոխումների իրականացման, ժողովրդավարական արժեքների ամրապնդման ուղղությամբ։ Բայց դրա համար կարևոր է սերտ փոխգործակցությունը։ Շատ կարևոր է նաև բացահայտ խոսել այն արատների մասին, որոնք դեռևս հաղթահարված չեն։ Այս քայլն արվել է վարչապետ Փաշինյանի կողմից ընթացիկ տարվա ապրիլին, երբ նա հնչեցրել էր իշխանության ապակենտրոնացման, կոռուպցիայի վերացման, անկախ դատական համակարգի ապահովման անհրաժեշտությունը: ԵԽ-ն պատրաստ է աջակցել Հայաստանին այդ ուղղություններով։ Մենք պատրաստ ենք փոխել համագործակցության վեկտորը Հայաստանի իշխանությունների դիմումի հիման վրա", - նշել է Բատաինի-Դրագոնը, հավելելով, որ ԵԽ փորձագետների պատվիրակությունն այցելել է Հայաստան, եւ այժմ նրանք կոնկրետ առաջարկներ են պատրաստում երկրի իշխանություններին հուզող հարցերի վերաբերյալ, եւ դրանցից մի քանիսն արդեն ներկայացված են: Առաջարկները պետք է համահունչ լինեն Սահմանադրությանը եւ միջազգային պարտավորություններին ։ Մենք պատրաստ ենք լինել ուղեցույց կարևոր բարեփոխումների ճանապարհին", - ամփոփել է ԵԽ գլխավոր քարտուղարի տեղակալը