Հինգշաբթի, 18 Ապրիլի 2019 17:27

Արմինֆո.ՙՉեմ կարող ասել, թե ում եմ խանգարում, բայց ասեմ, որ փորձ է արվում զգացմունքային իրավիճակ ստեղծել, թե, իբր, ես դեմ եմ հանդես գալիս վարչապետին՚, - ապրիլի 18-ին լրագրողների հետ զրույցում հայտարարել է Պետական վերահսկողական ծառայության ղեկավար Դավիթ Սանասարյանը:

 

Ավելի վաղ մամուլում տեղեկություն էր հայտնվել այն մասին, որ ՊՎԾ ղեկավարը որպես կասկածյալ է ներգրավվել իրեն վստահված գերատեսչության աշխատակիցների նկատմամբ հարուցված քրեական գործով: Որպես խափանման միջոց ընտրվել է չհեռանալու մասին ստորագրությունը: Հաղորդվում է նաև, որ առերեսում է անցկացվել Սանասարյանի և նրա գերատեսչության աշխատակից Սամվել Ադյանի միջև։  Ինչպես նշվում է ԶԼՄ-ներում, իշխանություններն արդեն Սանասարյանին փոխարինող են գտել։  

 

Պետական վերահսկողական ծառայության ղեկավարի ասելով, ոչ մի քննչական մարմին չի համարձակվի խաչ քաշել երկրի առջեւ իր  ունեցած վաստակի կամ իր բարի անվան վրա: ՙՈչ մի կառույց չի կարող իմ անունը կապել որևէ կոռուպցիոն երևույթի հետ, քանի որ ես սկզբունքորեն չեմ հանդուրժում կոռուպցիան՚, - հավաստիացրել է նա: Դավիթ Սանասարյանը հաստատել է, որ ցուցմունք է տվել, սակայն չի նշել, թե ինչ դատավարական կարգավիճակում է, եւ արդյոք նրա տեղաշարժի ազատությունը սահմանափակված է:  Նա կոչ է արել նման հարցով դիմել ԱԱԾ։  Նա հայտնել է, որ այսօր իրեն զբաղեցրած պաշտոնից ժամանակավոր հեռացման հարց չի դրվում։ Այնուամենայնիվ, Սանասարյանը նշել է, որ մի շարք կառույցներ փորձում են այդ կերպ  իրեն տրամադրել կառավարության ղեկավարի դեմ, սակայն ինքը վստահում է վարչապետին։ ՙՉեմ հավատում, որ նա կարող է իմ նկատմամբ քաղաքական հետապնդում իրականացնել՚, - հայտարարել է Սանասարյանը,  ընդգծելով, որ հակառակ դեպքում հրաժարական կտար:

 

Անդրադառնալով այն հարցին, թե ով կարող է շահագրգռված լինել դրանում, Դավիթ Սանասարյանն ասել է, որ ձեռնպահ կմնա անուններ նշելուց: ՙԲայց նշեմ, որ ՊՎԾ-ն իր օրինական լիազորությունների շրջանակներում շատերի ոտքերը կարող է տրորել: Դրանից ելնելով՝ շատերը չեն ցանկանում այդ պաշտոնում տեսնել սկզբունքային մարդու, որն իրեն ոչնչով չի արատավորել՚, - ընդգծել է նա։

 

Ընդ որում, պատասխանելով այն հարցին, թե արդյոք ՊՎԾ ղեկավարը տրորել է ԱԱԾ ոտքը, նա նշել է, այսօր իր կասկածների մասին չի խոսի։  Նա խոստացել է դրանց անդրադառնալ, երբ համոզվի դրանց համակարգային բնույթի մեջ։

 

Հիշեցնենք, որ հեմոդիալիզի համար սարքավորումների ձեռք բերման մրցույթների վերաբերյալ գործի շրջանակներում ԱԱԾ-ն ավելի վաղ կալանավորել էր ՊՎԾ գնումների վերահսկողության վարչության պետ Սամվել Ադյանին, նույն վարչության գլխավոր մասնագետ Գեւորգ Խաչատրյանին եւ ՙԶորաշեն՚ ՍՊԸ հաշվապահ Տարոն Ավետիսյանին: Ավելի ուշ Գևորգ Խաչատրյանն ազատ է արձակվել կալանքից, նրա նկատմամբ որպես խափանման միջոց է ընտրվել չհեռանալու մասին ստորագրությունը:

Ըստ ԱԱԾ-ի, Սամվել Ադյանը և Գեւորգ Խաչատրյանը, նախնական համաձայնության գալով, անձնական շահագրգռվածությունից ելնելով, հակառակ ծառայության շահերին, օգտագործելով իրենց ծառայողական դիրքը, 2018-2019 թվականների ընթացքում ապօրինի կերպով միջամտել են ՀՀ առողջապահության նախարարության եւ մի շարք բժշկական կենտրոնների համար անհրաժեշտ բժշկական սարքավորումների ձեռք բերման նպատակով վերահսկվող օբյեկտների կազմակերպված գնումների ընթացակարգերին՝ հայտարարված մրցույթներում  իրենց կողմից հովանավորվող առևտրային կազմակերպությունների հաղթանակը ապահովելու նպատակով։  Իսկ ՊՎԾ ղեկավար Դավիթ Սանասարյանն այն ժամանակ լրագրողների հետ զրույցում ասել էր, որ կալանավորված աշխատակիցները որակավորված մասնագետներ են, բայց եթե նրանց մեղքն ապացուցվի, նրանք պետք է պատժվեն: ՊՎԾ աշխատակիցները մեղադրվում են մի խումբ անձանց հետ նախնական համաձայնությամբ պաշտոնեական լիազորությունները չարաշահելու համար, ինչը հանգեցրել է ծանր հետեւանքների: Պաշտոնյաներն իրենց առաջադրված մեղադրանքը չեն ընդունում և պնդում են, որ օրենքի շրջանակներում պայքարել են մենաշնորհի դեմ։