Արմինֆո. Քանի դեռ ղարաբաղյան հակամարտությունը կարգավորված չէ, ոչ մի բանակցություն չի կարող հարյուր տոկոսով արդյունավետ համարվել։ Այդ մասին լրագրողների հետ զրույցում հայտարարել է վարչապետ Նիկոլ Փաշինյանը՝ ամփոփելով ԱԺ-ում ղարաբաղյան խնդրի շուրջ փակ քննարկումների արդյունքը։
Ընդ որում, նա ընդգծել է, որ լիովին կիսում է Մինսկի միջնորդների եւ Հայաստանի ու Ադրբեջանի արտգործնախարարների հայտարարության մեջ արտացոլված մոտեցումներն այն մասին, որ կողմերի Վիեննայի հանդիպումներն անցել են կառուցողական եւ դրական մթնոլորտում: Նա նշել է, որ հումանիտար գործողությունների վերաբերյալ ձեռք բերված պայմանավորվածությունների շրջանակներում կողմերը փոխհամաձայնության են հանգել՝ թույլ տալ սահմանամերձ գյուղերի բնակիչներին խաղաղ պայմաններում գյուղատնտեսական աշխատանքներ իրականացնել: ՙՄենք պատրաստ ենք կատարել այդ պայմանավորվածությունը, եթե դա անի նաև Ադրբեջանը՚, - նշել է վարչապետը, հավելելով, որ պայմանավորվածություն կա նաև երկու երկրներում գերության մեջ գտնվող անձանց հարազատների այցելության մասին։ ՙԲայց դա այնպիսի հարց է, որ կախված է հենց հարազատներից, արդյոք նրանք այդ կցանկանան, ինքներդ եք հասկանում՚, - նշել է վարչապետը։
Բայց ամենագլխավորը, ընդգծել է նա լրագրողների հետ զրույցում, անհրաժեշտ է արձանագրել մեկ ճշմարտություն. ՙԵս բանակցություն եմ վարում ոչ թե այն կետից, որի վրա կանգ է առել Սերժ Սարգսյանը, այլ սկսում եմ իմ, նոր կետից՚:
Կրկին անդրադառնալով ՀՀ պաշտպանության նախարար Դավիթ Տոնոյանի՝ ՙնոր պատերազմ հանուն նոր տարածքների՚ սկզբունքի իրագործման մասին հայտարարությանը՝ Փաշինյանը այն համարել է միանգամայն տրամաբանական և Մինսկի միջնորդների հայտարարության մեջ ներգրվող: ՙՏոնոյանն ընդամենը ուզում էր ասել, որ պետք չէ մեզ վախեցնել պատերազմով, մենք դրանից չենք վախենում։ Եթե ինչ-որ մեկը կարծում է, թե պատերազմի դեպքում մենք կհանձնվենք, ապա այդ մարդն ուղղակի միամիտ է։ Մենք պատերազմ չենք ուզում, մենք ցանկանում ենք ղարաբաղյան հակամարտության խաղաղ կարգավորման, մենք խաղաղություն ենք ուզում, մենք ուզում ենք հաշտության օրակարգի առաջ մղում, եւ մենք պատրաստ ենք քայլեր կատարել այդ ուղղությամբ: Բայց խաղաղության մասին մեր հայտարարությունները չեն նշանակում, որ մենք վախենում ենք պատերազմից։ Պատերազմից վախենալու հիմքեր կան որքան մեզ մոտ, այնքան էլ Ադրբեջանում, այնքան էլ տարածաշրջանի մյուս երկրներում, քանի որ, պատերազմի ժամանակ փլավ չեն բաժանում՚, - հայտարարել է Փաշինյանը։
Նա նաեւ ընդգծել է, որ եթե որեւէ մեկը հայկական կողմին պարտադրի պատերազմ, նա կփորձի խաղաղություն պարտադրել: ՙԴա մեր պատերազմը չի լինի, մենք այն չենք սկսի, բայց եթե ինչ-որ մեկը ռազմական գործողություններ է նախաձեռնում, ապա մենք նրան կպարտադրենք մեր խաղաղությունը։ Սակայն, որպեսզի պատերազմ չլինի, պետք չէ անընդհատ խոսել դրա մասին՝ յուրաքանչյուր հանդիպումից հետո։ Երբ մենք խոսում ենք պատերազմի մասին, մենք ցույց ենք տալիս մեր հավատարմությունը խաղաղությանը, բանակցություններին՚, - արձանագրել է վարչապետը, ընդգծելով, որ Վիեննայում կողմերը պայմանավորվել են պահպանել եւ ամրապնդել հրադադարի ռեժիմը։ Նրա ասելով, հայկական կողմը մտադիր չէ խախտել այդ պայմանավորվածությունը: ՙՀուսով եմ, որ դա չի անի նաեւ Ադրբեջանի ղեկավարը՚:
ՙԲայց մեկ անգամ ևս ասում եմ. պետք չէ խաղաղության հանդեպ մեր նվիրվածությունը
ընկալել որպես թուլություն կամ պատերազմին անպատրաստություն։ Մենք կգործենք իրավիճակին համաչափ՝ չնայած մենք տրամադրված ենք կառուցողական հունի։ Մենք ուզում ենք, որ մեզ լսեն, և մենք պատրաստ ենք լսել։ Եթե մեր գործընկերները ինչ - որ հարցի առնչությամբ գտնեն, որ մեր դիրքորոշումը շատ կոշտ է, մենք պատրաստ կլինենք ավելի ճկուն դիրքորոշում դրսևորել, բայց դա պետք է լինի երկկողմ գործընթաց՚, - ամփոփել է վարչապետը։