Արմինֆո. Այժմ հայ հասարակությանը հուզող հիմնական խնդիրներն են գործազրկությունը, արտագաղթը, ցածր բազային կենսաթոշակներն ու աշխատավարձերը` աճող ինֆլյացիայի ֆոնին, որոնց լուծումը ժողովուրդն ակնկալում է նոր իշխանություններից:
ԱրմԻնֆո-ի թղթակցի հետ զրույցում այդպիսի կարծիք է հայտնել «Ինտեգրացիա և զարգացում՚ հետազոտական-վերլուծական հասարակական կազմակերպության ղեկավար, եվրասիական փորձագիտական ակումբի համակարգող Արամ Սաֆարյանը` հիմնվելով ակումբի փորձագետների պատրաստած «Հայաստանը նոր պայմաններում՚ հետազոտական զեկույցի տվյալների վրա:
Բացի այդ, նրա ասելով, հասարակությունն իշխանություններից ակնկալում է կոռուպցիայի դեմ անզիջում պայքար, նախկին այն պաշտոնյաների խստագույն պատժի ենթարկում, որոնք ապօրինի հրաստացել են պաշտոնեական լիազորությունների չարաշահման և կաշառակերության հաշվին, և օրենքի շրջանցմամբ նրանց կուտակած միջոցների վերադարձ երկրի տնտեսություն` հետագայում մուլտիպլիկատիվ արդյունք ստանալու նպատակով: Ընդ որում, ինչպես կարծում է փորձագետը, հայ հասարակությունը վենդետա չի ուզում:
Այդուհանդերձ, ինչպես նշել է Սաֆարյանը, վարչապետի պաշտոնակատար Նիկոլ Փաշինյանի ամանորյա ուղերձը ցույց տվեց, որ նոր իշխանությունը գիտակցում է հասարակությունից բխող այդ ազդակները, հասկանում է, որ կարգախոսների և հեղափոխությունների ժամանակն ավարտվել է դեկտեմբերի 9-ին կայացած արտահերթ խորհրդարանական ընտրություններով, և այժմ եկել է քաղաքացիական համախմբման ժամանակը` իրական և խորքային բարեփոխումներ իրագործելու նպատակով: «Ինչպես ցույց են տվել մեր հետազոտությունները, հասարակությունն այժմ պատրաստ է լիովին աջակցելու իշխանություններին այդ բարեփոխումների իրագործման և սոցիալ-տնտեսական խնդիրների լուծման գործում: Դժվար է ասել, թե այսօրվա իշխանությունը դեռ որքան ժամանակ կվայելի հասարակության այդպիսի տրամադրվածությունը: Սակայն, մենք կարծում ենք, որ դա կտևի առնվազն երկու տարի: Այսինքն, իշխանությունները երկու տարի ունեն գործելու համար: Սակայն այդ երկու տարում իշխանությունը պետք է դրսևորի իր իրավասությունը, ոչ միայն ազնվությունն ու պարկեշտությունը, մաքուր ձեռքերով աշխատելու ձգտումը, այլև պրոֆեսիոնալիզմն ու գործունությունը՚, - հայտարարել է նա, հիշեցնելով, որ 2018 թվականի վերջին երկու եռամսյակների ցուցանիշները ցույց են տվել, որ քաղաքական գործընթացներն ազզդել են տնտեսական աճի տեմպերի վրա, փոքր-ինչ դանդաղեցնելով դրանք, ինչը, ըստ էության, օբյեկտիվ, սակայն, տագնապալի երևույթ է:
Ուստի, նա ընդգծել է, որ 2019 թվականը պետք է դառնա տնտեսական և քաղաքական կայունության տարի, նախադրյալներ ստեղծի ներդրումներ ներգրավելու համար: «Իհարկե, դա դյուրին գործընթաց չէ, Սփյուռքի գործարարները դեռ հետևում են երկրում առկա իրավիճակին` ձեռնպահ մնալով իրական նախագծերի իրականացումից: Նրանք սպասում են իշխանությունների որոշակի գործողությունների, կայունության և գործընթացների կանխատեսելիության հաստատման: 2017 թվականին և 2018 թվականի սկզբին կառավարության ձեռնարկած միջոցները պայմաններ էին ստեղծել հետագա տնտեսական աճի համար, որն ի զորու կլիներ փոքր-ինչ բարելավել հասարակության բարեկեցությունը և նվազեցնել արտգագաղթի տեմպերը: Դժբախտաբար, 2018 թվականի երկրորդ կիսամյակում այդ տեմպերը նվազեցին: Եվ կառավարության հիմնական խնդիրը պետք է լինի այդ տեմպերի վերականգնումը 2019 թվականին: Եվրասիական փորձագիտական ակումբը կարծում է, որ եթե Հայաստանին հաջողվի արձանագրել ՀՆԱ 7 տոկոս աճ, ապա 7-10 տարում երկիրը կարող է «դուրս թռչել՚ աղքատ պետությունների ցուցակից և համալրել զարգացող տնտեսությունների ցուցակը՚, - հայտարարել է Սաֆարյանը:
Ամփոփելով` նա ընդգծել է, որ հասարակությունը դրական ակնկալիքներ ունի նոր խորհրդարանից և կառավարությունից: