Արմինֆո. Հայաստանի հանրապետական կուսակցությունը դեռ չի քննարկել հարցը՝ կմասնակցի արդյոք վաղաժամկետ ընտրություններին, թե ոչ: Այդ մասին ԱրմԻնֆո-ի թղթակցի հետ զրույցում հայտարարել է ԱԺ փոխնախագահ, ՀՀԿ մամուլի քարտուղար Էդուարդ Շարմազանովը:
Փոխխոսնակը հայտարարել է, սակայն, որ, իր կարծիքով, կուսակցությունը պետք է մասնակցի վաղաժամկետ խորհրդարանական ընտրություններին: <Կարծում եմ, որ ՀՀԿ-ն ասելու և անելու բան ունի Հայաստանի քաղաքական ասպարեզում: Ընտրություններին չմասնակցել կարող է միայն այն քաղաքական ուժը, որն անելու բան չունի քաղաքականությունում, բայց ոչ մեր դեպքում: Անկախ այն բանից, թե նպաստավոր պահի տեղի կունենան ընտրությունները, թե ոչ, կարծում եմ, որ մենք պարտավոր ենք մասնակցել դրանց>,- հայտարարել է Շարմազանովը:
ՀՀԿ մամուլի քարտուղարն ընդգծել է, որ կուսակցությունն ունի ուժեղ և կազմակերպված թիմ և, իհարկե, կողմնակիցներ: < Ես անպայման իմ տեսակետը կհայտնեմ քննարկումների ժամանակ: ՀՀԿ-ում քննարկումների ամսաթվի մասին մենք անպայման կհայտարարենք: Մեզ մնում է միայն ծրագիր գրել և դրանով հանդես գալ վաղաժամկետ ընտրություններում>,- ընդգծել է փոխխոսնակը:
Ինչ վերաբերում է կուսակցության շանսերին, այս հարցում ևս Շարմազանովը լավատեսորեն է տրամադրված: <Մենք ունենք նույն շանսերը, ինչ <Լույս> դաշինքը, <Բարգավաճ Հայաստանը>, <Սասնա ծռեր> կուսակցությունը, Հայ ազգային կոնգրեսը և մյուսները: Մենք կներկայացնենք մեր ծրագիրը և կտեսնենք, թե ինչպես Հայաստանի բնակիչները կընդունեն այն: Վերջին հաշվով ամեն բան որոշում են մեր երկրի քաղաքացիները: Որքանով նրանք հավանություն կտան մեր ծրագրին, այնքանով մենք ներկայացված կլինենք Ազգային ժողովում>,- ասել է ՀՀԿ մամուլի քարտուղարը:
<Ծառուկյան դաշինք> խմբակցության անդամ, Գագիկ Ծառուկյանի մամուլի քարտուղար Իվետա Տոնոյանը հայտարարել է, որ <Բարգավաճ Հայաստանը> անպայման կմասնակցի վաղաժամկետ ընտրություններին: <Մենք դեռ չենք քննարկել՝ ընտրություններին կմասնակցենք <Բարգավաճ Հայաստան> կուսակցության շրջանակներում, թե դաշինքով, բայց մենք անպայման կմասնակցենք դրանց: Ավելին, ուզում եմ նշել, որ կուսակցության ղեկավար Գագիկ Ծառուկյանն արդեն հրահանգներ է տվել ԲՀԿ մարզային կառույցներին՝ խորհրդարանական ընտրություններին նախապատրաստական աշխատանքներ սկսել>,- նշել է Տոնոյանը: Պատգամավորը ընդգծել է նաև, որ առաջիկա խորհրդարանական ընտրուրթյունները ստեղծում են մրցակցային լավ միջավայր, և բոլորն իրենց ուժերը դրսևորելու լավ հնարավորություն ունեն: Ինչ վերաբերում է կուսակցության ներկայացուցիչների սպասումներին, Տոնոյանը հայտարարել է. <Ամեն ինչ մեր քաղաքացիների ձեռքում է: Նրանց դիրքորոշումից է կախված Ազգային ժողովում մեր ներկայացվածությունը>,- ասել է պատգամավորը:
<Լուսավոր Հայաստան> կուսակցության ղեկավար, <Ելք> խորհրդարանական խմբակցության պատգամավոր Էդմոն Մարուքյանը նշել է, որ իրենք մասնակցելու են վաղաժամկետ խորհրդարանական ընտրություններին: Ավելին, իր ներկայացրած կուսակցությունը և <Հանրապետություն> կուսակցությունը հանդես կգան <Լույս> դաշինքի կազմում: Նա ընդգծել է, որ հեղափոխությունից և Երևանի ավագանու ընտրություններից հետո ակնհայտ է դարձել, որ Ազգային ժողովը ժողովրդի կամքը չի արտահայտում, այդ պատճառով նոր խորհրդարան ձևավորելու անհրաժեշտություն է առաջացել: <Մենք միշտ նշել ենք, որ ողջունում ենք վաղաժամկետ խորհրդարանական ընտրությունները: Մենք կարծում ենք, որ անհրաժեշտ է ձևավորել նոր խորհրդարան, որը կվայելի ժողովրդի սերն ու վստահությունը: Հուսով ենք, որ կկարողանանք ստեղծել նոր երկիր և կհասնենք դրա բարգավաճմանը և զարգացմանը>,- հայտարարել է պատգամավորը:
ՀՅԴ-ից պատգամավոր Ռուզաննա Առաքելյանն իր հերթին հայտարարել է, որ խորհրդարանական ընտրությունների շուրջ վարչապետ Նիկոլ Փաշինյանի հետ բանակցությունները դեռ շարունակվում են: <Կուսակցությունը չի շտապում չմտածված որոշումներ կայացնել: Ընդհանրապես մենք դեմ ենք չմտածված արագ որոշումներին և ընտրություններին>,- հայտարարել է նա:
<Սասնա ծռեր> կուսակցության ղեկավարներից մեկը՝ Վարուժան Ավետիսյանը, իր հերթին ԱրմԻնֆո-ի թղթակցի հետ զրույցում նշել է, որ կուսակցությունը մտադիր է մասնակցել վաղաժամկետ ընտրություններին: <Ավելին, մենք հուսով ենք, որ մեծամասնություն կստեղծենք խորհրդարանում>,- հավաստիացրել է Ավետիսյանը: Նա նշել է, որ դեռ չի քննարկվել կուսակցության՝ առանձին կամ դաշինքով մասնակցոթյան հարցը: <Մենք դեռ չենք հասցրել մանրամասն քննարկել այդ հարցը, բայց շուտով համապատասխան որոշում կկայացնենք>,- ընդգծել է Ավետիսյանը: Նա նաև նշել է, որ կուսակցության ներկայացուցիչները հույս ունեն, որ նոր խորհրդարանի ձևավորմամբ երկրում դեպի լավը փոփոխություններ տեղի կունենան: <Իհարկե, արմատական փոփոխությունները կայծակնային չեն լինում, դրանք աստիճանաբար են տեղի ունենում: Սակայն, վստահ եմ, որ ինչ-որ բան, այնուամենայնիվ, դեպի լավը կփոխվի>,- ընդգծել է Ավետիսյանը:
<Ժառանգություն> կուսակցության ներկայացուցիչ Արմեն Մերտիրոսյանը հայտարարել է, որ կուսակցությունը մտադիր է մասնակցել վաղաժամկետ ընտրություններին: <Մեր կուսակցությունը միշտ ողջունել է վաղաժամկետ ընտրությունների գաղափարը, և մենք մտադիր ենք դրանց մասնակցել: Իհարկե, դեռ չենք որոշել՝ կմասնակցենք առանձին, թե դաշինքով>,- հայտարարել է Մարտիրոսյանը: Նա նաև ընդգծել է, որ կուսակցության ղեկավարությունը հուսով է, որ վերջինիս ներկայացուցիչները կկարողանան իրենց գիտելիքներն ու ուժը ներդնել նոր և ավելի ուժեղ Հայաստան կառուցելու գործում: <Հուսով ենք, որ կմտնենք Ազգային ժողով, և կկարողանանք մեր ջանքերը ներդնել բոլոր ոլորտներում երկրի զարգացման համար>,- նշել է <Ժառանգության> ներկայացուցիչը:
ՀԱԿ մամուլի քարտուղար Արման Մուսինյանը նշել է, որ Հայ ազգային կոնգրեսի ներկայացուցիչները դեռ չեն քննարկել վաղաժամկետ խորհրդարանական ընտրություններին մասնակցության հարցը: <Այդ որոշումը պետք է կայացնի կուսակցության ղեկավար մարմինը: Մենք դեռ այդ թեմայով քննարկումներ չենք անցկացրել, բայց մոտ ժամանակներս անպայման կքննարկենք այդ հարցը>,- հայտարարել է Մուսինյանը՝ դժվարանալավ ասել, թե հատկապես երբ է կայանալու ղեկավար մարմնի նիստը: <Երբ անցկացնենք այդ նիստը, անպայման կհրապարակենք մեր որոշումը>,- ընդգծել է մամուլի քարտուղարը:
Նշենք, որ վարչապետ Նիկոլ Փաշինյանն ավելի վաղ հայտարարել էր, որ վաղաժամկետ խորհրդարանական ընտրությունները տեղի կունենան դեկտեմբերի 9-ին կամ 10-ին: