Երեթշաբթի, 11 Սեպտեմբերի 2018 19:26

Արմինֆո.<Այս ամիսների ընթացքում պարզ դարձավ մի բան. Հայաստանի նոր իշխանությունները ցանկանում են կառուցել ոչ թե ժողովրդավարական, բազմակարծության և խոսքի ազատության վրա հիմնված պետություն, այլ ամեն կերպ փորձում են սպանել ազատ խոսքը, բազմակարծությունը և ժողովրդավարությունը>: Այդ մասին այսօր խորհրդարանում հայտարարել է ԱԺ փոխնախագահ Էդուարդ Շարմազանովը:  

 

Նա նշել է, որ դրա վառ ապացույցը օգոստոսի 17-ի հանրահավաքն էր, որտեղ իշխանության ղեկավար Փաշինյանը մի ողջ սպառնալիքների և շանտաժի ալիք բարձրացրեց ընդդեմ իր ընդդիմախոսների, ինչու չէ նաև  պատգամավորների, դատարանների և անկախ փորձագետների, ովքեր հանդգնել էին կարծիք  արտահայտել,որը մերօրյա միապետի կարծիքին համահունչ չէր: <Եթե միջնադարում ասում էին՝ պետությունը ես եմ, ապա այսօրվա իշխանությունը ավելի հեռուն գնաց և ասում է՝ պետությունը իմն է:  Ակնհայտ է՝ երբ  իշխանությունը նեղն է ընկնում, երբ  նյարդային է դառնում, աջ ու ձախ սպառնում է՝օգնություն խնդրելով ԱԱԾ-ից: Ասել և ասում եմ՝ իշխանության համար կարևորը բարձր խոսելը չէ, այլ արդյունավետությունը: Հարց եմ տալիս՝ ու՞ր է թռիչքային զարգացումը, ու՞ր են նոր աշխատատեղերը, ու՞ր են նոր ներդրողները, ու՞ր է աղքատության նվազումը, ու՞ր է գների անկումը. ոչ մի բան չկա,զրո արդյունք:

Բանը հասել է նրան, որ իշխանության ղեկավարը՝ Փաշինյանը, սեփական աթոռը պահելու համար պատրաստ է գնալ Սահմանադրության փոփոխության կամ ինքնալուծարել այս  խորհրդարանը: Կրկնում եմ՝ Հայաստանում ցանկացած գործընթաց պետք է լինի միմիայն Սահմանադրության համապատասխան, և ըստ Սահմանադության՝ ոչ թե Ազգային ժողովն է հաշվետու կառավարությանը, այլ կառավարությունն ու վարչապետն են հաշվետու Ազգային ժողովին>,- ասել է փոխխոսնակը:

 

Շարմազանովը նաև նշել է, որ բազմաթիվ առիթներով իր մտահոգություններն է հայտնել զանգովի արդարադատության, քաղաքական պատվերի և հնարավոր վենդետայի վերաբերյալ: <Այսօր  համացանցում հրապարակվեց սենսացիոն ձայնագրություն: Մտահոգիչ է, իհարկե, որ ԱԱԾ և ՀՔԾ պետերի խոսակցությունը ձայնագրվում և գաղտնալսվում է: Եվ ես կարծում եմ, որ, այո՛,այստեղ  մենք պետք է պարզենք, թե ինչպես է դա հայտնվել: Բայց կրկնակի, եռակի, հազարապատիկ մտահոգիչ և խայտառակություն է ԱԱԾ պետի և ՀՔԾ պետի ձայնագրության բովանդակությունը: Փաշինյանը բազմիցս նշել է, որ ինքը չի միջամտում դատական համակարգին, ուժային կառույցները չեն միջամտում դատարանների աշխատանքին: Սակայն մենք տեսնում ենք, որ ըստ այդ ձայնագրության՝ դատավորը զանգում է ԱԱԾ պետին, վերջինս նշում է՝ ուզես-չուզես պետք է կալանք տաս: ՀՔԾ պետը ՀԱՊԿ գլխավոր քարտուղարի հետ կապված ԱԱԾ պետին հարցնում է՝ չփակե՞նք, քննարկեք հարցը վարչապետի հետ, ես ասել եմ վարչապետին: Հարց. ի՞նչ կապ ունի վարչապետը, բա ասում էր՝ ես կապ չունեմ, ոչ մի զանգովի արդարադատության չկա: Նույնիսկ ձայնագրության մեջ պահ կա, որտեղ նշվում է, որ  վարչապետն ասում է՝ փակեք: Սա ուղղակի խայտառակություն է, մարտարավեր Հայաստանի ժողովրդավարությանը և խոսքի ազատությանը, ինչպես նաև իշխանությունների տարանջատման սկզբունքին: Թող որևէ մեկը չփորձի մարտի մեկի հետ կապված ուշադրություն շեղել, ասել և ասում եմ՝մարտի մեկը պետք է բացահայտվի, բոլոր մեղավորները պատժվեն, բայց կոնկրետ հարց եմ տալիս՝գործադրիր ղեկավարը ի՞նչ իրավունք ունի հանձնարարական տալ՝ ում փակել և ում չփակել: Դրա համար կան համապատասխպան մարմիններ և օրենք:  Կոչ եմ անում Հայաստանի բոլոր քաղաքական ուժերին, ժողովրդավարական արժեքներ դավանող քաղաքացիներին, միջազգային կառույցներին հստակ  գնահատական տալ այս խայտառակությանը>,- ասել է Շարմազանովը:

 

Նշենք, որ համացանցում հայտնվել է ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի խոսակցության ձայնագրությունը: Նրանք 8 րոպե տևողությամբ խոսակցության ընթացքում քննարկում են Հայաստանի նախկին նախագահ Ռոբերտ Քոչարյանի հնարավոր ձերբակալությունը, ինչպես նաև ՀԱՊԿ գլխավոր քարտուղար Յուրի Խաչատուրովի և պաշտպանության նախկին նախարար Միքայել Հարությունյանի նկատմամբ հարուցված քրեական գործերը: Երեքն էլ, հիշեցնենք, մեղադրվում են 2008 թ. հետընտրական իրադարձությունների ժամանակ սահմանադրական կարգը տապալելու մեջ:

 

Դրանից հետո ՀՀ վարչապետ Նիկոլ Փաշինյանը Facebook-ի ուղիղ հեռարձակմամբ մեկնաբանել է գաղտնալսված զրույցի ձայնագրությունը:

<Իհարկե, կարելի է մեկնաբանել ողջ խոսակցությունը: Ասել, թե ինչ է ասվել և ինչու: Բայց խնդիրն այլ է: Ինչ-որ մեկը գաղտնալսել է ԱԱԾ տնօրենին, արդյո՞ք նա ուներ դրա օրինական իրավունքը>,-հարցրել է Փաշինյանը: Նրա խոսքով, խոսակցությունը կարող էր գաղտնալսվել քաղաքական սաբոտաժի նպատակով:

 

<Մարտի 1-ին մարդկանց սպանությունների համար բոլոր մեղավորները պետք է դատարանի առջև կանգնեն: Կոռուպցիոներներ Ռոբերտ Քոչարյան, Սերժ Սարգսյան, Գագիկ Խաչատրյանը, Մանվել Գրիգորյան, Տարոն Մարգարյան, Գագիկ Խաչատրյանը զգում են, որ իրենց թալանածը վերադարձնելու ժամանակն է, այդ պատճառով տարբեր քայլերի են դիմում>,- հայտարարել է Փաշինյանը:

 

Շտապ հրավիրված ասուլիսի ժամանակ ԱԱԾ և ՀՔԾ ղեկավարները նշել են, և դա եղել է նաև նրանց հեռախոսազրույցում, որ իրենք չեն կապվել դատավորի հետ, այլ դատավորն է շատ մտահոգված եղել իր անվտանգությամբ, եթե կալանավորի Ռոբերտ Քոչարյանին: Սասուն Խաչատրյանի խոսքով, անհերքելի ապացույցներ են հավաքվել այն մասին, որ 2008 թ. մարտի 1-ի իրադարձություններին մասնակցել են զինված ուժերը, ըստ որում՝ օլիգարխները գումարներ են վճարել զինծառայողներին ցուցարարներին ցրելու համար, նույնիսկ կազմակերպվել է ներքին զորքերի զինծառայողներից մեկի դիտավորյալ սպանությունը՝ երկրում արտակարգ դրություն մտցնելն արդարացնելու համար: Նրանք հայտնել են նաև երկրորդ նախագահ Ռոբերտ Քոչարյանի նկատմամբ <փողերի լվացման> հոդվածով նոր քրեական գործի առկայության մասին՝ մակերեսորեն պատմելով նրա կողմից հարյուր միլիանավոր դոլարների յուրացման մասին: