Արմինֆո. ՀՀ երկրորդ նախագահ Ռոբերտ Քոչարյանի փաստաբանները դիտարկում են Վճռաբեկ դատարան դիմելու հնարավորությունը։ Այս մասին «Ազատություն» ռադիոկայանի հետ զրույցում հայտնել է Քոչարյանի փաստաբան Հայկ Ալումյանը։
Նրա խոսքով՝ Ռոբերտ Քոչարյանի փաստաբանները քննարկում են հարցն այն մասին, թե արժի արդյոք բողոքարկել Վերաքննիչ դատարանի որոշումը Վճռաբեկ ատյանում։ Փաստաբանը նշել է, որ իրենց վերաքննիչ բողոքներում նրանք ծանրակշիռ փաստարկ են բերել ազատ արձակման համար, սակայն դատարանն իր որոշման մեջ նախընտրել է հիմնվել նախկին նախագահի անձեռնմխելիության սահմանադրական նորմի վրա. «Մենք 2 փաստարկ ունենք, որոնք անհրաժեշտ է ներկայացնել Վճռաբեկ դատարան»,–նշել է փաստաբանը՝ շեշտելով, որ բողոքարկման որոշումը վերջնական չէ, դեռ քննարկվում է։ Փաստաբանը նկատել է, որ քննչական մարմինը հրաժարվում է ամբողջությամբ հրապարակել մեղադրանքը, փաստաբանների իրավունքները սահմանափակ են մեղադրանքը հրապարակելու հարցում և լուրջ խնդիրներ են առաջանում իրականության հասարակության պատկերացումների հետ։ «Շատ կարեւոր է, որ բոլորը հասկանան մեղադրանքի բովանդակությունը։ Հանրությունը պետք է հասկանա, որ Ռոբերտ Քոչարյանին մեղադրանք չի առաջադրվել 10 մարդու կամ նույնիսկ 1 մարդու սպանության համար»,–հայատարել է փաստաբանը։
Հիշեցնենք, որ այն բանից հետո, երբ նախօրեին Վերաքննիչ դատարանը բավարարեց նախկին նախագահ Ռոբերտ Քոչարյանի փաստաբանների միջնորդությունը, բեկանեց առաջին ատյանի դատարանի վճիռը, և Ռոբերտ Քոչարյանն ազատ արձակվեց, Հատուկ քննչական ծառայությունում հայտարարել են, որ երկրորդ նախագահ Ռոբերտ Քոչարյանին կալանքից ազատ արձակելու մասին դատարանի որոշումն անօրինական է: «Ավելին, դատարանը դուրս եկավ իր լիազորություններից: Հուսով ենք, որ դատախազը կբողոքարկի այդ որոշումը հաջորդ ատյանի դատարանում», - ասել են ՀՔԾ-ում: