ԱԺ Ընտրական օրենսգրքի փոփոխությունների աշխատանքային խմբի նիստի ընթացքում Դավիթ Հարությունյանն առաջարկել է ID քարտեր օգտագործել

Արմինֆո.ԱԺ Ընտրական օրենսգրքի փոփոխության աշխատանքյաին խմբի առաջին նիստը վարող Դավիթ Հարությունյանը, ներկայացնելով փաստաթղթի առնչությամբ ՀՀԿ առաջարկները, նշել է, որ իրենք նախատեսել են տեխնիկական սարքերով ընտրողների գրանցումը միմիայն ID քարտերի միջոցով:

«Առաջարկում ենք ընտրություններին օգտագործել միմիայն ID քարտեր, քանի որ դրանք հնարավորություն ունեն չիպ ընթերցելու: Եկեք օգտագործենք այդ հնարավորությունը և մասսայական ID քարտեր տրամադրենք, դա կբարձրացնի անվտանգության մակարդակը»,- նշել է նա:

Հարությունյանը չի համաձայնել այն բանի հետ, որ հնարավոր չէ կարճ ժամկետներում տրամադրել  ID քարտեր: Նրա խոսքով, դա կարելի է կազմակերպել:

«Ելք» խմբակցության պատգամավոր Էդմոն Մարուքյանը հետաքրքրվել է, թե որքան գումար և ժամանակ է պետք երկրի քաղաքացիներին ID քարտ տալու համար, Դավիթ Հարությունյանը նշել , որ քանի դեռ աշխատում էր կառավարությունում, անցկացվել էր ընկերությունների մրցույթ, սակայն հիմա տեղյակ չի, թե որ փուլում է գտնվում գործընթացը: Բացի այդ, նա նշել է, որ ԵՄ-ն պատրաստակամություն է հայտնել ֆինանսական օգնություն ցուցաբերել այդ հարցում:

«Ցանկացած ընտրությունների ժամանակ կունենանք դոնորներ, որոնք ֆինանսական աջակցություն ցույց կտան ID քարտեր տրամադրելու համար»,-նշել է Հարությունյանը՝ ավելացնելով, որ պետք է պահն օգտագործել և ID քարտեր տրամադրել բոլորին, թեկուզ անվճար:

Հարցին, թե  ինչու նախորդ ընտրությունների ժամանակ նման բան չարվեց, Հարությունյանը հայտարարել է. «Ավելի ուշ հանգեցինք այդ մտքին: Կար մի ընկերություն, որից գոհ չէինք, մենք ուզում ենք նոր նմուշի ID քարտ, սա պատմական շանս է»,- եզրափակել է Հարությունյանը: