Երկուշաբթի, 2 Հուլիսի 2018 15:57

Արմինֆո. Լիդիան ընկերության հարյուրավոր աշխատակիցներ, մերձակա վայրերի բնակիչների հետ միասին, այսօր հավաքվել էին կառավարության շենքի մոտ և կոչ են անում բացել ճանապարհները դեպի Ամուլսարի շինհրապարակ, որը ցուցարարների կողմից փակ է արդեն 10 օր:

 

«Մեր հարգելի վարչապետ, մենք բոլորս այստեղ հավաքվել ենք, որպեսզի սատարենք ձեր կոչին, որ Ամուլսարի դեմ այս շարժումը սաբոտաժ է և անընդունելի է, որն ուղղված է կառավարության դեմ: Մենք կոչ ենք անում քայլ անել և անցնել գործի: Այս անօրինական սաբոտաժը չի կարող շարունակվել», - հայտարարել է Lydian Armenia ընկերության սոցիալական ծրագրերի համակարգող Նարա Ղազարյանը:

 

Իր հերթին, ընկերության տեխնիկական անվտանգության աշխատակից Արթուր Հովսեփյանը նշել է, որ արդեն մի քանի տարի Ամուլսարի ծրագրի դեմ իրականացվում է կանխամտածված և լավ ֆինանսավորվող հակագովազդ: Այն նպատակ ունի վարկաբեկել Լիդիան հանքարդյունաբերական ընկերության բնապահպանական և սոցիալ-տնտեսական տեսանկյունից թափանցիկ և օրինապահ աշխատելաոճը: «Ապրիլ-մայիսին մենք, ինչպես նաև մեր հարյուրավոր քաղաքացիներ հավատացինք, որ հնարավորություն ունենք ստեղծել նոր Հայաստան, որտեղ կիշխի օրենքը, արդարությունը և ազատ մրցակցային դաշտը: Մենք պայքարեցինք հանուն նոր Հայաստանի և վստահ ենք, որ ձեր կողմից նախաձեռնված փոփոխությունները կանրադառնան բոլոր ոլորտներին, բացառելով հնարավոր կոռուպցիոն սխեմաները, այդ թվում`նաև մեր ընկերության դեմ, որը գործում է բացառապես ՀՀ օրենսդրության շրջանակներում», - հավելել է նա:

 

Ա. Հովսեփյանը նշել է, որ ճանապարհների փակումը ոչ միայն Հայաստանի տնտեսոթւյան և ներդրումային հեղինակության դեմ ուղղված քայլ է, այլ նաև խախտում է հազարավոր քաղաքացիների իրավունքները, ովքեր կորցրել են իրենց աշխատատեղերը: «Ամուլսարի շուրջ ստեղծված իրավիճակը ոչ այլ ինչ է, քան դասական անօրինականություն», - եզրափակել է նա:

 

Ցուցարարները շարունակել են բացականչել. «Վարչապետ», «Մենք ենք տերը մեր հանքավայրի», «Լիդիանի աշխատակիցները լավագույն բնապահպաններն են», պահանջելով պաշտպանել իրենց իրավունքները և իշխանություններին կոչ անելով ընդունել որոշում և կատարել Ամուլսարի նախագծի խոստացված հետազոտությունը, որի նպատակը կլինի վերջ տալ մի շարք փորձագիտական ​​համայնքների անվերջ զրպարտություններին ու բողոքներին:

 

ՀՀ վարչապետի օգնական Նաիրի Սարգսյանը հանդիպել է ցուցարարներին: Կառավարության ներկայացուցիչների հետ զրույցում Լիդիանի գլխավոր գործադիր տնօրեն Հայկ Ալոյանը նշել է, որ այսօրվա հանդիպումն արտահայտում է ընկերության աշխատակիցների և մերձակա համայնքների բնակիչների մտադրությունները, որպեսզի օգնեն կառավարությանն անօրինականոթյունները դադարեցնելու հարցում: Նա երկու նամակ է ուղղել ՀՀ վարչապետին, որոնցից մեկը ներառում է ընկերության աշխատակիցների հազարից ավելի ստորագրություն, պահանջելով իրենց իրավունքների պաշտպանությունը: «Մենք ցանկանում ենք, որ վարչապետը տեղյակ լինի և անհապաղ հետաքննի այս հարցը», - դիմել է Ա Ալոյանը Ն. Սարգսյանին, ով խոստացել է կատարել հնչեցված խնդրանքը:

 

«Հանքավայրի շահագործումը սպառնալիք չի ներկայացնում մարդկանց կամ համայնքների համար: Ընկերությունը գործում է ՀՀ օրենքի շրջանակներում, պահպանելով միջազգային ամենաբարձր չափանիշները: Մենք դիմել ենք իրավապահ մարմիններին և իշխանություններին, սակայն մինչ օրս որևէ քայլ չի ձեռնարկվել, ճանապարհները դեռ փակ են», - ընդգծել է Ալոյանը:

 

Նա նշել է, որ գործունեության մեկնարկից հետ անցած 12 տարիների ընթացքում մշտապես փորձ է արվել ազդել ընկերության վարկանիշի և հեղինակության վրա: «Մենք պահպանում ենք բոլոր չափանիշները, ինչպես էկոլոգիական, այնպես էլ սոցիալ-տնտեսական, ընդ որում`բարձր մակարդակի վրա: Այսօրվա դրությամբ Հայաստանում չկա այնպիսի ընկերություն, որն իր գործունեությունն իրականացնելիս առաջնորդվում է միջազգային լավագույն ստանդարտներով, ինչպիսին է Լիդիան Արմենիան ընկերությունը»,-նշել է նա: Միևնույն ժամանակ, ընկերության ղեկավարը շեշտել է, որ ճանապարհների շրջափակումը հղի է բացասական բնապահպանական հետևանքներով: «Նախ, շինհրապարակը մնացել է առանց ջրահեռացման մեքենաների, բացի այդ, կան պոմպերի միջոցով ջրի մղման հետ կապված խնդիրներ: Նման իրավիճակում, այս պահին, մենք չենք կարող մտնել մեր հանքավայր և շարունակել աշխատանքը: Դա կարող է հանգեցնել լուրջ բնապահպանական խնդիրների: Ծրագիրը մշակել ենք, հաշվի առնելով համայնքի բնակիչների կարծիքը`շրջակա միջավայրին սպառնացող վտանգներից խուսափելու համար», - բացատրել է Ալոյանը: Նա նշել է, որ այսօր ցուցարարները վարչապետին կոչ են անում օգնել ճանապարհների բացման հարցում: Անկախ կառավարության կողմից ստեղծված խմբի գնահատման արդյունքներին, գլխավոր տնօրենը նշել է, որ աշխատողների իրավունքները պետք է պահպանվեն և աշխատանքը պետք է շարունակվի, քանի որ կա համապատասխան թույլտվություն: «Մենք ցանկանում ենք, որ նախատեսված բոլոր աշխատանքները, ինչպես մեր, այնպես էլ կառավարության խմբի կողմից, իրականացվեն զուգահեռաբար», - ընդգծել է նա:

 

Հիշեցնենք, որ նախօրեին ՀՀ վարչապետի Նիկոլ Փաշինյանը նշել էր, որ Ամուլսարի նախագծի մասին կառավարության որոշումները պետք է հիմնված լինեն փաստերի, անվիճելի փաստերի վրա: «Այդ փաստերը հավաքելու հարցում մենք երկար ճանապարհ ենք անցել: Կարվի վերջնական եզրակացություն», - ասել էր վարչապետը: Անդրադառնալով այն հանգամանքին, որ ընկերությունը կորուստներ է կրում և խնդիրը լուծելու է դատարանում, Փաշինյանը նշել էր. «Դա բոլորի իրավունքն է»:

 

Հիշեցնենք, որ Lydian Armenia-ն բրիտանական Lydian International-ի դուստր ընկերությունն է, որի բաժնետերերն են նաև ԱՄՆ, Մեծ Բրիտանիայի, մի շարք եվրոպական երկրների միջազգային ինստիտուցիենալ ներրդողներ, այդ թվում` IFC և EBRD: Ամուլսարի ոսկու հանքավայրի շահագործման նախագիծն այսօր Հայաստանում արդյունաբերական ամենախոշոր նախագիծն է, որի ընդհանուր արժեքը կազմում է 370 մլն դոլար: 2016 թվականի օգոստոսին տեղի ունեցավ նախագծի մեկնարկի պաշտոնական արարողությունը, որը նախատեսում է շինարարության և հանքավայրի իրացման սկիզբը: Ամուլսարի հանքավայրի շահագործման ժամկետը կկազմի 10 տարի և 4 ամիս, նախատեսվում է տարեկան արդյունահանել 200 հազար ունցիա ոսկի (մոտ 10 մլն. տոննա հանքանյութ): Ընկերության բաժնետոմսերը ցուցակված են Տորոնտոյի ֆոնդային բորսայում: Ամուլսարի հանքավայրն իր պաշարնորով երկրորդն է Հայաստանում: