Հինգշաբթի, 28 Հունիսի 2018 19:21

Արմինֆո. Հայաստանի և Բելառուսի միջև դիվանագիտական հարաբերությունների հաստատման 25-ամյակին նվիրված հանդիսավոր միջոցառումների շրջանակում հունիսի 28-ին Հովհաննես Թումանյանի տուն-թանգարանում բացվել է Մինսկի Յանկա Կուպալայի պետական գրական թանգարանի  «Դեպի լեռների և սրընթաց գետերի երկիր՚ խորագրով ցուցահանդեսը:

 

Հայ և բելառուս ժողովուրդների վաղեմի բարեկամական փոխհարաբերություններն են  խորհրդանշում բելառուս մեծ բանաստեղծ, թարգմանիչ, դրամատուրգ և հրապարակախոս Յանկա Կուպալայի տողերը. «Լեռների և սրընթաց գետերի, խաղողի այգիների և բյուրեղյա աղբյուրների ձեր երկիր ինձ ուղարկել է թավախիտ անտառների և մարմանդ գետերի երկրի ժողովուրդը: Ինքնատիպ է մեր հայրենիքների գեղեցկությունը: Բայց միևնույն հոգին է ապրում նրանց մեջ…՚
 

Ցուցահանդեսում, որը Հայաստան է բերել  Յանկա Կուպալայի պետական գրական թանգարանը, ներկայացված են Բելառուսում Կուպալայի անվանն առնչվող վայրերի լուսանկարներ և Հայաստանի հետ նրա կապը պատկերող 6 վահանակներ:

 

1939 թվականին Յանկա Կուպալան «Սասունցի Դավիթը» էպոսի 1000-ամյակին նվիրված հանդիսությունների պատվավոր հյուրն է եղել: Հայաստան ճամփորդության ընթացքում բանաստեղծը ծանոթացել է մեր երկրի փառավոր պատմության և հարուստ մշակույթի հետ, այցելել պատմական հուշարձաններ, զմվայլվել հին վարպետների թողած գանձերով, տեսել հայ ժողովրդի հոգատար վերաբերմունքը հայրենի երկրի հանդեպ:
Հենց Երևանում է Յանկա Կուպալան լուր ստացել Արևմտյան և Արևելյան Բելառուսի միավորման մասին: Այդ իրադարձությանը նվիրված «Արևմտաբելոռուսական մոտիվներով» շարքի ձեռագրում նշված է ստեղծման վայրը՝ «Երևան - Մինսկ»:
Յանկա Կուպալայի պոեզիան աշխարհին բացահայտում էր Բելառուսը, իսկ ինքր՝ պոետը, որպես ժողովրդական դիվանագետ, ներկայացնում էր հայրենիքը օտար երկրներում: Հայրենիքը, որպես յուրաքանչյուր ժողովրդին նախնիներից տրված մի անգին պարգև, գովերգված է Կուպալայի հանրահայտ «Ժառանգություն» բանաստեղծության մեջ: Հայ ընթերցողը Կուպալայի պոեզիային ծանոթացել է Հ. Հովհաննիսյանի, Աղավնու, Ն. Զարյանի, Ղ. Կոմունու, Ռ. Պողոսյանի, Պ. Սևակի, Մ. Խերանյանի թարգմանությունների միջոցով: 1951 թվականին լույս տեսավ պոետի բանաստեղծությունների ժողովածուն հայերենով: Կուպալայի թանգարանի ֆոնդերում պահվող օրինակը Հայաստանի ազգային գրադարանի նվերն է: Մշակութային երկխոսությունը ՝ սկսված Յանկա Կուպալայի և նրա ժամանակակիցների և ընկերների կողմից, բարեկամության լավագույն օրինակ է:

 

«Այս ցուցահանդեսն, անպայման, կամրապնդի մշակութային կապերը հայ և բելառուս ժողովուրդների և մեր թանգարանների միջև՚, - ԱրմԻնֆո-ի թղթակցի հետ զրույցում հայտարարել է Հովհաննես Թումանյանի տուն-թանգարանի գլխավոր ֆոնդապահ Մարինա Բաղդասարյանը: Նա նշել է, որ Թումանյանի անվան թանգարանը բելառուսական կողմից հրավեր է ստացել ցուցադրություն ներկաայցնելու Կուպալայի անվան թանգարանում:

 

Հավելենք, որ ՀՀ-ում Բելառուսի Հանրապետության դեսպանատան աջակցությամբ կազմակերպված ցուցադրության հանդիսավոր բացմանը ներկա են եղել օտարերկրյա դիվանագիտական առաքելությունների ներկայացուցիչներ, պատգամավորներ, նկարիչներ, արվեստաբաններ: Հավաքվածների առջև ելույթ է ունեցել Հայաստանում Բելառուսի դեսպան Իգոր Նազարուկը: Բելառուսական կողմը Թումանյանի թանգարանին հրավիրել է ցուցադրություն բացել Մինսկի Յանկա Կուպալայի թանգարանում: