Արմինֆո. Բոլորը հասկանում են, որ Լեռնային Ղարաբաղի հակամարտության խաղաղ կարգավորումը ցանկալի է բոլորի համար: ԱՊԱ-ի հետ հարցազրույցում այդպիսի կարծիք է հայտնել Ադրբեջանում Իսրայելի դեսպան Դան Ստավը:
«Ես կարծում եմ, որ Ադրբեջանի նախագահ Իլհամ Ալիևի հավատարմությունը հակամարտության խաղաղ կարգավորմանը հավանության արժանի է: Հեշտ է կողքից խորհուրդներ տալ: Չեմ կարծում, թե կարելի է այդ հարցի վերաբերյալ որոշակի խորհուրդներ տալ: Կարծում եմ, որ անհրաժեշտ է պահպանել որոշակի սկզբունքներ: Առաջին հերթին, հիմնվելով մեր ունեցած փորձի վրա, ցանկանում եմ ասել, որ ցանկալի է խաղաղ ճանապարհով կարգավորումը: Մենք պատերազմներ ենք վարել մեր բոլոր հարևանների հետ: Սակայն մենք և մյուս կողմը հետաքրքրություն ենք դրսևորել խաղաղ կարգավորման նկատմամբ: Արդյունքում` ամեն բան հաջող է ավարտվել: Մենք հաշտության պայմանագիր ենք ստորագրել Եգիպտոսի և Հորդանանի հետ՚, - ասել է իսրայելցի դիվանագետը:
Նա ընդսմին կարևորում է իրավիճակի կայունացումը, ինչն, իր հերթին, կնվազեցնի սպառնալիքի մակարդակն ու թույլ կտա էլ ավելի ռեսուրսներ ուղղորդել երկրի զարգացմանը: «Իսկ գլխավորը` վերջ դնել հարևան երկրների հետ հակամարտություններին: Մենք դա արել ենք անմիջական շփումների միջոցով, երրորդ երկրների օգնությամբ, որոնք բարենպաստ պայմաններ էին ստեղծել բանակցությունների համար: Այստեղ մենք տեսնում ենք, որ Ադրբեջանն ու Հայաստանը պաշտպանում են Մինսկի խմբի ջանքերը: Մենք նույնպես սատարում ենք Մինսկի խմբի ջանքերը, քանի որ այդ ձևւաչափին հավանություն են տվել երկու կողմերը: Որքան ինձ հայտնի է, այդ ուղղությամբ ընթանում են բանակցություններ: Մենք հավանություն ենք տալիս նախագահների 2016 թվականին կայացած երկու հանդիպումներին և նախորդ տարի անցկացված հանդիպմանը: Հուսով ենք, որ դա կդառնա շրջադարձային պահ՚, - հավելել է Ստավը:
Նա ընդսմին հույս է հայտնել, որ բանակցությունները, որոնք, մասնավորապես, կշարունակվեն ընտրություններից հետո, իրոք հակամարտության կարգավորման հնարավորություն կտան: «Այդ առումով Ադրբեջանն իրավացի է. հակամարտության կարգավորումից կշահի կողմերից յուրաքանչյուրը: Սակայն, կրկնեմ, ես այն կարծիքին չեմ, որ Ադրբեջանին և Հայաստանին պետք է թելադրել, թե ինչպիսին է պետք է լինի կարգավորումը: Մեր երկիրը պաշտպանում է Մինսկի խմբի ջանքերը, որոնք կհանգեցնեն հակամարտության կարգավորման: Մենք պաշտպանում ենք բանակցությունները, որոնք կլինեն արդյունավետ և կհամապատասխանեն երկու կաղմերի շահերին, մենք պաշտպանում ենք Ադրբեջանի տարածքային ամբողջականությունը՚, - եզրափակել է դիվանագետը: