Արմինֆո. Ինտեգրման տարբեր վեկտորները միմյանց հակադրելու փորձերը և շահարկումները հղի են հայոց պետականության համար լուրջ սպառնալիքներով: Նոյեմբերի 27-ին ՀՀ խորհրդարանում, «Ելք» դաշինքի կողմից նախաձեռնված`«Հայաստանի հանրապետության կողմից Եվրասիական տնտեսական միության մասին պայմանագրի դենոնսացման գործընթացի մեկնարկի մասին» օրինագծի լսումների ընթացքում հայտարարել է եվրաինտեգրման հանձնաժողովի փոխնախագահ, հանրապետական Սամվել Ֆարմանյանը:
Ըստ նրա, նպատակահարմար չէ ԵԱՏՄ-ից Հայաստանի դուրս գալու թեմայով խորհրդարանում լսումների անցկացումը ԵՄ հետ համապարփակ և ընդլայնված համագործակցության համաձայնագրի ստորագրումից անմիջապես հետո: «Պատմությունը ցույց է տալիս, որ տարբեր աշխարհաքաղաքական բևեռներին հակազդելու ցանկացած փորձ արատավոր հետևանքներ է ունեցել Հայաստանի համար, և այժմ էլ դա անելը նպատակահարմար չէ», - նշել է պատգամավորը:
Նա ընդգծել է, որ Հայաստանն այսօր եվրասիական տարածքում միակ երկիրն է, որը, լինելով Ռուսաստանի ռազմավարական դաշնակիցը, ԵՄ հետ ստորագրեց նման համաձայնագիր: «Ինչպես կարելի է այդքանից հետո քննադատել Երևանի արտաքին քաղաքականությունը», - եզրափակել է պատգամավորը:
Իր հերթին, Եվրոպական ինտեգրման հանձնաժողովի նախագահ, Ծառուկյան դաշինքի անդամ Նաիրա Զոհրաբյանը հայտարարել է, որ ինքը ԵՄ-ի հետ Հայաստանի ասոցացման աջակիցն է: Նրա խոսքերով, Հայաստանի խնդիրները պայմանավորված են երկրում տիրող իրավիճակով, այլ ոչ թե ԵԱՏՄ անդամության կամ ԵՄ հետ համաձայնագրի ստորագրումով: Նրա կարծիքով, հանրապետության ղեկավարությունը ձեռքերը ծալած նստել է, փոխանակ զարգացնի գյուղատնտեսությունը և ապրանքներն արտահանի Ռուսաստան:
«Եթե Հայաստանի ողջ ներմուծումն իրականացվում են 7 օլիգարխներ, ու չկա ոչ մի այլընտրանք, դրանում նո՞ւյնպես մեղավորը ԵԱՏՄ-ն է: Այն, որ մեր պաշտոնյաները վաճառել են իրենց 20% մասնաբաժինը Գազպրոմին, նո՞ւյնպես մեղավոր է ԵԱՏՄ-ն: Այն, որ մեր քաղաքացիները լքում են երկիրը, քանի որ այստեղ չեն կարողանում գտնել աշխատանք, դա էլ, հավանաբար, ԵԱՏՄ մեղքով է», - հռետորական հարցադրում է արել Զոհրաբյանը:
Իր հերթին, «Ծառուկյան» դաշինքից ՀՀ խորհրդարանի փոխխոսնակ, Միքայել Մելքումյանը հայտարարել է, որ Հայաստանը պարզապես չգիտի, թե ինչպես պետք է ճիշտ օգտագործել իր անդամակցությունը ԵԱՏՄ-ում և դրանից չի քաղում օգուտներ: «Ես գտնում եմ, որ Հայաստանն ունի առավելություններ, որ ԵԱՏՄ անդամ է, և որ ԵՄ հետ ստորագրել է շրջանակային համաձայնագիրը: Պետք է պարզապես կարողանալ օգուտներ քաղել այդ երկու կառույցներից», -ասել է Մելքումյանը:
Նա նաև ընդգծել է, որ Հայաստանը չպետք է հակադրվի մի կառույցի մյուսին: «Մեզ համար, կան առավելություններ այդ երկու կառույցներում: Իհարկե, դժվար է միաժամանակ լինել թե ԵԱՏՄ-ում, և թե ԵՄ-ում, բայց եթե մեզ ընձեռվել է այսպիսի հնարավորություն, ապա ինչու չփորձել համատեղել առավելություններն այդ կառույցներում», - ասել է նա: