Արմինֆո. Միջազգային հանրությունից, մասնավորապես, եվրոպական կառույցներից պահանջելով հանդուրժողականություն և ըմբռնում իր հակաժողովրդավարական, այլատյաց, բռնապետական քաղաքականության հանդեպ` Ալիևը դրսևորում է վերին աստիճանի անպատկառություն: ԱրմԻնֆո-ի թղթակցի հետ զրույցում այդպիսի կարծիք է հայտնել ԱԺ եվրաինտեգրման հարցերի հանձնաժողովի ղեկավար, ԵԽ խորհրդարանական վեհաժողովում Հայաստանի պատվիրակության անդամ Նաիրա Զոհրաբյանը` մեկնաբանելով Ալիևի այն հայտարարությունը, թե Եվրախորհուրդը երկակի ստանդարտներ և դիֆերեցված մոտեցում է կիրառում Հայաստանի և Ադրբեջանի նկատմամբ:
Զոհրաբյանը նշել է, որ Ալիևի ցինիզմն անցնում է կարելիի և անկարելիի բոլոր սահմանները: «Ասեմ ավելին, ես կարծում եմ, որ Ալիևի ռեժիմի հնադեպ եվրոպական կառույցների ամենաթողության և լոյալ վերաբերմունքի պատճառով Ադրբեջանը լուրջ սպառնալիք է դարձել միջազգային հանրության համար: Սպառնալիք` իր հակաժողովրդավարական համակարգով, սպառնալիք, որն իր կոռուպցիոն մետաստազներն է տարածում եվրոպական կառույցներում՚, - ընդգծել է պատգամավորը: Որպես օրինակ նա նշել է այն փաստը, որ մի քանի օր առաջ Եվրախորհրդարանը որոշում է կայացրել հետաքննություն սկսել կոռուպցիոն սկանդալի առնչությամբ, որը ԶԼՄ-ներում ստացել է «Ադրբեջանական լանդրոմատ՚ անվանումը, ըստ որի Մեծ Բրիտանիայում կեղծ ընկերությունների օգնությամբ լվացվել է 2,9 միլիարդ դոլար: Այդ փողերը ծախսվել են եվրոպացի քաղաքական գործիչներին կաշառելու համար, որոնք ներկայացրել են Ադրբեջանի շահերը ԵՄ-ում և շրջափակել նախկին խորհրդային հանրապետությունում մարդու իրավունքների խախտումները դատապարտող բանաձևերը:
«Ադրբեջանի կոռուպցիոն մետաստազները չեն շրջանցել անգամ ՅՈՒՆԵՍԿՕ-ն՚, - հայտարարել է Զոհաբյանը: Նա նշել է, որ վերջերս ՅՈՒՆԵՍԿՕ-ի գլխավոր քարտուղարն ստիպված էր հրաժարական տալ, քանի որ նրա ամուսինն առնչվում էր Ադրբեջանի մասնակցությամբ կոռուպցիոն սկանդալին: «Նույնիսկ CNN-ը հայտնվել է ադրբեջանական կոռուպցիոն ինտրիգների հորձանուտում՚, - ընդգծել է պատգամավորը:
«Եվ այդ ամենի ֆոնին Ալիևը եվրոպական կառույցներից և միջազգային հանրությունից պահանջում է լավ վերաբերմունք և ըմբռնու՞մ: Արդյո՞ք դա ցինիզմի և անպատկառության գագաթնակետը չէ՚, - նշել է Զոհրաբյանըւ, ընդգծելով, որ միջազգային հանրությունն առանց այդ էլ մինչ օրս չափազանց հանդուրժողականություն է դրսևորել Ալիևի ռեժիմի հանդեպ:
Հայ պատգամավորը նաև միջազգային կառույցներին խորհուրդ է տվել զբաղվել «Ադրբեջանական ավիաուղիների՚ թռիչքների ուսումնասիրմամբ, որոնք դիվանագիտական չվերթների քողի ներքո թռիչքներ են իրականացրել դեպի Սիրիա, Աֆղանստան, Կոնգո, Իրաք և զենք մատակարարել գրոհայիններին:
Զոհրաբյանը նաև ուշադրություն է հրավիրել այն փաստին, որ հայ սպային կացնահարած Ռամիլ Սաֆարովին Ադրբեջան արտահանձնումից անմիջապես հետո Հունգարիայի կառավարությանը մոտ գործիչների հաշիվներին խոշոր գումար է ստացվել ադրբեջանական տարբեր կառույցներից: Նրա ասելով, ընդհանուր առմամբ, փոխանցվել է 7 600 000 դոլար:
Ինչ վերաբերում է ան բանին, որ Ալիևը միջազգային կազմակերպություններին խնդրել է պատժամիջոցներ սահմանել Հայաստանի նկատմամբ` Լեռնային Ղարաբաղի հակամարտությունը կարգավորելու համար, պատգամավորը հայտարարել է, որ Ալիը գործում է համաձայն «Լավագույն պաշտպանությունը հարձակումն է՚ ասացվածի: «Նա հրաշալի հասկանում է, որ իր կոռուպցիոն սկանդալները հասել են միջազգային մակարդակի, բազմաթիվ եվրոպական իրավական կազմակերպություններ արդեն դրանով հետաքրքրվում են: «Պանդորայի արկղը՚ բացվել է, նույնիսկ, ԱՄՆ կոնգրեսականները պահաջել են պատժամիջոցներ սահմանել ընդդեմ Ադրբեջանի՚, - ընդգծել է Զոհրաբյանը:
Հիշեցնենք, որ հոկտեմբերի 4-ին Եվրամիության խորհրդի քաղաքականության և անվտանգության կոմիտեի պատվիրակության հետ հանդիպմանն Ադրբեջանի նախագահ Իլհամ Ալիևը Եվրախորհրդին մեղադրել է Հայաստանի և Ադրբեջանի նկատմամբ երկակի ստանդարտների և դիֆերենցված վերաբերմունքի համար` սպառնալով լքել կառույցի շարքերը: Նրա պնդմամբ, ԵԽ-ը Հայաստանի և Ադրբեջանի անդամակցության առաջին իսկ օրվանից «ամենաջերմ զգացմունք՚ է դրսևորել Երևանի նկատմամբ, իսկ Բաքուն մինչ օրս միշտ արժանացել է սառը մոտեցման: