Կոպիրկին. Ռուսաստանի և Հայաստանի միջև բնապահպանության ոլորտում երկխոսություն է ընթանում

ԱրմԻնֆո. Ռուսաստանի և Հայաստանի միջև երկկողմ ձևաչափով երկխոսություն է ընթանում բնապահպանության ոլորտում։ Այս մասին հայտարարել է Հայաստանում Ռուսաստանի դեսպան Սերգեյ Կոպիրկինը հոկտեմբերի 26-ին լրագրողների հետ զրույցում՝ ՄԱԿ-ի կենսաբազմազանության մասին կոնվենցիայի կողմերի 17-րդ համաժողովի (COP17) շրջանակներում։

Նրա խոսքով՝ սա երկկողմ համագործակցության բավական ավանդական թեմա է։ "Բացի այսօրվա նիստում հնչածից, մենք տեսնում ենք, որ մեր մասնագետները, կորպորատիվ հատվածի ներկայացուցիչները, պետական կառույցները պատրաստ են միջազգային շփումների, պատրաստ են

կիսվել առկա մշակումներով, իսկ դրանք իսկապես կան, և միջազգային փորձը փոխառել։ Այնուամենայնիվ, բնությունը վերազգային հասկացություն է, վերազգային իրականություն, և առանց միջազգային համագործակցության դա անհնար է։ Իսկ այն, ինչ այս օրերին այստեղ տեղի է ունենում, վկայում է այն մասին, որ սա ողջ մարդկության գործն է",- ասել է ռուս դիվանագետը։

Իսկ COP17-ի ռուսական տաղավարում՝ "Պետությունն ու բիզնեսը միասին" թեմայով նիստի ընթացքում իր ողջույնի խոսքում Կոպիրկինը Երևանում անցկացվող միջոցառումը կարևոր է անվանել ինչպես միջազգային իրադարձության, այնպես էլ Ռուսաստանի Դաշնության միջազգային կապերի տեսանկյունից։ Այս համատեքստում նա պատահական չի համարել այն, որ ռուսական պատվիրակությունը այս խորհրդաժողովի ամենաբազմամարդ պատվիրակություններից մեկն է։ Դիվանագետը հիշեցրել է, որ COP17-ում ռուսական պատվիրակությունը գլխավորում է նախագահի օգնականը, կլիմայի և ջրային ռեսուրսների հարցերով հատուկ ներկայացուցիչ, ՌԴ նախագահի ներկայացուցիչ Ռուսլան Էդելգերիևը։

"Այս ամենը, իհարկե, վկայում է այն մասին, թե որքան բարձր տեղ են զբաղեցնում ՌԴ-ի, ՌԴ ղեկավարության առաջնահերթությունների սանդղակում բնության և կլիմայի պաշտպանության հարցերը։ Սա բնական է՝ հաշվի առնելով այն հսկայական բնական ներուժը, որն ունի Ռուսաստանի Դաշնությունը, և այն պատասխանատվությունը, որը այս առումով գլոբալ մակարդակում դրված է երկրի վրա", - ասել է Կոպիրկինը՝ համոզմունք հայտնելով, որ ռուսական պատվիրակության մասնակցությունը այս խորհրդաժողովին լավ հնարավորություն է ոչ միայն բնության պաշտպանության ոլորտում Ռուսաստանի համապարփակ փորձով կիսվելու, այլև միջազգային կապերն ամրապնդելու և զարգացնելու համար, որոնք, բնականաբար, անհրաժեշտ են՝ հաշվի առնելով, որ բնապահպանական հարցերը ազգային սահմաններ չեն ճանաչում։