«Swedfund»-ը  հետաքրքրված է Հայաստանի արագ զարգացող էկոհամակարգով. Յոհան Բոստրյոմ Հեյսկալա

Արմինֆո.  Հայաստանում կայուն ենթակառուցվածքային նախագծերի շրջանակներում թվայնացման, հեռահաղորդակցության և այլ ոլորտներում երկկողմ համագործակցության հնարավորություններն են քննարկվել ՀՀ բարձր տեխնոլոգիական արդյունաբերության և արհեստական բանականության նախարարի տեղակալ Գևորգ Մանթաշյանը եւ Շվեդիայի զարգացման ֆինանսական հաստատության՝ «Swedfund»-ի աքսելերատոր ծրագրի տնօրեն Յոհան Բոստրյոմ Հեյսկալայի գլխավորած պատվիրակության հանդիպման ընթացքում։

ԲՏԱԱԲ նախարարության հաղորդագրության համաձայն, Գևորգ Մանթաշյանը կարևորել է միջազգային ֆինանսական հաստատությունների հետ համագործակցությունը, ներկայացրել է նախարարության ընթացիկ բարեփոխումներն ու ռազմավարական ուղղությունները՝ ընդգծելով թվային տեխնոլոգիաների և արհեստական բանականության դերը երկրի կայուն զարգացման գործում, անդրադարձել է նաև պետություն-մասնավոր հատված արդյունավետ համագործակցության ձևաչափերին, բարձր տեխնոլոգիաների, թվայնացման և հեռահաղորդակցության ոլորտների զարգացման առաջնահերթություններին։  

Յոհան Բոստրյոմ Հեյսկալան, իր հերթին,  ներկայացրել է «Swedfund»-ի հիմնական առաքելությունն ու աքսելերատոր ծրագրի շրջանակը, որի հիմնական նպատակն է խթանել կայուն ենթակառուցվածքների նախագծերի իրականացմանը։ Նա նշել է, որ Swedfund-ը հետաքրքրված է Հայաստանի արագ զարգացող էկոհամակարգով և պատրաստ է ուսումնասիրել տեխնոլոգիաների, հեռահաղորդակցության, ինչպես նաև անվտանգ և հուսալի թվային հաղորդակցության ոլորտներում համագործակցության հնարավորությունները: 

Անդրադարձ է կատարվել ստարտափների աջակցման գործիքակազմերին և կայուն տնտեսական աճի ապահովման գործում նորարարությունների դերին, «ԱԲ գործարանների պարտեզ»-ի հայեցակարգին, որը կդիրքավորի Հայաստանը, որպես տարածաշրջանային տեխնոլոգիական հաբ, ինչպես նաև ռազմավարական էներգետիկ ծրագրերին, որոնք անհրաժեշտ են բարձր տեխնոլոգիական ենթակառուցվածքների անխափան և կայուն աշխատանքն ապահովելու համար:

Հանդիպման ավարտին կողմերը պայմանավորվել են շարունակել նախատեսված ծրագրի իրականացումը, պահպանել աշխատանքային շփումները և շարունակել քննարկել երկկողմ հետաքրքրություն ներկայացնող գործնական քայլերը:

Swedfund-ը զարգացման հարցերով զբաղվող շվեդական ֆինանսական կազմակերպություն է, որի առաքելությունն աղքատության կրճատումն է՝ զարգացող երկրներում կայուն ներդրումների միջոցով: Իր առաքելությունն իրականացնելու համար Swedfund-ն օգտագործում է երկու գործիք ՝ ներդրումներ մասնավոր հատվածում և ֆինանսավորում պետական հատվածում նախագծերի նախապատրաստման համար Project Accelerator ծրագրի միջոցով: Երկու գործընթացները փոխադարձաբար ուժեղացնում են միմյանց ՝ թույլ տալով մեզ համալիր աշխատել զարգացող երկրներում կայուն զարգացման ուղղությամբ:

Swedfund-ը ներդրումներ է կատարում արժանապատիվ աշխատանքային պայմաններով աշխատատեղեր և հիմնական ապրանքների և ծառայությունների ընդլայնված հասանելիություն ստեղծման գործում,  ինչպիսիք են էլեկտրաէներգիան, սննդամթերքը և թվային կապը: Ներդրումներն ուղղված են տեղական տնտեսության ամրապնդմանը, գենդերային հավասարության խթանմանը և նորարարությունների զարգացմանը, ինչպես նաև միջազգային չափանիշներին ավելի շատ ընկերությունների համապատասխանության ապահովմանը: Swedfund-ը նաև ներդրումներ է կատարում կլիմայի փոփոխության մեղմացման, հարմարվողականության և կայունության բարձրացման գործում՝ զարգացող երկրներում "կանաչ" անցմանն աջակցելու համար: Swedfund-ը ստեղծվել է 1979 թվականին և պետական ընկերություն է, որը ղեկավարվում է Շվեդիայի ֆինանսների նախարարության կողմից։