Ադրբեջանցի զինծառայողի կողմից Հայաստանի սահմանն ապօրինի հատելու միջադեպից հետո ԱԱԾ տնօրենի տեղակալը պաշտոնանկ է արվել

ԱրմԻնֆո. Ադրբեջանցի զինվորի կողմից Հայաստանի սահմանն ապօրինի հատելու միջադեպից հետո ՀՀ վարչապետ Նիկոլ Փաշինյանի որոշմամբ պաշտոնից ազատվել է ՀՀ ազգային անվտանգության ծառայության տնօրենի տեղակալ Դավիթ Սանամյանը։

«Ղեկավարվելով «Հանրային ծառայության մասին» օրենքի 9-րդ հոդվածի 6-րդ մասով և «Ազգային անվտանգության մարմինների մասին» օրենքի 4.1-րդ հոդվածի 4-րդ մասով՝ Դավիթ Սանամյանին ազատել Ազգային անվտանգության ծառայության տնօրենի տեղակալի պաշտոնից», - ասվում է վարչապետի որոշման մեջ, որը տարածել է ՀՀ կառավարության մամուլի ծառայությունը։

Հիշեցնենք, որ 2026 թվականի հոկտեմբերի 1-ին հայտնի դարձավ ադրբեջանցի զինվորի ձերբակալության մասին։ Ըստ քննության տվյալների՝ նա ներխուժել է Սյունիքի մարզի Շաքի գյուղ, որտեղ կրակ է բացել և երեխաների աչքի առաջ վիրավորել կնոջ։ Վիրավոր կնոջ կյանքին ոչինչ չի սպառնում, նրա վիճակը կայուն է, երեխաներին ցուցաբերվել է անհրաժեշտ հոգեբանական օգնություն։  Հայաստանի դատախազությունը քրեական գործ է հարուցել Նասիմի Մուսաևի դեմ։ Նրան մեղսագրվում է սահմանն ապօրինի հատելը, մաքսանենգությունը և զենքի ապօրինի շրջանառությունը, բնակարանի անձեռնմխելիության խախտումը, ինչպես նաև առողջությանը ծանր վնաս պատճառելը։ Հայաստանի դատարանը բավարարել է քննության միջնորդությունը և ձերբակալվածի նկատմամբ որպես խափանման միջոց ընտրել կալանքը՝ 2 ամիս ժամկետով։