Լրատվամիջոցներ․ ԱՄՆ-ը կտրուկ ավելացրել է Հայաստանին տրամադրվող ռազմական ֆինանսավորումը

ԱրմԻնֆո.  ԱՄՆ-ը 2024 ֆինանսական տարում կտրուկ ավելացրել է Հայաստանի ռազմական ֆինանսավորումը, իսկ ընդհանուր առմամբ 2002 թվականից հատկացվել է ավելի քան 60 միլիոն դոլար, հետևում է ԱՄՆ կառավարության տվյալներից։ Այս մասին գրում է «ՌԻԱ Նովոստի»-ն՝ ուշադրություն հրավիրելով այն հանգամանքի վրա, որ անցյալ շաբաթ Պենտագոնի ղեկավարի օգնականի տեղակալ Էնդրյու Լումիսը հայտարարել էր, որ Վաշինգտոնը մտադիր է օգտագործել իր ծրագրերի ողջ ներուժը՝ Հայաստանի զինված ուժերի բարեփոխումներին աջակցելու համար։

Հիշեցվում է, որ Հայաստանին ամերիկյան ռազմական օգնությունը Foreign Military Financing (FMF) ծրագրով սկսվել է դեռևս 2002 թվականին։ Ընդհանուր առմամբ, մինչև 2024 ֆինանսական տարին ներառյալ, Հայաստանին տրամադրված ամերիկյան ռազմական ֆինանսավորման ընդհանուր ծավալը գերազանցել է 60 միլիոն դոլարը։

Ըստ Պենտագոնի վիճակագրության, որին ծանոթացել է «ՌԻԱ Նովոստի»-ն, ֆինանսավորումը էապես ավելացել է 2024 ֆինանսական տարում։ Այդ ժամանակ ԱՄՆ-ը Հայաստանին է ուղղել ավելի քան 8,1 միլիոն դոլար։ 2023 թվականին այդ գումարը կազմել է ընդամենը մոտ 16 հազար դոլար, իսկ 2022 թվականին՝ շուրջ 1,3 միլիոն դոլար։ 2025 թվականի տվյալներն այս պահի դրությամբ հրապարակված չեն եղել։

Միևնույն ժամանակ, Հայաստանը 2023-2024 օրացուցային տարիներին ստացել է շուրջ 18 միլիոն դոլար։ 2025 թվականի հունվարին ԱՄՆ Պետդեպարտամենտը հայտնել էր, որ այդ գումարն ուղղվել է FMF-ի շրջանակներում մի շարք ծրագրերի, այդ թվում՝ զինծառայողների պատրաստման ազգային ուսումնական կենտրոնի զարգացման համար։ Այդ հայտարարությունից մեկ ամիս առաջ Պենտագոնի ղեկավարը հայտնել էր, որ համապատասխան նպատակների համար միջոցները հատկացվել են նախորդ երկու տարիների ընթացքում։

Այդ նույն ժամանակ՝ 2024 թվականի դեկտեմբերին, Հայաստանի պաշտպանության նախարար Սուրեն Պապիկյանը հայ-ամերիկյան պաշտպանական համագործակցության առաջնահերթ ուղղություններ էր անվանել ինչպես Հայաստանի զինված ուժերի վերափոխման իրականացմանը, այնպես էլ ԱՄՆ զինված ուժերի հետ փոխգործակցության մակարդակի բարձրացմանն ուղղված ուղղությունները։