Հայաստան կժամանի Եվրոպական ժողովրդական կուսակցության գլխավոր քարտուղար Դոլորես Մոնսերատը

Արմինֆո.  Հայաստան կժամանի Եվրոպական ժողովրդական կուսակցության գլխավոր քարտուղար Դոլորես Մոնսերատը: Այդ մասին է վկայում Ազգային ժողովի նախագահ Ռուբեն Ռուբինյանի ՝ այցը կազմակերպելու վերաբերյալ կարգադրությունը։

ԱԺ մամուլի ծառայության հաղորդագրության համաձայն, ԵԺԿ գլխավոր քարտուղարը Հայաստանում կլինի սեպտեմբերի 24-28-ը:

Նշենք, որ Հայաստանի կուսակցությունները Եվրոպական ժողովրդական կուսակցությունում (ԵԺԿ) ունեն դիտորդ անդամի կարգավիճակ (observer member), քանի որ համաեվրոպական կուսակցություններին լիիրավ անդամակցությունը հասանելի է միայն Եվրոպական միության երկրների քաղաքական ուժերին: Հայաստանի հանրապետական կուսակցությունը դիտորդի կարգավիճակ ստացել է 2012թ. փետրվարին, "Ժառանգությունը"՝  2012թ. փետրվարին: "Օրինաց երկիր" կուսակցությունը (հետագայում վերանվանվեց "Հայկական վերածնունդ") նույնպես դիտորդի կարգավիճակ է ստացել 2012 թվականին, սակայն հետագայում դադարեցրել է ակտիվ քաղաքական գործունեությունը նախկին ձևաչափով: Հայաստանի մյուս կուսակցությունները (օրինակ՝ իշխող "Քաղաքացիական պայմանագիրը") պարբերաբար խորհրդակցություններ և քննարկումներ են անցկացնում հնարավոր համագործակցության կամ ԵԺԿ-ին անդամակցելու վերաբերյալ, սակայն դիտորդի կամ անդամի պաշտոնական կարգավիճակ այս պահին չունեն։