ՀՀ վարչապետը աշխատանքային այցով մեկնել է Գերմանիա, նրան կհանձնվի Հեսսենի խաղաղության մրցանակը

ԱրմԻնֆո.  ՀՀ վարչապետ Նիկոլ Փաշինյանը սեպտեմբերի 18-ին աշխատանքային այցով մեկնել է Գերմանիայի Դաշնային Հանրապետություն։

Ինչպես հայտնում է կառավարության մամուլի ծառայությունը, այցի շրջանակում ՀՀ վարչապետ­ին Հեսսենի խաղաղության մրցանակը կհանձնվի Վիսբադենում՝ Հեսսենի նահանգային խորհրդարանում կայանալիք հանդիսավոր արարողության ժամանակ՝ Հարավային Կովկասում խաղաղության հաստատմանն ուղղված նրա ջանքերի համար։

Այնուհետև Նիկոլ Փաշինյանը կհանդիպի տեղի գործարարների հետ Ֆրանկֆուրտի Առևտրա­արդյունաբերական պալատում։

Մրցանակը նշում է 51-ամյա քաղաքական գործչի շարունակական ջանքերը երկրում ժողովրդավարական ինստիտուտների ստեղծման և այն Եվրամիության հետ մերձեցնելու ուղղությամբ։ Լինելով 2018 թվականի Թավշյա հեղափոխության առաջնորդներից մեկը՝ նա ճանապարհ հարթեց խորհրդարանական ընտրությունների համար և այդ ժամանակից ի վեր, լինելով վարչապետ­նախարար, երկիրը տանում է դեպի խաղաղություն և եվրոպական ինտեգրում։ Միևնույն ժամանակ, Միացյալ Նահանգների աջակցությամբ, նրան հաջողվեց 2025 թվականի օգոստոսին հարևան Ադրբեջանի նախագահի հետ ընդունել խաղաղության մասին համատեղ հռչակագիր, ինչպես նաև ստորագրել «Հայաստանի Հանրապետության և Ադրբեջանի  Հանրապետության միջև խաղաղության հաստատման և միջպետական հարաբերությունների մասին» համաձայնագիրը։

25 000 եվրո չափով մրցանակը 1994 թվականից շնորհվում է Ալբերտ Օսվալդի հիմնադրամի կողմից։ Մրցանակի նպատակն է նշել պատերազմների, բռնության կամ բռնության սպառնալիքի հետ կապված հակամարտությունների դադարեցմանն ուղղված ջանքերը, կանխարգելիչ միջոցառումները, բռնի հակամարտությունների կանխարգելման ռազմավարությունների մշակումը և ժողովուրդների միջև փոխըմբռնմանը ներդրած ավանդը։  Մրցանակը հիմնադրել է Հեսսենի նախկին վարչապետ Ալբերտ Օսվալդը (Գերմանիայի սոցիալ­դեմոկրատական կուսակցություն, ԳՍԴԿ) և նրա ընտանիքը։ Հոգաբարձուների խորհրդի կազմում ընդգրկված են խաղաղության ուսումնասիրությամբ զբաղվող գերմանական առաջատար գիտա­հետազոտական ինստիտուտների ներկայացուցիչներ, որոնք խորհրդատվություն են տրամադրում խաղաղության մրցանակի շնորհման հարցերով։