«Մայր Հայաստան». Հասարակական տրանսպորտի խնդիրները միայն ուղեվարձի բարձրացմամբ չեն լուծվում

ԱրմԻնֆո.  Հասարակական տրանսպորտի ուղեվարձի միայն բարձրացումը բարեփոխում չէ և չի լուծում այս ոլորտում առկա խնդիրները։ Այս մասին Facebook-ի իր էջում գրել է «Մայր Հայաստան» ընդդիմադիր դաշինքից Երևանի ավագանու անդամ Սոնա Աղեկյանը՝ հրապարակելով տեսանյութ, որում երևում է, թե ինչպես մայրաքաղաքի մետրոյի կայարաններից մեկի մոտ քաղաքացիները տեղ չլինելու պատճառով չեն կարողանում նստել գնացք։

Այս կապակցությամբ Աղեկյանը նշել է, որ բարեփոխումները նշանակում են, որ քաղաքացին վճարում է և դրա դիմաց ստանում ավելի որակյալ ծառայություն։ «Գների բարձրացումն ինքնին բարեփոխում չէ։ Եթե գինը հերթական անգամ բարձրանում է, իսկ խնդիրները մնում են չլուծված, ապա քաղաքացին իրավունք ունի հարցնելու՝ որտե՞ղ է բարեփոխումը և ինչի՞ համար է նա վճարում», - գրել է Երևանի ավագանու անդամը։

Նշենք, որ Երևանում հասարակական տրանսպորտի հետ կապված խնդիրները պահպանվում են արդեն երկար ժամանակ։ Քաղաքի տրանսպորտային համակարգի արդիականացմանն ուղղված փոփոխությունները, ի վերջո, չհանգեցրին իրավիճակի ակնկալվող բարելավմանը։ Կանգառներում տրանսպորտին սպասելը որոշ դեպքերում կարող է տևել 40-45 րոպե։ Միևնույն ժամանակ, նույնիսկ երկար սպասելուց հետո ուղևորները հաճախ ստիպված են երթևեկել կանգնած՝ գերբեռնված ավտոբուսում, գործնականում միմյանց կպած։ Եվ այս ամենը տեղի է ունենում ուղեվարձի բարձրացմանը զուգահեռ։ Ստացվում է, որ մարդիկ ավելի շատ են վճարում, բայց շարունակում են բախվել երկար սպասման և գերբեռնված ավտոբուսների ու մետրոյի խնդրին։ Այս ֆոնին հաճախ կոնֆլիկտներ են առաջանում ինչպես ուղևորների միջև, այնպես էլ ուղևորների և վարորդների միջև։ Լարվածության լրացուցիչ աղբյուր է դարձել վալիդատորների կիրառմամբ ուղեվարձի վճարման նոր համակարգը։ Դրա հետևանքով խցանումներ են առաջանում նաև տրանսպորտային միջոց նստելու փորձի ժամանակ․ հերթեր են գոյանում, իսկ ավտոբուսները ստիպված են ավելի երկար կանգնել կանգառներում՝ սպասելով, մինչև բոլոր ուղևորները ներս մտնեն։ Միևնույն ժամանակ, վալիդատորները միշտ չէ, որ անմիջապես են աշխատում։ Վճարման ժամանակ առաջացող խափանումները հանգեցնում են լրացուցիչ ուշացումների և դառնում ուղևորների ու վարորդների միջև վեճերի ևս մեկ պատճառ։

Նմանատիպ խնդիրներ նկատվում են նաև Երևանի մետրոպոլիտենում։ Պիկ ժամերին շարժակազմը հարթակ է ժամանում ընդամենը երկու վագոնով։ Արդյունքում ուղևորները ստիպված են լինում բաց թողնել հինգ, երբեմն էլ վեց գնացք, նախքան կարողանում են ինչ-որ կերպ մտնել վագոն։ Պիկ ժամերին վագոններն այնքան գերբեռնված են լինում, որ ուղևորները ստիպված են երթևեկել՝ փաստացի «ձկնիկները տոմատի մեջ» վիճակում։ Իսկ եթե տեխնիկական խափանումներ են տեղի ունենում կամ գնացքների միջև ընդմիջումները մեծանում են, հարթակներում արագորեն մեծ թվով մարդիկ են կուտակվում։

Ավելացնենք, որ դեռևս 2025 թվականին Երևանի քաղաքապետ Տիգրան Ավինյանը հայտարարել էր, որ մայրաքաղաքում խցանումների խնդիրը կլուծվի հասարակական տրանսպորտի որակի բարելավման հաշվին։ Մասնավորապես՝ Երևանի մետրոպոլիտենի արդիականացման ծրագրի իրականացման միջոցով, որի շրջանակում պետք է կառուցվեր «Աջափնյակ» նոր կայարանը։ Սակայն մինչ օրս ոչ նոր մետրոյի կայարանն է կառուցվել, ոչ էլ վերականգնվել է մետրոպոլիտենի աշխատանքի նախկին՝ լրջորեն խախտված ժամանակացույցը, որը նախկին իշխանությունների օրոք աշխատում էր ժամացույցի պես։ Արդյունքում մայրաքաղաքի պաշտոնյաների կողմից մշակված երթևեկության կարգավորման նոր կանոնները քաղաքը ներքաշում են էլ ավելի մեծ խցանումների մեջ։ Իրավիճակն ավելի է բարդանում նաև նրանով, որ մայրաքաղաքի ճանապարհների կեսը փորված է այս ու այն կողմ կառուցվող բարձրահարկ շենքերի ֆոնին, որոնց համար անհրաժեշտ է ենթակառուցվածքների անցկացում։ Այս ամենի հետևանքով քաղաքը հայտնվել է տրանսպորտային կոլապսի մեջ։ Այժմ Երևանում խցանումներ են դիտվում ոչ միայն պիկ ժամերին։