Yerevan Fashion Week 2026-ը կանցկացվի «Վարդագույն քաղաք Երևան» հայեցակարգով՝ ի պատիվ Հայաստանի մայրաքաղաքի ծննդյան օրվա

ԱրմԻնֆո.  Երևանը չորրորդ անգամ մեկ հարթակում կհամախմբի հայ և միջազգային դիզայներների, համաշխարհային նորաձևության լրատվամիջոցների ներկայացուցիչների, բայերների և fashion-ոլորտի այլ ներկայացուցիչների՝ Երևանյան նորաձևության շաբաթը (Yerevan Fashion Week- YFW) անցկացնելու համար։

Միջոցառումը կանցկացվի հոկտեմբերի 8-ից 11-ը և կազմակերպվում է Հայաստանի նորաձևության պալատի կողմից՝ տեղական և միջազգային գործընկերների աջակցությամբ։ Գլխավոր հովանավորը Երևանի քաղաքապետարանն է։

YFW 2026-ը կներկայացնի ավելի քան 20 ցուցադրություն և շնորհանդես, YFW-ի շոուրում, Fashion Talks, ցուցահանդեսներ, հատուկ ինստալյացիաներ և մասնագիտական կապերի հաստատման հնարավորություններ՝ Երևանը դիրքավորելով որպես նորաձևության և ստեղծարարության զարգացող կենտրոն Եվրոպայի և ողջ տարածաշրջանի խաչմերուկում։

Հյուրերի համար նախատեսված միջազգային ծրագիրը կհամախմբի նորաձևության լրատվամիջոցների ներկայացուցիչների և ոլորտի մասնագետների, այդ թվում՝ այնպիսի հրատարակությունների ներկայացուցիչների և հեղինակների, ինչպիսիք են Vogue-ը, Harper's BAZAAR-ը, ELLE-ը, FashionUnited-ը, Metal Magazine-ը և Fucking Young!-ը, ինչպես նաև անկախ նորաձևության լրագրողների, ոճաբանների, բայերների, հասարակայնության հետ կապերի մասնագետների և ստեղծարար խորհրդատուների։

Այս տարի Երևանյան նորաձևության շաբաթի ծրագիրը կառուցված է <Վարդագույն քաղաք Երևան> հայեցակարգի շուրջ, քանի որ այս օրերին Հայաստանի մայրաքաղաքը կնշի իր 2808-ամյակը։

Հոկտեմբերի 8-ին պաշտոնական բացման շրջանակում Էրեբունի պատմահնագիտական արգելոց-թանգարանում և ամրոցում կներկայացվի հատուկ նորաձևության և մշակութային ինստալյացիա՝ <Հին աստվածներ. Էրեբունիից մինչև ժամանակակից Երևան>։ Ինչպես ԱրմԻնֆոյին հայտնել են Նորաձևության պալատում, բացման օրը կներկայացվեն Fashion Scout Armenia նախագծի երիտասարդ հայ դիզայներների ընտրված աշխատանքները։ Հին հայկական դիցաբանությունից, խորհրդանիշներից, պատմական դեմքերից և լեգենդներից ոգեշնչված ինստալյացիան երկխոսություն կստեղծի ժամանակակից նորաձևության և հնագիտական լանդշաֆտի միջև։ Fashion Scout Armenia-ի չորրորդ թողարկման հաղթողները հնարավորություն կստանան հանդես գալ Լոնդոնի նորաձևության շաբաթում, կրթաթոշակ ստանալ Polimoda-ում սովորելու համար և արժանանալ քաղաքապետի մրցանակին։

Հոկտեմբերի 9-ից 11-ը կանցկացվի YFW Showroom-ը, որտեղ կներկայացվեն հագուստի, աքսեսուարների և ոսկերչական իրերի ավելի քան 30 հայկական բրենդների հավաքածուներ։

YFW-ի շրջանակում կանցկացվեն ավանդական քննարկումներ՝ հայ և միջազգային փորձագետների մասնակցությամբ՝ Fashion Talks, որոնք նվիրված կլինեն շուկա դուրս գալուն, ձեռնարկատիրությանը, կայուն զարգացմանը, տեխնոլոգիաներին, հաղորդակցություններին և նորաձևության ապագային։

<Երևանյան նորաձևության շաբաթը նպաստում է Հայաստանի ստեղծարար տնտեսության և մշակութային զբոսաշրջության զարգացմանը՝ օտարերկրյա հյուրերին ծանոթացնելով երկրի նորաձևությանը, ճարտարապետությանը, մշակութային ժառանգությանը, ժամանակակից արվեստին, գաստրոնոմիային և ստեղծարար համայնքներին>, - ասվում է Նորաձևության պալատի հաղորդագրության մեջ։

Հիշեցնենք, որ Հայաստանի նորաձևության պալատը ներկայացնում է ավելի քան 250 դիզայներների, բրենդների, արտադրողների և ստեղծարար մասնագետների ցանց և կրթական ծրագրերի, միջազգայնացման, կայուն զարգացման և շուկաներ դուրս գալու նախաձեռնությունների միջոցով աշխատում է Հայաստանի նորաձևության էկոհամակարգի ամրապնդման ուղղությամբ։