Փաշինյանը շնորհավորել է Տոկաևին՝ ընտրությունները հաջող անցկացնելու կապակցությամբ

Արմինֆո.Տեղի է ունեցել վարչապետ Նիկոլ Փաշինյանի հեռախոսազրույցը Ղազախստանի Հանրապետության նախագահ Կասիմ–Ժոմարտ Տոկաևի հետ։

ՀՀ կառավարության հաղորդագրության համաձայն, վարչապետը շնորհավորել է Ղազախստանի նախագահին՝ Կուրուլտայի ընտրությունների հաջող անցկացման առիթով։ Նիկոլ Փաշինյանը նշել է, որ քվեարկության համոզիչ արդյունքները հաստատում են Ղազախստանի քաղաքացիների լայն աջակցությունը Կասիմ–Ժոմարտ Տոկաևի կողմից իրականացվող բարեփոխումների ընթացքին:

Ղազախստանի նախագահը շնորհակալություն է հայտնել շնորհավորանքների և ջերմ բարեմաղթանքների համար՝ ընդգծելով Ղազախստանի և Հայաստանի միջև բազմաոլորտ համագործակցությունը զարգացնելու կարևորությունը։

Զրուցակիցները մտքեր են փոխանակել նաեւ տարածաշրջանային տրանսպորտային ծրագրերի իրականացման գործում համագործակցելու հնարավորությունների շուրջ։

Հայաստանի վարչապետը եւ Ղազախստանի նախագահը պայմանավորվել են քննարկումները շարունակել առաջիկա հարմար առիթներով, մասնավորապես, Ղազախստանի նախագահի՝ հոկտեմբերին Հայաստան կատարելիք այցի շրջանակներում։

Նշենք, որ Ղազախստանի ԿԸՀ նախնական արդյունքների համաձայն,  Ղազախստանի նոր միապալատ խորհրդարանի ընտրություններում հաղթանակ է տարել "Ադիլետ" ("Արդարություն") կուսակցությունը՝ ձայների 71,17 տոկոսով: Մինչև սահմանադրական փոփոխությունները Ղազախստանում երկու օրենսդիր պալատ կար՝ Մաժիլիսը (ստորին) և Սենատը (վերին)։ Երկրորդ տեղում "Աուիլ" ("Գյուղ") կուսակցությունն է՝ 6,26 տոկոսով, երրորդ տեղում Respublica կուսակցությունն է՝ 5,56 տոկոսով, "Ակ Ժոլ" կուսակցությունը ՝ 5,21 տոկոսով եւ Համազգային Սոցիալ - դեմոկրատական կուսակցությունը ՝ 5,11 տոկոսով: Մնացած քաղաքական ուժերը չեն հաղթահարել օրենսդիր մարմնում անհրաժեշտ 5 տոկոսի շեմը։ Պատգամավոր կարող է դառնալ Ղազախստանի 25 և բարձր տարիքի քաղաքացին, ով հանրապետությունում բնակվում է, առնվազն, վերջին տասը տարին։