«Մայր Հայաստան». ԵՄ չինովնիկները Նիկոլ Փաշինյանի միջոցով հիբրիդային պատերազմ են վարում Ռուսաստանի դեմ՝ Հայաստանի շահերի հաշվին 

Արմինֆո. Հայաստանի վարչապետ Նիկոլ Փաշինյանի նոր հիբրիդային արկածախնդրության գինը, որն արտահայտվում է երկրում ընդդիմադիր գործիչների կալանավորմամբ, շատ ավելի ծանր է լինելու, ու կրկին օգտվելու է թուրքական աշխարհը։ Այդ մասին, ԱրմԻնֆո-ին տրամադրված հաղորդագրության համաձայն, հայտարարել են "Մայր Հայաստան" կուսակցությունում, հիշեցնելով, որ շուտով կսկսվի դատական գործընթաց քաղաքական ուժի առաջնորդ Անդրանիկ Թևանյանի և կուսակցության վարչության անդամ Արեգնազ Մանուկյանի նկատմամբ:

«Մայր Հայաստան» կուսակցության նախագահ Անդրանիկ Թևանյանի և կուսակցության վարչության անդամ Արեգնազ Մանուկյանի դեմ Նիկոլ Փաշինյանի ապօրինի հանձնարարությամբ «կարված» գործի դատավարությունը շուտով կմեկնարկի։ Այն ունենալու է պատմական և ճակատագրական նշանակություն, քանի որ ոչ այնքան քաղբանտարկյալներ Թևանյանին ու Մանուկյանին է վերաբերում, որքան առնչվում է Հայաստանի Հանրապետության անվտանգությանը, տարածքային ամբողջականությանը, հայ-ռուսական, հայ-ադրբեջանական, հայ-թուրքական հարաբերություններին, ԵՄ չինովնիկների կողմից Ռուսաստանի Դաշնության դեմ Նիկոլ Փաշինյանի միջոցով և ՀՀ շահերի հաշվին իրականացվող հիբրիդային պատերազմին։

Այս դատավարությունն աննախադեպ է լինելու իր հիբրիդային բնույթով և ուղղակի ազդեցություն է ունենալու Հայաստանի, ՀՀ յուրաքանչյուր քաղաքացու վրա։

Դատելով գործի քաղաքական ենթատեքստից՝ Անդրանիկ Թևանյանը փաստացի մեղադրվում է՝  ընդդիմադիր գործունեություն ծավալելու և իշխանափոխությանն ուղղված ջանքեր գործադրելու, այդ թվում՝ Գյումրիում ՔՊ-ի իշխանազրկմանը նպաստելու;  հայ-ռուսական ռազմավարական և դաշնակցային հարաբերություններին կողմ լինելու, այդ հարաբերությունները փչացնող փաշինյանական իշխանության դեմ ռուսական փորձագիտական, քաղաքական շրջանակների մասնագիտական աջակցությամբ քայլեր իրականացնելու;  թուրք-ադրբեջանական օրակարգը սպասարկող ՀՀ օրվա իշխանության քաղաքականությունը չընդունելու;  սահմանագծման ու սահմանազատման անվան տակ Ադրբեջանի օգտին Հայաստանի միակողմանի զիջումներին դեմ լինելու;  Հայաստանից ռուսական ռազմաբազան դուրս բերելուն դեմ լինելու;  Դոնբասի հայ համայնքի հրավերով «Մայր Հայաստանի» հումանիտար այց կատարելու;  Հայաստանն աշխարհաքաղաքական բախումների թատերաբեմ և հայ ժողովրդին մանրադրամ դարձնելուն դեմ լինելու համար։

Վերը նշված քայլերն ու դիրքորոշումը Փաշինյանի գնահատմամբ լրտեսություն է և պետական դավաճանություն, իսկ մեր գնահատմամբ՝ նշվածին հակառակ քայլերն ու դիրքորոշումն է պետական դավաճանություն։

Այս դատավարությունն աննախադեպ է լինելու նաև այն առումով, որ կայացվելու է աշխարհաքաղաքական և անվտանգային վճիռ։ Խնդիրն այն է, որ Թևանյանի «գործով» ՀՀ օրվա իշխանությունը Ռուսաստանի Դաշնությանը հռչակում է որպես թշնամի, իսկ Ադրբեջանին ու Թուրքիային՝ որպես բարեկամ երկիր։ Եվ դա այն դեպքում, երբ ՌԴ-ն դե յուրե մեր երկրի ռազմավարական դաշնակիցն է, իսկ Թուրքիան և Ադրբեջանը ռազմական գործողությամբ հայաթափել են Արցախն ու հիմա միակողմանի զիջումներ են պահանջում Հայաստանից։

Սիրելի ժողովուրդ, Նիկոլ Փաշինյանն այս հիբրիդային դատավարությամբ գնում է հերթական արկածախնդրության։ 2018թ.-ից մեկնարկած նրա արկածախնդրությունից օգտվեց Ադրբեջանը, և մենք կորցրեցինք Արցախը, 120 հազար հայ էթնիկ զտման ենթարկվեց։

Փաշինյանի այս նոր հիբրիդային արկածախնդրության գինը շատ ավելի ծանր է լինելու, ու կրկին օգտվելու է թուրքական աշխարհը։

Դատավարությունը ցույց կտա, թե որ ուղղությամբ է շարժվելու Հայաստանը։

Ազատություն Անդրանիկ Թևանյանին։ Ազատություն Արեգնազ Մանուկյանին։ Ազատություն բոլոր քաղբանտարկյալներին։ Կեցցե՛ Հայաստանի Հանրապետությունը», - ասվում է

«Մայր Հայաստան» կուսակցության հաղորդագրությունում։

Հիշեցնենք, որ մայիսի 21-ին Հայաստանի քննչական կոմիտեն (ՔԿ) հայտարարեց Անդրանիկ Թևանյանի դեմ քրեական գործ հարուցելու մասին՝ «պետական դավաճանության և լրտեսության» մեղադրանքով։ Թևանյանը մեղադրվում է պետական գաղտնիք պարունակող տեղեկություններ 622,000 դոլարով օտարերկրյա պետությանը փոխանցելու մեջ։ Մայիսի 24-ի գիշերը Թևանյանը դատարանի որոշմամբ երկու ամսվա կալանքի տակ է հայտնվել։ Ավելին, ըստ Թևանյանի փաստաբան Արամ Օրբելյանի, այդ ժամանակ իր պաշտպանյալին կալանքի տակ պահելու իրավական հիմքեր չեն եղել։ Պետք է ավելացնել։ որ ընդդիմադիր գործիչը կալանավորվել է ՀՀ ներկայիս վարչապետ Նիկոլ Փաշինյանի անմիջական հրամանով։ Թևանյանն ինքը քննության պնդումները անվանել է աբսուրդ՝ նշելով, որ ինքը հրաժարվել է պատգամավորական մանդատից դեռևս 2023 թվականին, ուստի քննչական կոմիտեի նման պնդումները անհիմն են։ Հուլիսի 9-ին «Մայր Հայաստան» կուսակցության քաղաքական խորհրդի անդամ և ՀՀ խորհրդարանի նախկին պատգամավոր Արեգնազ Մանուկյանը կալանավորվել է, ապա երկամսյա կալանքի ենթարկվել։ Քննչական կոմիտեի տվյալներով՝ Արեգնազ Մանուկյանի նկատմամբ հարուցվել է քրեական հետապնդում Քրեական օրենսգրքի 427-րդ հոդվածի 1-ին մասով (պետական գաղտնիք պարունակող տեղեկատվության հրապարակում)։ Քննչական գործողությունները կատարվել են լրտեսության և պետական դավաճանության քրեական գործի շրջանակներում, որի շրջանակներում նախկինում ձերբակալվել էր «Մայր Հայաստան» կուսակցության առաջնորդ Անդրանիկ Թևանյանը։ Մանուկյանը կասկածվում է Թևանյանին ՀՀ զինված ուժերի վերաբերյալ գաղտնի տեղեկատվություն փոխանցելու մեջ, որը ներկայացվել է խորհրդարանում փակ նիստում։

Օգոստոսի 18-ին գործի քննությունն ավարտվել է, և նյութերն ուղարկվել են դատարան, սակայն և՛ Թևանյանը, և՛ Մանուկյանը շարունակում են մնալ նախաքննության փուլում։ կալանքը։