Հայաստանի դեսպանը ծանոթացել է Փարիզի ռազմական ակադեմիայի կրթական պայմաններին

Արմինֆո. Ֆրանսիայում Հայաստանի դեսպան Արման Խաչատրյանը հանդիպել է Փարիզի ռազմական ակադեմիայի (Ecole de Guerre) տնօրեն, գեներալ Վինսենթ Բրետոնի հետ:

Վերջինս հայ դեսպանին պատմել է բարձրագույն ռազմական ուսումնական հաստատության առաքելության, կրթական ծրագրերի և միջազգային համագործակցության հիմնական ուղղությունների մասին:

Ինչպես հայտնում է Ֆրանսիայում Հայաստանի դեսպանության մամուլի ծառայությունը, կողմերը փոխադարձ գոհունակություն են հայտնել այն փաստի կապակցությամբ, որ այս տարի Հայաստանի զինված ուժերի առաջին ներկայացուցիչն ավարտել է Ակադեմիայի ռազմավարական պատրաստության դասընթացը, ինչը կարևոր քայլ է երկու երկրների միջև ռազմական կրթության ոլորտում համագործակցության զարգացման գործում: Նաև նշվել է, որ այս տարի Ակադեմիայում ուսում է անցնում ևս մեկ սպա Հայաստանից։

Խաչատրյանը մեծապես կարևորել է Հայաստանի և Ֆրանսիայի միջև պաշտպանական ոլորտում համագործակցության շարունակական զարգացումը՝ ընդգծելով, որ այն նոր մակարդակ է ձեռք բերել մայիսի 4-5-ը Ֆրանսիայի Հանրապետության նախագահ Էմանուել Մակրոնի՝ Հայաստան կատարած պետական այցից հետո, որի ընթացքում ստորագրվել է Հայաստանի և Ֆրանսիայի միջև ռազմավարական գործընկերության մասին հռչակագիրը:

Հայաստանի դեսպանը բարձր է գնահատել ռազմական կրթության, մասնագիտական պատրաստության և փորձի փոխանակման դերը երկու երկրների պաշտպանական համագործակցության հետագա ամրապնդման գործում: Կողմերը մտքեր են փոխանակել նշված ոլորտներում համագործակցության նոր հնարավորությունների շուրջ։

Խաչատրյանն անդրադարձել է նաև Հարավային Կովկասում հաստատված խաղաղության հետագա ինստիտուցիոնալացմանն ուղղված Հայաստանի Հանրապետության ջանքերին։

Նշենք, որ դեռևս 2023 թվականի սեպտեմբերի 27-ին Ֆրանսիայի այն ժամանակվա արտգործնախարար Կատրին Կոլոնան հայտարարել էր Երևանում Ֆրանսիայի ռազմական կցորդի նշանակման մասին՝ երկկողմ պաշտպանական համագործակցությունն էլ ավելի ամրապնդելու նպատակով։

Իսկ արդեն հոկտեմբերի սկզբին Ֆրանսիան դրական արձագանքեց Ադրբեջանից բխող սպառնալիքի ֆոնին ռազմական օգնություն տրամադրելու Հայաստանի խնդրանքին։ Հոկտեմբերի 22-23-ին Փարիզում Ֆրանսիայի պաշտպանական գերատեսչության ղեկավար Սեբաստիեն Լեկորնյուի և Հայաստանի պաշտպանության նախարար Սուրեն Պապիկյանի հանդիպմանը հաղորդվեց Երևանին զենքի մատակարարման մասին համաձայնագրի ձեռքբերման մասին։ Այն ժամանակ ստորագրվեցին Երևանին Thales Ground Master 200 (GM200) երեք ռադարների մատակարարման պայմանագրեր և Mistral փոքր հեռահարության ՀՕՊ համակարգերի մատակարարման փոխըմբռնման հուշագիր: Երկրորդ պայմանագիրը վերաբերում էր Երևանի կողմից Safran արտադրության գիշերային տեսանելիության հեռադիտակների, սարքավորումների ձեռքբերմանը: Ֆրանսիան Հայաստանին արդեն մատակարարել է «Բաստիոն» տիպի 24 թեթև զրահամեքենա։ Ընդհանուր առմամբ, Հայաստանը կստանա 50 այդպիսի մեքենա։