Զախարովան՝ Հայաստանի իշխանություններին. Եվրոպական երազանքի փոսում արդեն մեկից ավելի կմախք է թավալվում

Արմինֆո.Եվրոպական միությանը (ԵՄ) և Եվրասիական տնտեսական միությանը (ԵԱՏՄ) Հայաստանի անդամակցության հետ կապված բոլոր հարցերի քննարկումը տեղի կունենա մայիսի 29-ին Աստանայում՝ Բարձրագույն եվրասիական տնտեսական խորհրդի նեղ կազմով նիստում։ Այս մասին մայիսի 28-ին ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Ցանկանում էի ևս մեկ անգամ ընդգծել, որ Հայաստանի ղեկավարության այն դիրքորոշումը, թե Երևանը կմնա ԵԱՏՄ-ում այնքան ժամանակ, քանի դեռ ընթանում է ԵՄ-ին միանալու գործընթացը, ռուսական կողմի համար անընդունելի է»,- ասել է ռուս դիվանագետը։

Նա հիշեցրել է, որ վերջին 10 տարիների ընթացքում ԵԱՏՄ-ն Հայաստանին քիչ բան չի տվել՝ բարձր աճի տեմպերից մինչև գնաճի ցածր մակարդակ, կայուն ազգային արժույթ և իրացման մեծ շուկա։

«Այնուամենայնիվ, հույս ունենք, որ Երևանը կգնա պրագմատիզմի ճանապարհով. սա ոչ թե այլ երկրների հանդեպ սիրո մասին է, այլ սեփական անձի հանդեպ սիրո։ Եվ այնտեղ պրագմատիզմն ու իմաստնությունը կհաղթեն հույզերին ու օտար շահերին։ Ավելի լավ է երևի ասել՝ ուրիշի շահերին, որոնք գործող իշխանություններին տանում են դեպի անիմաստ, իսկ ամենակարևորը՝ վտանգավոր վազք՝ եվրոպական երազանքի հետևից։ Այդ նույն եվրոպական երազանքի փոսում արդեն մեկից ավելի կմախք է թավալվում»,- եզրափակել է Զախարովան։

Ղազախստանում մայիսի 28-ին և 29-ին նախատեսված է ԵԱՏՄ գագաթնաժողով՝ միության անդամ պետությունների ղեկավարների մակարդակով, սակայն Հայաստանի վարչապետ Նիկոլ Փաշինյանը պաշտոնապես հայտարարել է, որ նախընտրական քարոզարշավի պատճառով չի մեկնելու գագաթնաժողովին։

Մայիսի 9-ին Ռուսաստանի նախագահ Վլադիմիր Պուտինը լրագրողների հետ զրույցում Հայաստանին առաջարկել էր որքան հնարավոր է շուտ կողմնորոշվել ԵՄ-ին և ԵԱՏՄ-ին անդամակցության հարցում՝ նշելով, որ անհրաժեշտության դեպքում պատրաստ են «քաղաքակիրթ ամուսնալուծություն սկսել»։ Երևանում ի պատասխան նշել են, որ կլքեն ԵԱՏՄ-ն, երբ հարմար գտնեն։

Նշենք, որ Հայաստանի կառավարությունը 2025 թվականի հունվարի 9-ին հավանություն է տվել «Եվրաքվե» քաղաքացիական նախաձեռնության կողմից առաջարկված Եվրոպական միությանն անդամակցելու գործընթացը սկսելու մասին օրենքի նախագծին։ Նախագիծն ուղարկվել էր Հայաստանի խորհրդարան՝ հաստատման։ Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը։ Փաստաթուղթը ստորագրվել է նույն թվականի ապրիլի 4-ին։ Մոսկվայում հայտարարել են, որ Ռուսաստանը Հայաստանին հասցրել է այն միտքը, որ Եվրասիական տնտեսական միությանը և Եվրոպական միությանը միաժամանակյա անդամակցությունն անհնար է։