Դուրս մնաց պայքարից, բայց փայլեց բեմում. Սիմոնի վառ ելույթը Եվրատեսիլում

Արմինֆո.Հայաստանը երրորդ անգամ չի կարողացել անցնել "Եվրատեսիլի" եզրափակիչ։ Երիտասարդ կատարող Սիմոնը, ով մրցույթի կիսաեզրափակչում 6-րդ համարի ներքո ելույթ է ունեցել Paloma Rumba երգով, բավարար միավորներ չի հավաքել եզրափակիչ դուրս գալու համար:

Սիմոնի համար երգը գրել է կոմպոզիտոր Լիլիթ Նավասարդյանը, ով հայտնի է տարիներ առաջ մրցույթի համար մի քանի երգի ստեղծմամբ, այդ թվում՝ LoveWave-ը Իվետա Մուկուչյանի համար՝ 2016 թվականին, և Not Alone-ը Արամ ՄՊ3-ի համար, 2014 թվականին ։ Տեքստի հեղինակներն են "Եվրատեսիլ-2022" - ում Հայաստանը ներկայացնող Ռոզա Լինը, Դավիթ Ծերունյանը և Եվա Ոսկանյանը: Կոմպոզիցիայի պրոդյուսերներն են Լիլիթ Նավասարդյանը և Դավիթ Ծերունյանը ։

Չնայած Հայաստանի մասնակցությունն ավարտվել է կիսաեզրափակիչ փուլում, Սիմոնի ելույթը վառ տպավորություն է թողել: Երիտասարդ արտիստը ցուցադրել է վստահ և եռանդուն կատարում ՝ ներդաշնակորեն համադրելով վոկալը, արտահայտիչ խորեոգրաֆիան և բեմական հմայքը: Սիմոնի համարն աչքի էր ընկնում իր դինամիկայով, բեմական արտահայտման ազատությամբ և խարիզմայով, ինչը հնարավորություն է տվել ըստ արժանվույն ներկայացնել Հայաստանը միջազգային ասպարեզում: Հարկ է նշել նաև, որ նրա ելույթը լիովին համապատասխանում էր "Եվրատեսիլի" ոգուն։

Հիշեցնենք, որ մինչև 2026 թվականը Հայաստանը մրցույթի եզրափակիչ փուլ չի անցել միայն 2011 և 2018 թվականներին: 2011 թվականին երկիրը ներկայացրել է Էմմա Միքայելյանը՝ «Բում Բում» երգով, որը կիսաեզրափակչում զբաղեցրել է 12-րդ հորիզոնականը: 2018 թվականին Հայաստանը ներկայացրել է Սևակ Խանաղյանը՝ «Քամի» երգով, ով կիսաեզրափակչում զբաղեցրել է 15-րդ հորիզոնականը:

Նշենք, որ "Եվրատեսիլ-2026" -ի եզրափակչին կմասնակցեն Մոլդովան, Շվեդիան, Իսրայելը, Բելգիան, Հունաստանը, Լեհաստանը, Լիտվան, Ֆինլանդիան, Սերբիան, Խորվաթիան, Ռումինիան, Չեխիան, Դանիան, Մալթան, Նորվեգիան, Ուկրաինան, Բուլղարիան, Ավստրալիան, Կիպրոսը, Ալբանիան, ինչպես նաև մրցույթի հիմնադիր հինգ երկրները ՝ Ֆրանսիան, Գերմանիան, Իտալիան, Իսպանիան, Մեծ Բրիտանիան և այս տարի մրցույթը հյուրընկալող երկիրը ՝ Ավստրիան: Եզրափակիչը կկայանա մայիսի 16-ին: