Ծառուկյան․ Հայաստանի քաղաքացիները պետք է ընտրություն կատարեն և վերջ դնեն այն ամենին, ինչ կատարվում է երկրում

Արմինֆո.Հայաստանի քաղաքացիները պետք է կատարեն իրենց ընտրությունը և վերջ դնեն այն ամենին, ինչ այսօր տեղի է ունենում երկրում։ Այդ մասին նախընտրական քարոզարշավի ընթացքում հայտարարել է ԲՀԿ առաջնորդ Գագիկ Ծառուկյանը՝ Տավուշի մարզի Նոյեմբերյան համայնքի բնակիչների հետ հանդիպմանը։

Կուսակցության առաջնորդը կարծում է, որ այն իրավիճակը, որում հայտնվել է Հայաստանը, երկրի սխալ կառավարման արդյունք է: "Այսօր պաշտոններ են ստանում մարդիկ, ովքեր ոչ անցյալ ունեն, ոչ փորձ։ Սա է գլխավոր խնդիրը: Սակայն անլուծելի խնդիրներ չկան", - վստահ է Ծառուկյանը։

Նրա խոսքով՝ Հայաստանի քաղաքացիներն այսօր թաղված են պարտքերի մեջ, բայց այդ խնդիրը ոչ ոք չի լուծում։ "Պետությունը պետք է մտածի այդ մասին և ճիշտ որոշումներ կայացնի ։ Այն պետք է աշխատանքով ապահովի քաղաքացիներին և ների նրանց վարկերը։ Հայաստանում կա մոտ 650 000 ընտանիք և 2 մլն 450 հազար վարկառու։ Իսկ պետությունն ինքը 15 մլրդ դոլարի պարտք ունի, ահա թե իրականում ինչ վիճակում է մեր երկիրը", - ուշադրություն է հրավիրել ԲՀԿ առաջնորդը։

Ծառուկյանը կարծում է, որ Հայաստանի քաղաքացիներին պետք է հնարավորություն տալ շունչ քաշել և սկսել բարեկեցիկ ապրել։ Սակայն, դրա փոխարեն, ըստ նրա, տպավորություն է ստեղծվում, որ Հայաստանը վերածել են բանտարկյալների երկրի, որոնց մի մասը գտնվում է տնային կալանքի տակ: "Մենք ունենք և ցանկություն, և հնարավորություններ, և պրոֆեսիոնալ թիմ, որը կարող է լուծել այդ խնդիրները։ Մեզ համար կարեւոր կլինի ոչ թե կուսակցական պատկանելությունը, այլ՝ միայն մարդու անձը, նրա փորձն ու արդյունքը", - վստահեցրել է կուսակցության առաջնորդը։

Ծառուկյանը վստահ է, որ միայն այդ դեպքում Հայաստանին կրկին կհարգեն, և երկիրը կվերադարձնի իր երբեմնի հզորությունը։ "Մնալով այն իրավիճակում, որում հայտնվել ենք այսօր, առաջ չես գնա։ Ողջ աշխարհում մենք ունենք ազդեցիկ հայրենակիցներ, ովքեր ցանկանում են օգտակար լինել իրենց երկրին։ Պետք է կարողանալ նրանց հետ շփվելիս ճիշտ մոտեցում գտնել ՝ հրավիրել նրանց երկիր, քննարկումներ անցկացնել և այդ հնարավորություններն օգտագործել մեր երկրի զարգացման համար", - եզրափակել է Ծառուկյանը:

Հիշեցնենք, որ հունիսի 7-ին Հայաստանում հերթական խորհրդարանական ընտրություններին մասնակցում է 19 քաղաքական ուժ ՝ 17 կուսակցություն և 2 դաշինք: