Հունաստանի նախագահ. պատմական հիշողությունը պահանջում է մշտական զգոնություն, որպեսզի պատմության ողբերգական իրադարձությունները երբեք չկրկնվեն

Արմինֆո.Հունաստանի նախագահ Կոնստանտինոս Տասուլասը հանդես է եկել հայտարարությամբ Հայոց ցեղասպանության 111-րդ տարելիցի կապակցությամբ:

Հունաստանի նախագահի կայքում հրապարակված ուղերձում ընդգծվում է, որ հայ և հույն ժողովուրդները կապված են հավերժական կապերով, որոնք ձևավորվել են ընդհանուր փորձություններով, ինչպես նաև համերաշխության, բարեկամության և փոխադարձ հարգանքի ամուր հարաբերություններով:

"Այսօր՝ մարդկության դեմ ամենասարսափելի ոճրագործություններից մեկի ՝ Օսմանյան կայսրության կողմից իրականացված Հայոց ցեղասպանության 111-րդ տարելիցին, մենք հարգանքի տուրք ենք մատուցում 1,5 միլիոն զոհերի հիշատակին", - նշել է Հունաստանի նախագահը, հավելելով, որ այդ հիշողությունն անսասան պարտականություն է ինչպես զոհերի, այնպես էլ պատմական ճշմարտության առջև, որպեսզի մոռացությունը չդառնա ռևիզիոնիզմի, բռնության և անհանդուրժողականության աղբյուր:

Կոնստանտինոս Տասուլասը նշել է, որ ժամանակակից միջազգային աշխարհում, որը բնութագրվում է ճգնաժամերով, հակամարտություններով և անորոշություններով, խաղաղության, փոխըմբռնման և ժողովուրդների միջև համագործակցության հանձնառությունն ավելի մեծ նշանակություն է ստանում: "Պատմական հիշողությունը պահանջում է մշտական զգոնություն, որպեսզի պատմության ողբերգական իրադարձությունները երբեք չկրկնվեն", - հայտարարել է Կոնստանտինոս Տասուլասը: