"Ուժեղ Հայաստան". կուսակցության ձերբակալված համակիրներն առայժմ կարգավիճակ չունեն

Արմինֆո. Ոստիկանության ուժերով բերման ենթարկված "Ուժեղ Հայաստան" կուսակցության 17 համակիրները դեռևս կարգավիճակ չունեն, նրանց նկատմամբ արձանագրություններ չեն կազմվել։ Այդ մասին լրագրողների հետ զրույցում հայտարարել է "Ուժեղ Հայաստան" կուսակցության մամուլի քարտուղար Մարիաննա Ղահրամանյանը։

Նրա խոսքով՝ Հակակոռուպցիոն դատարանի շենքի մոտից բերման ենթարկված քաղաքական ուժի կողմնակիցները, որտեղ ընթանում է կուսակցության ղեկավար Սամվել Կարապետյանի գործով նիստը, արդեն ավելի քան 2,5 ժամ ապօրինի պահվում են: "Ձերբակալությունների փաստը, ինչպես նաև օրեր առաջ տեղի ունեցած դեպքերը հաստատում են մեր պնդումները, որ Հայաստանի իշխանությունները խուճապի մեջ են, վախեցած են։ Այդ գործիքակազմը (ձերբակալությունները - խմբ.) նրանց ձեռքում վերածվել է խաղալիքի, որը նրանք փորձում են օգտագործել որպես ճնշման մեթոդ", - հայտարարել է Ղահրամանյանը։

Ինչպես ավելի վաղ հաղորդել էր ԱրմԻնֆո-ն, "Ուժեղ Հայաստան" կուսակցության ղեկավար Սամվել Կարապետյանի կողմնակիցների և ոստիկանների միջև բախումների հետևանքով հակակոռուպցիոն դատարանի շենքի մոտ ձերբակալվել է 17 մարդ: Քաշքշոցի հետևանքով տուժել են նաև լրագրողներ։ Նշենք, որ նիստի ընթացքում առաջնահերթ կարգով քննարկվում է գործարարի խափանման միջոցի հարցը:

Հիշեցնենք, որ ապրիլի 15-ին առաջին դատական նիստի ժամանակ դատախազը միջնորդել էր ևս երեք ամսով երկարաձգել Կարապետյանի տնային կալանքը: Պաշտպանական կողմը պահանջել է չեղարկել իրենց պաշտպանյալի նկատմամբ բոլոր սահմանափակող միջոցները։ Սամվել Կարապետյանի գործը քննում է դատավոր Վահե Դոլմազյանը, ով հայտնի է մի շարք աղմկահարույց գործերով: Կարապետյանի գործով դատական նիստը չի հեռարձակվի: Նման որոշում է կայացրել դատավորը՝ Կարապետյանի պաշտպանների միջնորդության հիման վրա։

Հավելենք, որ մարտի 27-ին ՀՀ Քննչական կոմիտեն հաղորդել էր, որ ավարտվել է գործարարի նկատմամբ հարկերից խուսափելու, փողերի լվացման, առանձնապես խոշոր չափերով գույքի հափշտակության հատկանիշներով հարուցված քրեական գործի նախաքննությունը: Նրան մեղադրում են նաեւ իշխանությունը զավթելու կոչերի համար։ Գործարարը կալանավորվել էր 2025թ․ հունիսին՝ Հայոց եկեղեցուն աջակցության հայտարարություններից հետո: Նախորդ տարվա դեկտեմբերին Սամվել Կարապետյանի նկատմամբ խափանման միջոցը փոխվել է տնային կալանքի: