Սա իշխանությունների թուլության հերթական դրսևորումն է.  "Ուժեղ Հայաստան"-ում մեկնաբանել են կուսակից կանանց ձերբակալությունը

Արմինֆո. "Ուժեղ Հայաստան" կուսակցության անդամ Գոհար Ղումուշյանի ձերբակալությունից հետո իրավապահ մարմինները բերման են ենթարկել կուսակցության մեկ այլ ներկայացուցչի՝ "Ուժեղ Հայաստան" կուսակցության Վայքի գրասենյակի պատասխանատու Վերժինե Ստեփանյանին: Այդ մասին լրագրողների հետ ճեպազրույցում հաղորդել է կուսակցության մամուլի խոսնակ Մարիաննա Ղահրամանյանը։

Նրա խոսքով՝ առկա տեղեկությունների համաձայն, Ստեփանյանը փաստաբանի հետ հարցաքննվում է Եղեգնաձորի Քննչական կոմիտեում: Ձերբակալության պատճառները, ինչպես նշել է Ղահրամանյանը, մնում են անհայտ։

"Մենք կարող ենք մի բան պնդել․ սա քաղաքական հետապնդում է, իշխանության կողմից մեզ վրա ճնշում գործադրելու փորձ, այդ թվում ՝ մեր կուսակցության կին անդամների միջոցով ։ Սակայն ես նրանց համար վատ լուր ունեմ. մեր կանայք չեն վախենում հետապնդումներից, ինչպես եւ՝ "Ուժեղ Հայաստանը" ։ Մենք կատարվածը գնահատում ենք որպես իշխանությունների թուլության հերթական դրսևորում", - հայտարարել է նա։

Ղահրամանյանը նաև հիշեցրել է, որ Գոհար Ղումուշյանը բազմազավակ մայր է, որի կրտսեր երեխան երկու ամսական էլ չկա, իսկ Վերժինե Ստեփանյանն ունի երկու անչափահաս երեխա: