Փորձագետ․ Մոսկվայում Ռուսսատանի նախագահի հայտարարությունները նպատակ ունեն ազդել Հայաստանի նախընտրական տրամադրությունների վրա

Արմինֆո.Մոսկվայում Հայաստանի վարչապետ Նիկոլ Փաշինյանի հետ հանդիպման ժամանակ Ռուսաստանի նախագահ Վլադիմիր Պուտինի արած հայտարարությունները հասցեագրված էին հայ ընտրողներին և նպատակ ունեն ազդել երկրում նախընտրական տրամադրությունների վրա: Այդ մասին ասվում է ՀՀ ԳԱԱ Հնագիտության և ազգագրության ինստիտուտի ավագ գիտաշխատող, մշակութային մարդաբան Աղասի Թադևոսյանի՝ ԱրմԻնֆո-ին տրամադրված մեկնաբանության մեջ՝ Մոսկվայում Հայաստանի և Ռուսաստանի ղեկավարների ապրիլյան հանդիպման առնչությամբ:

Նրա ասելով՝ Ռուսաստանի նախագահն, ըստ էության, կիրառում էր մտրակի եւ քաղցրաբլիթի մարտավարություն։ «Մի կողմից, նա հնչեցնում էր սպառնալիքներ եւ այդ տիպի խոսույթ, իսկ մյուս կողմից շատ հետաքրքիր էր, որ նա խոսում էր հայ եւ ռուս ժողովուրդների դարավոր բարեկամության եւ այդ բարեկամությունը կարեւորող ավանդույթների մասին։ Դրան զուգահեռ ինքը կարեւորեց եւ շեշտադրեց ռուսաստանցի բիզնեսմեն, ռուսամետ, ինքն այդպես անվանեց, քաղաքական գործչի (Սամվել Կարաապետյան – խմբ․) հանդեպ դրական վերաբերմունք ձեւավորելը։

Եթե փորձենք այս խոսքը մեկ նախադասությամբ ձեւակերպել, ապա կարելի է ասել, որ հարգելի հայ ընտրող, առաջարկում եմ այս ընտրություններում ռուսաստանցի բիզնեսմենին կամ ռուսամետ քաղաքական գործչին, հակառակ դեպքում, եթե այդպես չլինի, կտուժի հայ եւ ռուս բարեկամությունը։ Իսկ եթե տուժի հայ եւ ռուս բարեկամությունները, ապա կյանքի կկոչվեն սպառնալիքները, որոնց մասին ես խոսում էի։ Ի դեպ, պետք է նկատել, որ այս խոսույթն ուղղված էր հայաստանցի ընտրողներին, եւ նախընտրական տրամադրությունների վրա ներգործության նպատակ ունի։

Մյուս խնդիրը նաեւ, ես կուզեի մեկ այլ կարեւոր հանգամանքի վրա ուշադրություն դարձնել։ Իր ողջ խոսքի ընթացքում Ռուսաստանի նախագահը խուսափում էր ՀՀ եւ ՀՀ քաղաքացի արտահայտությունը կիրառելուց, ավելի շատ նա կիրառում էր հայ ժողովուրդ, հայություն, հայկական համայնք եւ նմանատիպ արտահայտություններ։ Ինչը ցույց է տալիս նրա արժեքային մոտեցումները, որ  մեզ համար կարեւոր է ոչ թե Հայաստանի ինքնիշխանություն եւ պետականությունը, այլ Ռուսաստանի հպատակությամբ ապրող հայ ազգությունը։ Հիմա էության, եթե ամփոփենք, ըստ էության կարելի է ասել ինչ է իրենից ներկայացնում, ինչպիսի գնահատական կարելի է տալ այս հռետորաբանությանը, ինքն ամբողջությամբ տեղավորվում է վերջին  շրջանում Հայաստանի հանդեպ իրականացվող հիբրիդային հարձակումների տրամաբանության մեջ։ Եւ ի դեպ, սա իրականացվում է եւ հնչեցվում է նման խոսույթ այդ երկրի առաջին դեմքի մակարդակով։ Ինչ հետեւանքներ կարող է ունենալ սա, կամ արդյոք կարո՞ղ է ունենալ հետեւանքներ, կարելի է ենթադրել, որ այո՛, կունենա եւ դա կարող է այս խոսույթը եւ այս մոտեցումները գեներացվեն ռուսական, այսպես ասած, ռուսամետ եւ ռուսահպատակ տարբեր շրջանակների կողմից գեներացնելու այս ամենը, որպեսզի ազդեն հայ ընտրողի եւ նախընտրական տրամադրությունների վրա։ Ինչ կարելի է անել, պետք է այս ամենին մոտենալ գիտակցաբար եւ չտրվել մանիպուլյացիաների», - ընդգծել է Թադեւոսյանը։

Հիշեցնենք, որ ապրիլի 1-ին Մոսկվայում կայացել են Պուտին-Փաշինյան բանակցությունները ։ Հանդիպումն անցել է բավականին լարված մթնոլորտում, կողմերը փոխադարձ մեղադրանքներ են փոխանակել: Ռուսաստանի ղեկավարն ընդգծել է Մոսկվայի դիրքորոշումը ՀԱՊԿ-ի նկատմամբ Երևանի հավակնությունների, Լեռնային Ղարաբաղի հարցի, ԵՄ-ին Երևանի ինտեգրման և Եվրասիական տնտեսական միության հետ հետագա փոխգործակցության վերաբերյալ: Դիրքորոշում է ներկայացվել նաև Ատոմային էլեկտրակայանի կառուցման և Հայաստանում ռուսաստանցի գործարար Սամվել Կարապետյանին հետապնդելու վերաբերյալ։ Փաշինյանն, իր հերթին, վստահեցրել է երկկողմ հարաբերությունների բարեկամական բնույթի մասին, հիշեցրել ՀԱՊԿ-ի հանդեպ ունեցած դժգոհունների մասին, փորձել է Արցախը հանձնելու պատասխանատվությունը բարդել Ռուսաստանի վրա և հայտարարել  է, որ ՌԴ քաղաքացիները չեն կարող մասնակցել Հայաստանում ընթացող քաղաքական գործընթացներին: