Հայաստանում դիտվում է  իրավական աբսուրդի նոր փուլ․ Սուրեն Սուրենյանց

Արմինֆո. Հայաստանում դիտվում է իրավական աբսուրդի նոր փուլ է։ Այդ մասին գրել է քաղաքագետ Սուրեն Սուրենյանցը։

Նրա ասելով՝ Սուրբ Աննա եկեղեցում տեղի ունեցած միջադեպից հետո երիտասարդների նկատմամբ հարուցված քրեական գործը բազմաթիվ հարցեր է առաջացնում։

«Իշխանությունը պնդում է, թե տեղի է ունեցել «պաշտոնատար անձի օրինական ծառայողական կամ քաղաքական գործունեությանը միջամտություն»։ Բայց այստեղ կա սկզբունքային հակասություն․ արդյո՞ք վարչապետը եկեղեցում իրականացնում էր ծառայողական կամ քաղաքական գործունեություն։

Հայաստանի Հանրապետության Սահմանադրության տրամաբանությամբ՝ եկեղեցին և պետությունը տարանջատված են։ Եկեղեցին պետական կառավարման հարթակ չէ, և այնտեղ պետական իշխանության իրականացում չի կարող տեղի ունենալ։ Եթե չկա ծառայողական գործունեություն, ապա ինչի՞ն են «միջամտել» այդ երիտասարդները։

Սա այն առանցքային կետն է, որտեղ մեղադրանքի ամբողջ կառուցվածքը փլուզվում է:

Ավելին՝ առաջադրված հոդվածները ակնհայտորեն անհամաչափ են և արհեստականորեն ընդլայնված։ Խուլիգանության և «միջամտության» համադրումը ստեղծում է արհեստականորեն ծանրացված մեղադրանք, որը ավելի շատ հիշեցնում է քաղաքական ուղերձ՝ չհամաձայնվողները պետք է պատժվեն։

Այս գործը վտանգավոր նախադեպ է։ Եթե ցանկացած միջադեպ կարող է ներկայացվել որպես «պաշտոնատար անձի գործունեությանը միջամտություն», ապա վաղը նույն տրամաբանությամբ կարելի է քրեականացնել ցանկացած անհամաձայնություն։

Եթե եկեղեցում «պաշտոնատար անձի գործունեությունը» տրամաբանական և համաչափ համարենք, ապա սա նշանակում է, որ ցանկացած հանրային վայրում (եկեղեցի, սրճարան, թատրոն) վարչապետի հետ անհամաձայնություն արտահայտելը կարող է դառնալ «միջամտություն»։ Սա իրավական աբսուրդ է և վտանգավոր նախադեպ», - գրել է քաղաքագետը՝ «Ֆեյսբուքի» իր էջում։

Հիշեցնենք, որ մարտի 29-ին սոցցանցերում տեսանյութ է տարածվել, որում երևում է, թե ինչպես պատարագի ընթացքում, երբ Փաշինյանը թիկնազորի ուղեկցությամբ շարժվում է դեպի ելք, ներկաներից մեկն ասել է. «Մի համարձակվիր ինձ այդպես նայել», ձեռքով կտրուկ շարժում է կատարել վարչապետի ուղղությամբ, սակայն նրա ձեռքը հետ են մղել թիկնապահները։ Ավելի ուշ ձերբակալվել են 18-ամյա երկվորյակ եղբայրներ Դավիթ և Միքայել Մինասյանները, ինչպես նաև հասարակական և քաղաքական գործիչ Գևորգ Գևորգյանը: Քննչական կոմիտեն քրեական գործ է հարուցել Դավիթ Մինասյանի դեմ ՝ քրեական օրենսգրքի 297-րդ հոդվածի 1-ին մասով (խուլիգանություն) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը), Միքայել Մինասյանի դեմ ՝ 46-297-րդ հոդվածի 1-ին մասով (խուլիգանությանն օժանդակելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելուն օժանդակելը): Գևորգ Գևորգյանի դեմ գործ է հարուցվել 46-297-րդ հոդվածի 1-ին մասով (խուլիգանություն կազմակերպելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելը):

Այսօր հայտնի դարձավ, որ ՀՀ Քննչական կոմիտեն միջնորդում է կալանավորել երկվորյակ եղբայրներից մեկին ՝ Դավիթ Մինասյանին, երկրորդ եղբորը՝ Միքայել Մինասյանին ազատ են արձակել չհեռանալու մասին ստորագրությամբ, ինչպես նաև գործով երրորդ ձերբակալվածին ՝ հասարակական գործիչ Գևորգ Գևորգյանին: