Թրամփը սպառնում է շարունակել Իրանի դեմ հարձակումները

Արմինֆո. ԱՄՆ նախագահ Դոնալդ Թրամփը երկուշաբթի օրը հայտարարել է, որ Վաշինգտոնն ու Թեհրանը ցանկանում են համաձայնության գալ, որը կվերջացնի տարածաշրջանում հակամարտությունը։

«Իրանցիները շատ են ցանկանում համաձայնության գալ։ Մենք նույնպես ցանկանում ենք համաձայնության գալ», - լրագրողներին ասել է նա։

Ըստ Թրամփի, երկու կողմերը նախորդ երեկոյան բանակցություններ են վարել իր հատուկ դեսպանորդ Սթիվ Վիտկոֆի և նախագահի փեսայի՝ Ջարեդ Քուշների մասնակցությամբ։

«Մենք գտել ենք էական ընդհանուր հիմք՝ գրեթե բոլոր հարցերում», - վստահեցրել է Թրամփը։

Նա ասել է, որ կապ է հաստատվում Իրանի «առաջնորդի» հետ, բայց դա չի վերաբերում գերագույն առաջնորդ Մոջթաբա Խամենեիին։ Թրամփը հավելել է, որ եթե բանակցությունները լավ ընթանան, Մերձավոր Արևելքում հակամարտությունը կարող է լուծվել։

Նա նշել է, որ եթե Վաշինգտոնի և Թեհրանի բանակցությունները ձախողվեն հինգ օրվա ընթացքում, Միացյալ Նահանգները կշարունակի հարձակվել Իրանի վրա։

«Մենք հինգօրյա բանակցություններ ենք վարում, և կտեսնենք, թե ինչպես կընթանան։ Եթե ամեն ինչ լավ ընթանա, մենք ի վերջո կլուծենք այս հարցը։ Հակառակ դեպքում, մենք պարզապես կշարունակենք ռմբակոծել որքան հնարավոր է ուժեղ», - երկուշաբթի օրը լրագրողներին ասաց Թրամփը։

Նախագահի խոսքով՝ ցանկացած համաձայնագիր կպահանջի, որ Իրանը միջուկային զենք չունենա։ «Մենք չենք ուզում միջուկային ռումբ, միջուկային զենք», - ընդգծեց ամերիկացի առաջնորդը։

Նա հավելեց, որ Միացյալ Նահանգները նաև ցանկանում է Իրանից ստանալ բարձր հարստացված ուրան։

Խոսելով բանակցությունների մասին՝ Թրամփը նշեց. «Դրանք, կասեի, կատարյալ անցան»։

«Ես կասեի, որ եթե նրանք շարունակեն, դա կվերջացնի այս խնդիրը, այս հակամարտությունը», - եզրափակեց նախագահը։