Հայաստանի երկրորդ նախագահը, ՀՅԴ-ն և "Առաջ" կուսակցությունը "Հայաստան" միասնական դաշինքով կմասնակցեն առաջիկա խորհրդարանական ընտր ություններին

Արմինֆո.ՀՀ երկրորդ նախագահ Ռոբերտ Քոչարյանը և ՀՅԴ-ն կշարունակեն համագործակցությունը և հունիսի 7-ին կայանալիք խորհրդարանական ընտրություններին կմասնակցեն "Առաջ" քաղաքական ուժի հետ՝ միասնական "Հայաստան" դաշինքով: Այդ մասին մարտի 16-ին հայտարարել է ՀՅԴ գերագույն մարմնի ներկայացուցիչ, ԱԺ խոշորագույն ընդդիմադիր "Հայաստան" խմբակցության պատգամավոր Իշխան Սաղաթելյանը՝ առաջիկա խորհրդարանական ընտրություններին "Հայաստան" դաշինքի մասնակցության ձեւաչափի հայտարարման ժամանակ իր ելույթում։

"Չնայած փորձություններին, քաղաքական հետապնդումներին, աննախադեպ ճնշումներին՝ "Հայաստան" դաշինքը ոչ միայն կենսունակ է մնացել, այլև այսօր հանդես է գալիս նորացված ընդլայնված կազմով: Այսօր պատիվ ունեմ հաղորդելու, որ Հայաստանի երկրորդ նախագահ Ռոբերտ Քոչարյանը և ՀՅԴ-ն որոշում են կայացրել շարունակել համագործակցությունը: Մեզ են միացել "Առաջ" կուսակցությունը և բազմաթիվ հասարակական ու քաղաքական գործիչներ ։ Եվ առաջիկա ընտրություններին մենք հանդես ենք գալու "Հայաստան " դաշինքով", - հաղորդել է Սաղաթելյանը։

Նրա խոսքով՝ իրենց քաղաքական ուժը ընտրություններին մասնակցելու է "Միասին կարող ենք" կարգախոսով։

Միաժամանակ, Սաղաթելյանը հաղորդել է, որ իրենք դուրս են եկել պայքարի ուղի, որպեսզի փոխեն իրավիճակը երկրում։ Նա խոստովանել է, որ իրենց կողմից եղել են և սխալներ, և բացթողումներ, բայց հավելել է, որ դրանք եղել են պայքարողների սխալները, այլ ոչ թե՝ դավաճանների կամ կողմնակի դիտորդների սխալներ: "Չի սխալվում նա, ով ոչինչ չի անում ։ Մենք մեր նպատակներում եղել ենք ազնիվ և անկեղծ", - ասել է նա։

Սաղաթելյանն ընդգծել է, որ եթե Հայաստանում գործող իշխանությունը վերընտրվի, կլինի "իրական Հայաստան"՝ առանց բանակի, առանց եկեղեցու և կախված Ադրբեջանի ու Թուրքիայի նախագահներից: "Առջևում հերթական ընտրությունները չեն, դա հերթական ընտրապայքարը չէ, դա գոյության հարց է։ Մեր խնդիրն է կանխել գործող իշխանության վերարտադրությունը և դադարեցնել զիջումների շղթան։ Պետք է ազնիվ լինել, Հայաստանում չկա որևէ քաղաքական ուժ, որն ի վիճակի է դա անել միայնակ, և ես ուղիղ դիմում եմ ընդդիմադիր ուժերին ՝ մենք թիրախներ չունենք ընդդիմադիր դաշտում, այստեղ մենք ունենք միայն պայքարի գործընկերներ։ Թիրախը մեկն է՝ գործող իշխանությունը, և մենք շարժվելու ենք այդ նպատակից ելնելով։ Նույն մոտեցումն ենք ակնկալում ընդդիմադիր դաշտի բոլոր քաղաքական ուժերից", - ասել է դաշնակցականը։

Իր հերթին՝ "Հայաստան" դաշինքից ԱԺ մեկ այլ պատգամավոր Աննա Գրիգորյանը հաղորդել է, որ Հայաստանի վարչապետի իրենց թեկնածուն լինելու է Արցախի առաջին նախագահ, Հայաստանի երկրորդ նախագահ Ռոբերտ Քոչարյանը: