ՔԿ. «Մուսալեռ» հյուրանոցային համալիրում տեղի ունեցած սպանության գործով մելադրյալ է հայտնվել

«Մուսալեռ» հյուրանոցային համալիրում տեղի ունեցած սպանության գործով որպես մելադրյալ է ներգրավվել 31-ամյա տղամարդ: ՀՀ Քննչական կոմիտեն տեղեկացնում է, որ միջոցներ են ձեռնարկվում նրան եւ միջադեպի մյուս մասնակիցներին հայտնաբերելու ուղղությամբ:

Կոմիտեի տարածած հաղորդագրության մեջ ասված է, որ հունվարի 6-ին «Մուսալեռ» հյուրանոցային համալիրում տեղի ունեցած սպանության դեպքի առթիվ ՀՀ քննչական կոմիտեի Արմավիրի մարզային քննչական վարչությունում հարուցված քրեական գործի շրջանակներում  որոշում է կայացվել՝ 31-ամյա Ա.Բաբայանին ՀՀ քրեական օրենսգրքի 4 հոդվածներով որպես մեղադրյալ ներգրավելու մասին:

«Նախաքննությամբ ձեռնարկված միջոցառումների արդյունքում պարզվել է, որ 2016թ. հունվարի 6-ին` ժամը 00:20-ի սահմաններում Արմավիրի մարզի Մուսալեռ գյուղի տարածքում գործող «Մուսալեռ» հյուրանոցա-ռեստորանային համալիրում մի քանի երիտասարդ կոպիտ կերպով խախտել են հասարակական կարգը, հայհոյել համալիրի աշխատակիցներին, բռնություն գործադրել համալիրի աշխատակիցներ Վանուշ Խաչատրյանի և Սմբատ Խլղաթյանի, ինչպես նաև՝ վերջինիս կանչով համալիր եկած Արմավիրի մարզի Տարոնիկ գյուղի բնակիչներ Արամ Կարապետյանի ու Արմեն Խլղաթյանի նկատմամբ: Նախնական քննության տվյալներով` վիճաբանության ընթացքում դրա մասնակիցներից մեկը` 31-ամյա Ա.Բաբայանը, իրեն կարգի հրավիրելու` Սմբատ Խլղաթյանի դիտողությունից վրդովված, սեփական անձի «առավելություններն» ընդգծելու մոլուցքից դրդված, իր մոտ գտնվող հրազենով կրակել է Ա.Կարապետյանի և Ա.Խլղաթյանի ուղղությամբ: Փախուստի դիմելիս ատրճանակն ուղղել է նաև Ս.Խլղաթյանի ուղղությամբ և փորձել կրակել, սակայն իր կամքից անկախ հանգամանքներում, մասնավորապես` ատրճանակը խափանվելու հետևանքով հանցագործությունն ավարտին չի հասցրել: Ստացված հրազենային վնասվածքից Արամ Կարապետյանը մահացել է, իսկ Արմեն Խլղաթյանը հրազենային վնասվածքներով տեղափոխվել է Երևան քաղաքի թիվ 1 համալսարանական հիվանդանոց: Ձեռք բերված ապացույցների համակցությամբ` ՀՀ քննչական կոմիտեի Արմավիրի մարզային քննչական վարչության ՀԿԳ ավագ քննիչը որոշում է կայացրել՝ Ա.Բաբայանին ՀՀ քրեական օրենսգրքի 258-րդ հոդեվածի 3-րդ մասի 1-ին կետով, 104-րդ հոդվածի 2-րդ մասի 10-րդ կետով, 34-104-րդ հոդվածի 2-րդ մասի 1-ին և 10-րդ կետերով և 235-րդ հոդվածի 1-ին մասով որպես մեղադրյալ ներգրավելու մասին: Միջնորդություն է ներկայացվել դատարան` նրա նկատմամբ որպես խափանման միջոց կալանավորումը կիրառելու վերաբերյալ:

Հանձնարարություն է տրվել ոստիկանության համապատասխան ստորաբաժանումներին` միջոցներ ձեռնարկել՝ Ա.Բաբայանին և միջադեպի մյուս մասնակիցներին հայտնաբերելու ուղղությամբ», - ասվում է ՔԿ հաղորդագրությունում: