"Միասնության թևերը" շարունակում է ահազանգել Ադրբեջանի կողմից Հայաստանի ինքնիշխան տարածքներ ներխուժելու մասին. հերթական հայտարարությունը փոխանցվել է ՀՀ կառավարությանը

Արմինֆո. "Միասնության թևեր" քաղաքական նախաձեռնության ներկայացուցիչներն այս անգամ բողոքի ակցիա են իրականացրել ՀՀ կառավարության շենքի մոտ, որտեղ փոխանցել են հայտարարություն ՝ արբանյակային լուսանկարներով և կոորդինատներով, որոնք հաստատում են, որ Ադրբեջանն առաջ է քաշել իր դիրքերը և ներխուժել Հայաստանի ինքնիշխան տարածքներ, մասնավորապես՝ Վայոց ձորի և Գեղարքունիքի ուղղությամբ։

Բողոքի ակցիայի ընթացքում "Շանթ" կուսակցության (որն առաջիկա խորհրդարանական ընտրություններին կմասնակցի "Միասնության թևեր" նախաձեռնության հետ միասին-խմբ.) առաջնորդ Շահեն Հարությունյանը լրագրողների հետ զրույցում պարզաբանել է, որ իրենց նպատակն է հետևողական լինել իրենց գործողություններում և շարունակել բարձրաձայնել իրենց հուզող հարցերը՝ պահանջելով դրանց հստակ պատասխաններ: Հարությունյանի խոսքով՝ իրենց համար սա ոչ թե քաղաքական պայքար է, այլ՝ Հայաստանի ինքնիշխանության և տարածքային ամբողջականության հարց։

"Այդ հարցերը միշտ պետք է լինեն օրակարգում, որպեսզի մենք կարողանանք պատասխան ստանալ, թե ինչու է դա տեղի ունենում։ Օգտվելով առիթից՝ դիմում եմ բոլոր քաղաքացիներին, հատկապես նրանց, ովքեր պատրաստվում են իրենց ձայնը տալ "Քաղաքացիական պայմանագիր" կուսակցությանը, և հիշեցնում եմ, որ սա մեր անկախության հարցն է: Մենք չպետք է անտարբեր լինենք նման խնդիրների նկատմամբ", - նշել է "Շանթ" կուսակցության առաջնորդը։

Նախաձեռնության անդամ Վարդան Փաշայանն, իր հերթին, պարզաբանել է, որ այսօր իրենք իրենց հարցն ուղղում են արդեն վարչապետ Նիկոլ Փաշինյանին: Փաշայանի խոսքով՝ հարցը ոչ այնքան այն է, թե ադրբեջանցիները որքան են առաջացել կամ ինչ են անում այդ դիրքերում, այլ այն, որ դա Հայաստանի ինքնիշխան տարածքն է, և նման գործողությունները պետք է ստանան իրենց գնահատականը: Բացի այդ, ինչպես նշել է նախաձեռնության անդամը, հարցը վերաբերում է սահմանամերձ գյուղերի բնակիչների անվտանգությանը։ "Այն, ինչ հիմա կատարվում է, շատ նման է այն սցենարին, որը նրանք կիրառել են Արցախում։ Այսինքն, քանի դեռ իշխանությունները համոզում էին, որ ամեն ինչ խաղաղ է, և ոչինչ տեղի չի ունենում, Ադրբեջանն ամրապնդում էր իր դիրքերը։ Ակցիայով մենք մտադիր ենք կանխել Ադրբեջանի հետագա ներխուժումը Հայաստանի ինքնիշխան տարածքներ", - եզրափակել է նախաձեռնության անդամը։

Հիշեցնենք, որ ավելի վաղ նախաձեռնության անդամները բողոքի ակցիա էին իրականացրել ՀՀ պաշտպանության նախարարության մոտ և հայտարարություն էին փոխանցել արբանյակային լուսանկարներով և կոորդինատներով, որոնք հաստատում են, որ ադրբեջանցիները ներխուժել են ՀՀ ինքնիշխան տարածք: Պաշտպանության նախարարությունից, սակայն, հերքել են այդ պնդումները,  հայտարարելով, որ ադրբեջանական ուժերը առաջ չեն շարժվել, իսկ ադրբեջանական նոր դիրքը գտնվում է իրենց տարածքում: Ընդ որում, այս փաստը հերքելիս ՊՆ - ում իրենք, հավանաբար, չցանկանալով հաստատել են թշնամու զորքերի առաջխաղացման փաստը։

Ակցիան կազմակերպվել էր այն բանից հետո, երբ "Միասնության թևեր" քաղաքական նախաձեռնության առաջնորդ Արման Թաթոյանը հաղորդել էր, որ Հայաստանի ինքնիշխան տարածքում արձանագրվել է Ադրբեջանի նոր ներխուժում, ինչի մասին Հայաստանի իշխանությունները չեն տեղեկացրել հանրությանը: Մասնավորապես, նա հաղորդել էր, որ ըստ առկա տեղեկությունների, Վարդենիսում տեղակայել են մարտական հերթապահություն իրականացնող դիրքեր, ինչպես նաև հրաձգային, ականանետային և այլ խոշոր տրամաչափի զենքերի համար նախատեսված կետեր, ստեղծվել են կոմունիկացիաներ, ուղիղ նշանառության տակ է հայտնվել Վարդենիս համայնքի Սոթքի ոսկու հանքավայրը, տեղադրվել են արևային մարտկոցներ, կառուցվել են օպերատիվ-մարտավարական և ռազմավարական ճանապարհներ, ապաստարաններ, որոնցով հնարավոր է ներթափանցել Հայաստանի տարածքի խորքերը: Նման պատկեր, ըստ Թաթոյանի, դիտվում է նաև Ջերմուկում, որտեղ կառուցված են ականանետերի համար նախատեսված դիրքեր: Սակայն նույն օրը ՀՀ պաշտպանության նախարար Սուրեն Պապիկյանը խորհրդարանի ամբիոնից սուտ էր որակել Թաթոյանի այդ պնդումները։