Նարեկ Կարապետյան. Հայաստանին նոր առաջնորդներ են պետք՝ երկիրը ստեղծված իրավիճակից դուրս բերելու համար

Արմինֆո. Իշխանությունը կարող է անվավեր ճանաչել ժողովրդավարությունը, հավաքվել մի փոքր խմբով և ինքնուրույն որոշել, թե ով է լինելու ՀՀ վարչապետ, կամ քանի անգամ է նույն մարդը լինելու երկրի ղեկավար։ Այդ մասին մարտի 6-ին մամուլի ասուլիսի ժամանակ հայտարարել է "Ուժեղ Հայաստան" կուսակցության վարչության անդամ Նարեկ Կարապետյանը՝ մեկնաբանելով իշխանական եւ իշխանամետ որոշ շրջանակների հայտարարությունները, թե անհրաժեշտ է արգելել կուսակցության գրանցումը։

Նարեկ Կարապետյանի խոսքով ՝ կա ժողովրդավարություն և մարդկանց կարծիք, թող իրենք էլ որոշում կայացնեն՝ համաձայն ՀՀ սահմանադրության: "Եթե նրանց համար ժողովրդավարությունը ինչ-որ բան է նշանակում, ապա նրանք չեն գնա այդ քայլին, Հայաստանի պատմության մեջ չի եղել մի ժամանակաշրջան, երբ հիմնական ընդդիմադիր ուժին չթույլատրվեր մասնակցել ընտրություններին։ Դա բոլորովին այլ ճանապարհ կբացի Հայաստանի համար, կփակի շատ ճանապարհներ և ՀՀ-ին կթողնի նույն շրջափուլում", - հայտարարել է Կարապետյանը։

Նա համոզմունք է հայտնել, որ Հայաստանին նոր առաջնորդներ են պետք՝ երկիրը ստեղծված իրավիճակից դուրս բերելու համար, և այդ պատճառով առաջարկվում են ծրագրեր, որոնք ուղղված են երկիրը փոխելուն, այլ ոչ թե մարդկանց շրջանակը փոխելուն: "Հայաստանի հասարակությունը փոփոխությունների, նոր լիդերության կարիք է զգում։ Մենք կառաջարկենք, իսկ մեր հասարակությունը թող որոշի։ Իսկ նրանք թող մեր ժողովրդի փոխարեն չորոշեն", - ասել է Նարեկ Կարապետյանը ։

Շարունակելով "Հանրապետություն" կուսակցության ղեկավար Արամ Սարգսյանի այն հայտարարության վերաբերյալ թեման, թե "Ուժեղ Հայաստանին" չպետք է թույլ տալ մասնակցել ընտրություններին, քանի որ այն ռուսական ուժ է, Կարապետյանն ասել է. "Չեմ կարծում, թե պարոն Սարգսյանը պետք է որոշի՝ ով է մասնակցելու ընտրություններին":

Այդ առնչությամբ քաղաքական գործիչն ուշադրություն է հրավիրել հասարակական կարծիքի հարցման տվյալների վրա, որն անցկացրել է Միջազգային հանրապետական ինստիտուտը, որի համաձայն, հունիսի 7-ի խորհրդարանական ընտրությունների արդյունքում "Քաղաքացիական պայմանագիր" կուսակցությունը կստանա ձայների 24 տոկոսը, "Ուժեղ Հայաստանը"՝ 9 տոկոս, "Հայաստան" դաշինք և "Բարգավաճ Հայաստան" կուսակցություն ՝ 3-ական տոկոս: Նարեկ Կարապետյանը նշել է, որ այդ հարցման մեջ հետաքրքիր և տարօրինակ դինամիկա կա ընդդիմության ձայների մասով: «Նույնիսկ իրենց իսկ հարցումների արդյունքում, դուք նկատեցիք, որ 53 տոկոս ձայն հավաքած իշխանությունը հիմա ընդամենը 24 տոկոս է հավաքել, ինչը 2 անգամ քիչ է։ Սա ցույց է տալիս հասարակության մեծ հիասթափությունը իշխանության նկատմամբ ։ Նրանք գիտեն, որ հասարակության մեծ մասը հիասթափված է, քանի որ գեղեցիկ խոսքեր են հնչել, բայց ոչ մի քայլ չի եղել", - հայտարարել է նա։